1 Samuel 16

Ruth  «  1 Samuel 15  ‹  1 Samuel 16  ›  1 Samuel 17  »  2 Samuel

ԴԱՒԻԹ ԹԱԳԱՒՈՐ Կ’ՕԾՈՒԻ

Տէրը Սամուէլի ըսաւ. «Մինչեւ ե՞րբ Սաւուղի համար պիտի սգաս, քանի ես զայն մերժեցի՝ որպէսզի Իսրայէլի վրայ չթագաւորէ։ Եղջիւրդ իւղո՛վ լեցուր եւ գնա՛. քեզ Բեթլեհեմացի Յեսսէի պիտի ղրկեմ, որովհետեւ անոր որդիներէն մէկը ինծի թագաւոր ¹ընտրեցի»։

Սամուէլ ըսաւ. «Ի՞նչպէս երթամ. եթէ Սաւուղ լսէ, զիս կը մեռցնէ»։ Տէրը ըսաւ. «²Քեզի հետ՝՝ երի՛նջ մը առ, ըսէ՛ թէ “Տէրոջ զոհ ընելու եկայ”,

ու Յեսսէն զոհի՛ն հրաւիրէ. քեզի պիտի գիտցնեմ ինչ որ պիտի ընես, եւ ինծի թագաւոր պիտի օծես ա՛ն՝ որ քեզի պիտի ըսեմ»։

Սամուէլ Տէրոջ ըսածը ըրաւ, ու Բեթլեհէմ գնաց։ Քաղաքին երէցները դողալով զինք դիմաւորեցին եւ ըսին. «Արդեօք խաղաղութեա՞մբ եկար»։

Ինք ալ ըսաւ. «Խաղաղութեամբ. Տէրոջ զոհ ընելու եկայ։ Դուք ձեզ սրբացուցէ՛ք ու ինծի հետ զոհի՛ եկէք»։ Յեսսէն եւ անոր որդիները սրբացուց, ու զանոնք զոհի հրաւիրեց։

Երբ անոնք եկան, Եղիաբը տեսնելով՝ ըսաւ. «Անտարակոյս Տէրոջ օծեալը իր առջեւ է»։

Բայց Տէրը Սամուէլի ըսաւ. «Անոր երեւոյթին ու հասակին բարձրութեան մի՛ նայիր, քանի որ ես զայն մերժեցի. արդարեւ Աստուած մարդուն նման չի նայիր, որովհետեւ մարդը ³արտաքին երեւոյթին՝՝ կը նայի, բայց Տէրը սիրտին կը նայի»։

Յեսսէ Աբինադաբը կանչեց եւ զայն Սամուէլի առջեւէն անցուց. Սամուէլ ըսաւ. «Տէրը ասիկա ալ չընտրեց»։

Յեսսէ Սամաան անցուց, ու Սամուէլ ըսաւ. «Տէրը ասիկա ալ չընտրեց»։

Երբ Յեսսէ Սամուէլի առջեւէն իր եօթը որդիները անցուց, Սամուէլ Յեսսէի ըսաւ. «Տէրը ասոնցմէ ո՛չ մէկը ընտրեց»։

Յետոյ Սամուէլ Յեսսէի ըսաւ. «Բոլոր երիտասարդներդ հո՞ս են»։ Ան ըսաւ. «Տակաւին ամենէն պզտիկը կը մնայ. ահա՛ ան ոչխարները կ’արածէ»։ Սամուէլ Յեսսէի ըսաւ. «Մա՛րդ ղրկէ եւ զայն բերել տուր. որովհետեւ մինչեւ որ ան հոս չգայ, մենք սեղան պիտի չնստինք»։

Ուստի մարդ ղրկեց ու զայն բերել տուաւ։ Ան շէկ էր, գեղեցիկ աչքեր ունէր, եւ վայելչագեղ տեսք։ Այն ատեն Տէրը ըսաւ. «Կանգնէ՛, զի՛նք օծէ, քանի որ ասիկա՛ է»։

Սամուէլ իւղին եղջիւրը առաւ ու զայն օծեց իր եղբայրներուն մէջ։ Այդ օրէն սկսեալ Տէրոջ Հոգին Դաւիթը համակեց. Սամուէլ ալ կանգնեցաւ եւ Ռամա գնաց։

ԴԱՒԻԹ ՍԱՒՈԻՂԻ ՊԱԼԱՏԻՆ ՄԷՋ

Տէրոջ Հոգին Սաւուղէն հեռացաւ, ու Տէրոջմէն չար ոգի մը զայն կը զարհուրեցնէր։

Սաւուղի ծառաները անոր ըսին. «Ահա՛ այժմ Աստուծմէ չար ոգի մը քեզ կը զարհուրեցնէ։

Մեր տէրը իր առջեւ եղող ծառաներուն այժմ թող հրամայէ, որ ճարտար քնարահար մը փնտռեն, որպէսզի երբ Աստուծմէ այդ չար ոգին քու վրադ ⁴գայ, անիկա իր ձեռքով քնար նուագէ ու դուն զուարթանաս»։

Սաւուղ ալ իր ծառաներուն ըսաւ. «Այժմ ինծի լա՛ւ նուագահար մը ⁵գտէք ու զայն ինծի՛ բերէք»։

Սպասաւորներէն մէկը պատասխանեց. «Ահա՛ Բեթլեհեմացի Յեսսէի մէկ որդին տեսայ, որ քնար նուագել գիտէ. ան զօրաւոր կտրիճ մըն է, պատերազմիկ մը. ճարտասան եւ վայելչակազմ մարդ մըն է, ու Տէրը անոր հետ է»։

Սաւուղ Յեսսէի պատգամաւորներ ղրկեց եւ ըսաւ. «Ոչխարներուն քով գտնուող որդիդ՝ Դաւիթը ինծի՛ ղրկէ»։

Ուստի Յեսսէ քանի մը հաց, տիկ մը գինի, եւ այծերէն ուլ մը առնելով՝ իշու վրայ բեռցուց, ու զանոնք իր որդիին՝ Դաւիթի ձեռքով Սաւուղի ղրկեց։

Դաւիթ Սաւուղի եկաւ եւ անոր ներկայացաւ։ Սաւուղ զինք շատ սիրեց, ու Դաւիթ անոր զինակիրը եղաւ։

Սաւուղ Յեսսէի մարդ ղրկեց՝ ըսելով. «Կ’աղերսե՛մ, Դաւիթ իմ ⁶քովս թող կենայ՝՝, քանի որ ան իմ ⁷առջեւս շնորհք գտաւ»։

Երբ Աստուծմէ չար ոգին Սաւուղի վրայ գար, Դաւիթ քնարը կ’առնէր եւ իր ձեռքով կը նուագէր. Սաւուղ ալ կը հանգստանար, կը զուարթանար, ու չար ոգին իրմէ կը հեռանար։