1 Samuel 18

Ruth  «  1 Samuel 17  ‹  1 Samuel 18  ›  1 Samuel 19  »  2 Samuel

Երբ Սաւուղի հետ խօսիլը աւարտեց, Յովնաթանի անձը Դաւիթի անձին կապուեցաւ, ու Յովնաթան իր անձին պէս սիրեց զայն։

Նոյն օրը Սաւուղ զայն առաւ ու չթոյլատրեց որ իր հօր տունը վերադառնայ։

Յովնաթան Դաւիթի հետ ուխտ կնքեց, քանի որ իր անձին պէս կը սիրէր զայն։

Յովնաթան իր վրայի պարեգօտէն մերկացաւ, եւ զայն, իր վերարկուն, մինչեւ անգամ իր սուրը, աղեղն ու գօտին Դաւիթի տուաւ։

Դաւիթ ամէն տեղ ¹կ’երթար, ո՛ւր որ Սաւուղ զինք կը ղրկէր, եւ ²իմաստութեամբ կը վարուէր՝՝։ Սաւուղ զինք պատերազմիկներուն վրայ նշանակեց. ան ամբողջ ժողովուրդին ³հաճելի էր. Սաւուղի ծառաներուն ալ հաճելի էր։

ՍԱՒՈՒՂ ԿԸ ՆԱԽԱՆՁԻ ԴԱՒԻԹԻ

Երբ Դաւիթ Փղշտացին զարնելէն կը վերադառնար եւ զօրքերը կու գային, Իսրայէլի բոլոր քաղաքներէն՝ կիները, երգելով ու պարելով, դուրս ելան Սաւուղ թագաւորը դիմաւորելու, թմբուկներով, ուրախութեամբ եւ ⁴ծնծղաներով։

Խայտացող կիները ⁵կը խմբերգէին՝՝ ու կ’ըսէին. «Սաւուղ իր հազարաւորները զարկաւ, Եւ Դաւիթ՝ իր բիւրաւորները»։

Սաւուղ շատ բորբոքեցաւ. այս խօսքը իրեն ⁶անհաճոյ եղաւ, եւ ըսաւ. «Բիւրաւորները Դաւիթի տուին, իսկ հազարաւորները ինծի տուին։ Հիմա թագաւորութենէն ուրիշ ի՞նչ կը պակսի անոր»։

Այդ օրէն սկսեալ Սաւուղ ծուռ աչքով կը նայէր Դաւիթի։

Հետեւեալ օրը Աստուծմէ չար ոգի մը Սաւուղը համակեց, ու տան մէջ մարգարէութիւն ըրաւ։ Դաւիթ ուրիշ օրերու պէս իր ձեռքով քնար կը նուագէր, եւ Սաւուղի ձեռքը նիզակ մը կար։

Սաւուղ նիզակը նետեց՝ ըսելով. «Դաւիթը պատին պիտի ⁷գամեմ»։ Բայց Դաւիթ երկու անգամ անոր ⁸առջեւէն խուսափեցաւ՝՝։

Ուստի Սաւուղ Դաւիթէն կը վախնար, քանի Տէրը անոր հետ էր, բայց Սաւուղէն հեռացեր էր։

Սաւուղ զայն իր քովէն հեռացուց, եւ զայն հազարապետ նշանակեց. ուստի ան ժողովուրդին առջեւէն կ’ելլէր ու կը մտնէր։

Դաւիթ իր բոլոր ⁹ճամբաներուն մէջ իմաստութեամբ կը վարուէր՝՝, եւ Տէրը անոր հետ էր։

Սաւուղ անոր ¹⁰այնքան իմաստութեամբ վարուիլը՝՝ տեսնելով՝ անկէ կը վախնար։

Ամբողջ Իսրայէլն ու Յուդան Դաւիթը կը սիրէին, որովհետեւ անիկա՛ իրենց առջեւէն կ’ելլէր եւ կը մտնէր։

Սաւուղ Դաւիթի ըսաւ. «Ահա՛ իմ մեծ աղջիկս՝ Մերովբը քեզի պիտի տամ իբր կին. միայն թէ դուն ինծի համար ¹¹կտրի՛ճ եղիր ու Տէրոջ պատերազմնե՛րը ¹²մղէ»։ Արդարեւ Սաւուղ ինքնիրեն կ’ըսէր. «Ի՛մ ձեռքս թող չըլլայ անոր վրայ, հապա Փղշտացիներո՛ւն ձեռքը թող ըլլայ անոր վրայ»։

Դաւիթ Սաւուղի ըսաւ. «Ես ո՞վ եմ, եւ իմ կեանքս կամ հօրս ազգատոհմը Իսրայէլի մէջ ի՞նչ է, որ թագաւորին փեսայ ըլլամ»։

Երբ Սաւուղի աղջիկը՝ Մերովբը Դաւիթի պիտի տրուէր, Մաուլացի Եդրիէլի տրուեցաւ։

ԴԱՒԻԹ Կ’ԱՄՈՒՍՆԱՆԱՅ ՍԱՒՈՒՂԻ ԱՂՋԻԿԻՆ ՀԵՏ

Սաւուղի աղջիկը՝ Մեղքող կը սիրէր Դաւիթը. երբ Սաւուղի իմացուցին, այս բանը անոր ¹³հաճելի թուեցաւ՝՝։

Սաւուղ ըսաւ. «Ես զայն անոր տամ, որպէսզի անոր որոգայթ ըլլայ ու Փղշտացիներուն ձեռքը անոր վրայ ըլլայ»։ Ուստի Սաւուղ Դաւիթի ըսաւ. «Ինծի այսօր ¹⁴երկրորդ փեսայ եղիր»։

Սաւուղ իր ծառաներուն հրամայեց որ Դաւիթի հետ ծածկաբար խօսին, եւ ըսեն. «Ահա՛ թագաւորը քեզմէ կ’ախորժի, ու անոր բոլոր ծառաները քեզ կը սիրեն. ուստի հիմա թագաւորին փեսա՛յ եղիր»։

Սաւուղի ծառաները այս խօսքերը Դաւիթի ականջներուն ըսին։ Դաւիթ ալ ըսաւ. «Թագաւորին փեսայ ըլլալը ¹⁵պզտի՞կ բան կը թուի ձեզի՝՝. քանի որ ես թշուառ եւ աննշան մարդ մըն եմ»։

Սաւուղի ծառաները իրեն իմացուցին՝ ըսելով. «Դաւիթ այս կերպով խօսեցաւ»։

Սաւուղ ըսաւ. «Դաւիթի սա՛ ըսէք. “Թագաւորը որեւէ օժիտ չ’ուզեր, բայց միայն Փղշտացիներէն հարիւր թլիփ, որպէսզի թագաւորին թշնամիներէն վրէժ առնուի”»։ (Սաւուղ կը խորհէր Դաւիթը Փղշտացիներուն ¹⁶ձեռքը մատնել՝՝։)

Երբ անոր ծառաները այս խօսքերը Դաւիթի իմացուցին, Դաւիթի հաճելի թուեցաւ՝ որ թագաւորին փեսայ ըլլայ։

Ուստի օրերուն լրանալէն առաջ՝ Դաւիթ կանգնեցաւ, իր մարդոցմով գնաց եւ Փղշտացիներէն երկու հարիւր մարդ զարկաւ։ Դաւիթ անոնց թլիփները բերաւ, ու զանոնք լման թագաւորին տուին՝ որպէսզի թագաւորին փեսայ ըլլայ։ Սաւուղ ալ իր աղջիկը՝ Մեղքողը տուաւ անոր իբր կին։

Երբ Սաւուղ տեսաւ ու հասկցաւ թէ Տէրը Դաւիթի հետ է, եւ թէ ¹⁷իր աղջիկը՝ Մեղքող զայն կը սիրէ,

Սաւուղ ա՛լ աւելի վախցաւ Դաւիթէն։ Սաւուղ ¹⁸ընդմիշտ Դաւիթի թշնամի եղաւ։

Փղշտացիներու իշխանները դուրս ելան, ու անոնց ելլելէն ետք՝ Դաւիթ Սաւուղի բոլոր ծառաներէն աւելի ¹⁹իմաստութեամբ կը վարուէր՝՝. ուստի անոր անունը շատ հռչակաւոր եղաւ։