1 Samuel 19

Ruth  «  1 Samuel 18  ‹  1 Samuel 19  ›  1 Samuel 20  »  2 Samuel

ԴԱՒԻԹ ԿԸ ՀԱԼԱԾՈՒԻ ՍԱՒՈՒՂԷՆ

Սաւուղ իր որդիին՝ Յովնաթանի, եւ իր բոլոր ծառաներուն ըսաւ, որ Դաւիթը մեռցնեն։

Բայց Սաւուղի որդին՝ Յովնաթան ¹Դաւիթը շատ կը սիրէր՝՝. ուստի Յովնաթան Դաւիթի իմացուց՝ ըսելով. «Իմ հայրս՝ Սաւուղ քեզ մեռցնել ²կ’ուզէ. հիմա կ’աղերսե՛մ, մինչեւ առտու զգուշացի՛ր դուն քեզի, ծածո՛ւկ տեղ մը կեցիր ու պահուըտէ՛.

իսկ ես դուրս պիտի ելլեմ եւ հօրս քով պիտի կայնիմ՝ քու ³գտնուած դաշտիդ մէջ. քու մասիդ հօրս պիտի խօսիմ, եւ ինչ որ ⁴գիտնամ՝ քեզի պիտի հաղորդեմ»։

Յովնաթան Դաւիթի մասին ⁵նպաստաւոր կերպով խօսեցաւ իր հօր՝ Սաւուղի, ու անոր ըսաւ. «Թագաւորը իր ծառային՝ Դաւիթի դէմ թող չմեղանչէ. քանի որ ան քեզի դէմ չէ մեղանչեր, եւ անոր գործերը քեզի համար շատ նպաստաւոր են։

Արդարեւ իր ⁶կեանքը վտանգելով՝՝ Փղշտացին զարկաւ, ու Տէրը ամբողջ Իսրայէլի մեծ փրկութիւն մը շնորհեց։ Դուն տեսար եւ ուրախացար. ուստի ինչո՞ւ Դաւիթը առանց ⁷պատճառի մեռցնելով՝ անմեղ ⁸արիւն պիտի թափես՝՝»։

Սաւուղ Յովնաթանի խօսքը մտիկ ըրաւ. Սաւուղ երդում ըրաւ՝ ըսելով. «Տէրը կ’ապրի՛. ան պիտի չմեռցուի»։

Յովնաթան Դաւիթը կանչեց, ու Յովնաթան այս բոլոր խօսքերը անոր հաղորդեց։ Յետոյ Յովնաթան Դաւիթը Սաւուղի տարաւ, եւ ան ⁹առաջուան պէս անոր ¹⁰ծառայեց։

Վերստին պատերազմ եղաւ։ Դաւիթ Փղշտացիներուն դէմ պատերազմելու ¹¹գնաց, ու զանոնք մեծ պարտութեան մատնեց. անոնք ալ անոր ¹²առջեւէն փախան։

Տէրոջմէն չար ոգի մը ¹³Սաւուղը համակեց՝՝, երբ ան իր տունը նստած էր եւ նիզակը ձեռքն էր, Դաւիթ ալ իր ձեռքով քնար կը նուագէր։

Սաւուղ ¹⁴ուզեց որ Դաւիթը նիզակով զարնէ ու պատին գամէ, բայց ան Սաւուղի ¹⁵առջեւէն խուսափեցաւ. Սաւուղ նիզակը պատին զարկաւ։ Դաւիթ փախաւ եւ այդ գիշերը ճողոպրեցաւ.

բայց Սաւուղ Դաւիթի տունը պատգամաւորներ ղրկեց, որպէսզի անոր վրայ հսկեն ու առտուն մեռցնեն։ Դաւիթի կինը՝ Մեղքող անոր իմացուց, եւ ըսաւ. «Եթէ այս գիշեր անձդ չազատես, վաղը քեզ պիտի մեռցնեն»։

Ուստի Մեղքող Դաւիթը պատուհանէն վար իջեցուց. ան ալ գնաց ու փախաւ, եւ ճողոպրեցաւ։

Մեղքող ¹⁶ընտանեկան կուռք՝՝ մը առաւ ու զայն մահիճին մէջ դրաւ. անոր սնարը՝ այծի մազէ բարձ մը դրաւ, ու զայն հագուստով մը ծածկեց։

Երբ Սաւուղ պատգամաւորներ ղրկեց՝ Դաւիթը բռնելու համար, ան ըսաւ. «Հիւանդ է»։

Սաւուղ դարձեալ պատգամաւորներ ղրկեց՝ Դաւիթը տեսնելու համար, եւ ըսաւ. «Զինք մահիճո՛վ ինծի ¹⁷բերէք, որպէսզի մեռցնեմ»։

Երբ պատգամաւորները եկան, ահա՛ մահիճին մէջ ընտանեկան կուռք մը կար, ու անոր սնարը՝ այծի մազէ բարձ մը։

Սաւուղ Մեղքողի ըսաւ. «Զիս ինչո՞ւ այսպէս խաբեցիր եւ թշնամիս արձակեցիր, ան ալ խոյս տուաւ»։ Մեղքող Սաւուղի պատասխանեց. «Ան ինծի ըսաւ. “Արձակէ՛ զիս՝ որպէսզի երթամ. ինչո՞ւ քեզ մեռցնեմ”»։

Այսպէս՝ Դաւիթ փախաւ եւ ճողոպրեցաւ. Ռամա գնաց՝ Սամուէլի քով, ու անոր պատմեց ամէն ինչ որ Սաւուղ ըրեր էր իրեն։ Յետոյ ինք եւ Սամուէլ գացին ու Նաւաթի մէջ բնակեցան։

Սաւուղի իմացուցին՝ ըսելով. «Ահա՛ Դաւիթ Ռամայի Նաւաթին մէջ է»։

Այն ատեն Սաւուղ պատգամաւորներ ղրկեց՝ որպէսզի Դաւիթը բռնեն։ Երբ անոնք մարգարէութիւն ընող մարգարէներուն խումբը տեսան, եւ անոնց վերակացուն՝ Սամուէլը՝ կայնած, Աստուծոյ Հոգին Սաւուղի ղրկած պատգամաւորներուն վրայ ¹⁸եկաւ, ու անոնք ալ մարգարէութիւն ըրին։

Երբ Սաւուղի իմացուցին, ուրիշ պատգամաւորներ ղրկեց, եւ անոնք ալ մարգարէութիւն ըրին։ Սաւուղ վերստին՝ երրորդ անգամ պատգամաւորներ ղրկեց. անոնք ալ մարգարէութիւն ըրին։

Յետոյ ի՛նք ալ Ռամա գնաց, ու Սոկքովի մեծ ջրհորը հասնելով՝ հարցուց. «Սամուէլ եւ Դաւիթ ո՞ւր են»։ Մարդ մը ըսաւ. «Ահա՛ անոնք Ռամայի Նաւաթն են».

ուստի Ռամայի Նաւաթը գնաց։ Աստուծոյ Հոգին իր վրայ ալ եկաւ, ու ճամբան գացած ատեն մարգարէութիւն ըրաւ՝ մինչեւ Ռամայի Նաւաթը հասնիլը։

Ի՛նք ալ իր հագուստներէն մերկացաւ, եւ Սամուէլի առջեւ ի՛նք ալ մարգարէութիւն ըրաւ. այդ ամբողջ օրն ու ամբողջ գիշերը մերկ ինկաւ գետինը։ Հետեւաբար ըսուեցաւ. «Սաւո՞ւղ ալ մարգարէներուն մէջ է»։