1 Samuel 29

Ruth  «  1 Samuel 28  ‹  1 Samuel 29  ›  1 Samuel 30  »  2 Samuel

ԴԱՒԻԹ ԿԸ ՄԵՐԺՈՒԻ ՓՂՇՏԱՑԻՆԵՐԷՆ

Փղշտացիները իրենց բոլոր բանակները Ափէկի մէջ հաւաքեցին, իսկ Իսրայելացիները Յեզրայէլի մէջ եղող ակին քով բանակեցան։

Փղշտացիներուն նախարարները իրենց հարիւրաւորներով ու հազարաւորներով անցան. Դաւիթ եւ իր մարդիկն ալ անոնց ետեւէն՝ Անքուսի հետ անցան։

Փղշտացիներուն իշխանաւորները ըսին. «Այս Եբրայեցիները ի՞նչ կ’ընեն հոս»։ Անքուս Փղշտացիներու իշխանաւորներուն ըսաւ. «Ասիկա Դաւիթը չէ՞, Իսրայէլի թագաւորին՝ Սաւուղի ծառան, որ այսչափ օրերէ կամ մանաւանդ այսչափ տարիներէ ի վեր իմ քովս է. ինծի ¹եկած օրէն մինչեւ այսօր՝ անոր վրայ ²ոչինչ գտայ»։

Փղշտացիներուն իշխանաւորները անոր դէմ զայրացան։ Փղշտացիներուն իշխանաւորները անոր ըսին. «Այդ մարդը ³վանէ՛, որպէսզի վերադառնայ իր տեղը՝ ուր զայն նշանակեցիր։ Մեզի հետ թող ⁴չգայ՝ պատերազմելու համար, որ պատերազմին մէջ մեզի ⁵թշնամի չըլլայ. արդարեւ ի՞նչպէս հաճելի պիտի ըլլայ իր տիրոջ հետ, եթէ ոչ այս մարդոց գլուխներով։

Ասիկա այն Դաւիթը չէ՞, որուն մասին պարողները ⁶խմբերգելով կ’ըսէին. “Սաւուղ իր հազարաւորները զարկաւ, Եւ Դաւիթ՝ իր բիւրաւորները”»։

Անքուս Դաւիթը կանչեց ու անոր ըսաւ. «Տէրը կ’ապրի՛. դուն ուղիղ մարդ մըն ես, եւ ⁷ինծի հաճելի կը թուի՝՝ որ բանակին մէջ մտնես ու ելլես ինծի հետ, որովհետեւ ինծի եկած օրէդ մինչեւ այսօր՝ քու վրադ չարութիւն մը չգտայ։ Բայց դուն նախարարներուն ⁸հաճելի չես.

ուստի հիմա վերադարձի՛ր եւ խաղաղութեա՛մբ գնա, որպէսզի Փղշտացիներու նախարարներուն ⁹անհաճոյ ոչինչ ընես»։

Դաւիթ Անքուսի ըսաւ. «Բայց ես ի՞նչ ըրի. ծառայիդ վրայ ի՞նչ յանցանք գտար քու առջեւդ ¹⁰կայնած օրէս մինչեւ այսօր, որ չերթամ եւ իմ տիրոջս՝ թագաւորին թշնամիներուն դէմ չպատերազմիմ»։

Անքուս Դաւիթի պատասխանեց. «Գիտեմ, դուն ¹¹ինծի հաճելի՝՝ ես՝ Աստուծոյ հրեշտակի մը պէս. բայց Փղշտացիներուն իշխանաւորները ըսին. “Անիկա մեզի հետ թող չբարձրանայ՝ պատերազմելու համար”։

Ուրեմն հիմա՝ կանո՛ւխ ելիր առտուն, նաեւ տիրոջդ ծառաները՝ որոնք քեզի հետ եկան. առտուն՝ կանո՛ւխ ելէք, ու երբ լուսնայ՝ գացէ՛ք»։

Դաւիթ եւ իր մարդիկը կանուխ ելան՝ առտուն երթալու համար, որպէսզի Փղշտացիներուն երկիրը վերադառնան. իսկ Փղշտացիները Յեզրայէլ բարձրացան։