1 Samuel 24

Ruth  «  1 Samuel 23  ‹  1 Samuel 24  ›  1 Samuel 25  »  2 Samuel

ԴԱՒԻԹ ԿԸ ԽՆԱՅԷ ՍԱՒՈՒՂԻ ԿԵԱՆՔԻՆ

Դաւիթ անկէ բարձրացաւ ու Ենգադդիի ամրութիւններուն մէջ բնակեցաւ։

Երբ Սաւուղ ¹Փղշտացիները հետապնդելէն՝՝ վերադարձաւ, անոր իմացուցին՝ ըսելով. «Ահա՛ Դաւիթ Ենգադդիի անապատն է»։

Սաւուղ ամբողջ Իսրայէլէն երեք հազար ընտիր մարդ առաւ, եւ գնաց՝ որ Դաւիթն ու անոր մարդիկը փնտռէ քարայծերու ժայռերուն վրայ։

Ճամբային քով եղող ոչխարներուն փարախները հասաւ. հոն քարայր մը կար, եւ Սաւուղ ²հարկաւորութեան համար ներս գնաց։ Դաւիթ իր մարդոցմով քարայրին ներսի կողմը նստած էր։

Դաւիթի մարդիկը անոր ըսին. «Ահա՛ օրը որուն մասին Տէրը քեզի ըսաւ. “Ահա՛ քու թշնամիդ ձեռքդ պիտի մատնեմ, որ ³քեզի հաճելի՝՝ եղածը ընես անոր”»։ Դաւիթ կանգնեցաւ ու Սաւուղի պարեգօտին քղանցքը գաղտնի կտրեց։

Բայց յետոյ Դաւիթ ⁴խղճահարուեցաւ, քանի որ Սաւուղի պարեգօտին քղանցքը կտրեր էր։

Իր մարդոց ըսաւ. «Տէրը չարտօնէ որ Տէրոջ օծեալին՝ իմ տիրոջս այս բանը ընեմ, ձեռքս անոր վրայ երկարելով. որովհետեւ ան Տէրոջ օծեալն է»։

Դաւիթ այս խօսքերով իր մարդիկը սանձահարեց, ու չթոյլատրեց որ Սաւուղի ⁵վրայ յարձակին՝՝։ Սաւուղ քարայրէն դուրս ⁶ելաւ եւ իր ճամբան գնաց։

Յետոյ Դաւիթ ալ կանգնեցաւ, քարայրէն դուրս ելաւ, ու Սաւուղի ետեւէն պոռալով՝ ըսաւ. «Ո՛վ թագաւոր, իմ տէ՛րս»։ Երբ Սաւուղ ետեւը նայեցաւ, Դաւիթ դէմքը մինչեւ գետին խոնարհեցնելով՝ երկրպագեց։

Դաւիթ Սաւուղի ըսաւ. «Ինչո՞ւ մարդոց խօսքը մտիկ կ’ընես, որոնք քեզի կ’ըսեն. “Ահա՛ Դաւիթ քեզի չարիք ընել կը ⁷ջանայ”։

Ահա՛ այսօր քու աչքերդ կը տեսնեն թէ Տէրը այսօր՝ քարայրին մէջ՝ քեզ իմ ձեռքս մատնեց, եւ ինծի ըսին որ քեզ մեռցնեմ։ Բայց ես քու վրադ խղճացի, ու ըսի. “Ձեռքս իմ տիրոջս վրայ չեմ երկարեր, որովհետեւ ան Տէրոջ օծեալն է”։

Տե՛ս, իմ հա՛յրս, այո՛, տե՛ս, քու պարեգօտիդ քղանցքը ձեռքիս մէջ է. քանի ես պարեգօտիդ քղանցքը կտրեցի բայց քեզ չմեռցուցի, հասկցի՛ր եւ տե՛ս թէ ձեռքիս մէջ ո՛չ չարութիւն կայ, ո՛չ ալ յանցանք, ու քեզի դէմ մեղանչած չեմ, բայց դուն ⁸զիս կը հետապնդես՝ որ բռնես։

Տէ՛րը թող դատէ իմ եւ քու միջեւ, ու Տէ՛րը իմ վրէժս քեզմէ առնէ. բայց իմ ձեռքս քու վրադ պիտի չըլլայ։

Ինչպէս հին առածը կ’ըսէ. “Ամբարիշտներէն ամբարշտութիւն դուրս կ’ելլէ”, բայց իմ ձեռքս քու վրադ պիտի չըլլայ։

Իսրայէլի թագաւորը որո՞ւ ետեւէն դուրս ելեր է։ Ո՞վ կը հալածես. մեռած շո՞ւն մը, լո՞ւ մը։

Ուստի Տէրը դատաւոր թող ըլլայ, եւ իմ ու քու միջեւ դատէ. թող զննէ, իրաւունքս պաշտպանէ եւ ձեռքէդ ⁹ազատէ»։

Երբ Դաւիթ այս խօսքերը Սաւուղի ըսելը աւարտեց, Սաւուղ ըսաւ. «Որդեա՛կս Դաւիթ, ատիկա քո՞ւ ձայնդ է»։ Սաւուղ իր ձայնը բարձրացուց եւ լացաւ,

ու Դաւիթի ըսաւ. «Դուն ինձմէ արդար ես. արդարեւ դուն ինծի բարիք ¹⁰ըրիր, բայց ես քեզի չարիք հատուցանեցի։

Այսօր յայտնեցիր թէ ինծի հետ բարութեամբ վարուեցար, որովհետեւ Տէրը զիս քու ձեռքդ մատնեց, բայց դուն զիս չմեռցուցիր։

Արդարեւ եթէ մարդ մը իր թշնամին գտնէ, զայն կ’արձակէ՞ որ ¹¹խաղաղութեամբ երթայ՝՝։ Ուստի այսօր ինծի ըրածիդ փոխարէն՝ Տէրը քեզի բարիք հատուցանէ։

Հիմա ահա՛ գիտեմ թէ դուն անշուշտ թագաւոր պիտի ըլլաս, եւ Իսրայէլի թագաւորութիւնը ձեռքիդ մէջ պիտի հաստատուի։

Ուստի հիմա Տէրոջմով ինծի երդո՛ւմ ըրէ թէ ինձմէ ետք իմ զարմս պիտի չմեռցնես, ու հօրս տունէն իմ անունս պիտի չջնջես»։