1 Samuel 27

Ruth  «  1 Samuel 26  ‹  1 Samuel 27  ›  1 Samuel 28  »  2 Samuel

ԴԱՒԻԹ ՓՂՇՏԱՑԻՆԵՐՈՒՆ ՄԷՋ

Դաւիթ իր սիրտին մէջ ըսաւ. «Վերջապէս օր մը Սաւուղի ձեռքով պիտի կորսուիմ. ինծի համար ոչինչ աւելի լաւ է՝ քան Փղշտացիներուն երկիրը ¹արտորալով խոյս տալ, որպէսզի Սաւուղ ինձմէ յոյսը կտրէ, ու զիս անգա՛մ մըն ալ Իսրայէլի ամբողջ հողամասին մէջ չփնտռէ. այսպէս՝ անոր ձեռքէն կը ճողոպրիմ»։

Ուստի Դաւիթ կանգնեցաւ, եւ իրեն հետ եղող վեց հարիւր մարդոցմով գնաց Գէթի թագաւորին՝ Մաովքի որդիին Անքուսի քով։

Դաւիթ Անքուսի քով՝ Գէթի մէջ բնակեցաւ, ինք եւ իր մարդիկը, իւրաքանչիւրը՝ իր ընտանիքով, Դաւիթ ալ իր երկու կիներով, Յեզրայելացի Աքինոամի ու Կարմելացի Նաբաղի կնոջ՝ Աբիգեայի հետ։

Երբ Սաւուղի իմացուցին թէ Դաւիթ Գէթ փախեր է, անգա՛մ մըն ալ զայն չփնտռեց։

Դաւիթ Անքուսի ըսաւ. «Կ’աղերսե՛մ, եթէ քու ²առջեւդ շնորհք գտայ, դաշտավայրի քաղաքներէն մէկուն մէջ ինծի տեղ մը թող տրուի, որպէսզի հոն բնակիմ. արդարեւ քու ծառադ ինչո՞ւ քեզի հետ բնակի թագաւորանիստ քաղաքին մէջ»։

Այդ օրը Անքուս Սիկելակը տուաւ անոր. այս պատճառով Սիկելակ մինչեւ այսօր Յուդայի թագաւորներուն եղաւ։

Փղշտացիներու երկրին մէջ Դաւիթի բնակած օրերուն թիւը՝ մէկ տարի ու չորս ամիս եղաւ։

Դաւիթ եւ անոր մարդիկը բարձրացան, ու Գեսուրացիներուն, ³Գազերացիներուն եւ Ամաղեկացիներուն վրայ յարձակեցան, քանի որ անոնք հին դարերէն ի վեր այդ երկրին մէջ կը բնակէին, ⁴Սուրէն մինչեւ Եգիպտոսի երկիրը։

Դաւիթ այդ երկիրը զարկաւ. ո՛չ այր մարդ ողջ պահեց, ո՛չ ալ կին, իսկ ոչխարները, արջառները, էշերը, ուղտերն ու հանդերձները գրաւեց։ Յետոյ վերադարձաւ եւ Անքուսի եկաւ։

Անքուս ըսաւ. «Այսօր ո՞ր կողմը յարձակեցաք»։ Դաւիթ ըսաւ. «Յուդայի հարաւային կողմը, Յերամելացիներուն հարաւային կողմն ու Կենեցիներուն հարաւային կողմը»։

Դաւիթ ո՛չ մէկ մարդ կամ կին ողջ պահեց, որ Գէթ լուր չբերէ. արդարեւ ըսաւ. «Մեր մասին թող չպատմեն եւ չըսեն թէ Դաւիթ այսպէս ըրաւ»։ Անոր սովորութիւնը ա՛յս էր, ⁵քանի Փղշտացիներու դաշտավայրին մէջ կը բնակէր՝՝։

Անքուս Դաւիթի հաւատալով՝ ըսաւ. «Այս մարդը իր ժողովուրդին՝ Իսրայէլի մէջ ինքզինք յոյժ ⁶ատելի ըրաւ. ուստի յաւիտեան իմ ծառաս պիտի ըլլայ»։