2 Chronicles 1
1 Chronicles « 1 Chronicles 29 ‹ 2 Chronicles 1 › 2 Chronicles 2 » Ezra
ՍՈՂՈՄՈՆ ԿԸ ԽՆԴՐԷ ԻՄԱՍՏՈՒԹԻՒՆ (Գ. Թագ. 3. 1-15)
1Դաւիթի որդին՝ Սողոմոն իր թագաւորութեան մէջ ուժովցաւ. 1Տէրը՝ իր Աստուածը իրեն հետ էր, ու զինք չափազանց մեծցուց։
2Սողոմոն խօսեցաւ ամբողջ Իսրայէլի.— հազարապետներուն, հարիւրապետներուն, դատաւորներուն, եւ ամբողջ Իսրայէլի բոլոր իշխաններուն, այսինքն՝ 2նահապետներուն։
3Ապա Սողոմոն ամբողջ համախմբումին հետ Գաբաւոնի բարձր տեղը գնաց, որովհետեւ հոն էր Աստուծոյ Հանդիպումի վրանը, որ Տէրոջ ծառան՝ Մովսէս անապատին մէջ շիներ էր։
4(Սակայն Դաւիթ Աստուծոյ տապանակը Կարիաթարիմէն իր պատրաստած տեղը բարձրացուցեր էր, քանի որ Երուսաղէմի մէջ վրան մը լարած էր անոր համար։)
5Իսկ Ովրեան Ուրիի որդիին՝ Բեսելիէլի շինած պղինձէ զոհասեղանը հոն էր, Տէրոջ խորանին առջեւ. Սողոմոն ու համախմբումը 3զայն փնտռեցին՝՝։
6Սողոմոն հոն՝ Տէրոջ առջեւ՝ Հանդիպումի վրանին պղինձէ զոհասեղանին 4քով բարձրացաւ՝՝, եւ անոր վրայ հազար ողջակէզ զոհեց։
7Այդ գիշերը Աստուած Սողոմոնի երեւցաւ ու ըսաւ. «5Բա՛ն մը խնդրէ՝ որ քեզի տամ՝՝»։
8Սողոմոն Աստուծոյ ըսաւ. «Դուն իմ հօրս՝ Դաւիթի հետ մեծ կարեկցութեամբ վարուեցար, եւ զիս անոր տեղ թագաւոր նշանակեցիր։
9Հիմա, ո՛վ Տէր Աստուած, իմ հօրս՝ Դաւիթի ըրած խոստումդ թող հաստատուի, քանի դուն զիս երկրի 6հողին չափ շատ ժողովուրդի վրայ թագաւոր նշանակեցիր։
10Հիմա ինծի իմաստութի՛ւն ու գիտութի՛ւն տուր, որպէսզի այս ժողովուրդին առջեւ ելլեմ եւ մտնեմ. արդարեւ այս մեծ ժողովուրդդ ո՞վ կրնայ դատել»։
11Աստուած ալ Սողոմոնի ըսաւ. «Քանի ասիկա 7փափաքեցար, ու հարստութիւն, գոյք, փառք, եւ 8ոսոխներուդ կեանքը չխնդրեցիր, ու երկար օրեր ալ չխնդրեցիր, հապա քեզի համար իմաստութիւն եւ գիտութիւն խնդրեցիր, որպէսզի դատես իմ ժողովուրդս՝ որուն վրայ քեզ թագաւոր նշանակեցի,
12քեզի իմաստութիւն ու գիտութիւն պիտի տրուին. հարստութիւն, գոյք եւ փառք ալ պիտի տամ քեզի, այնպէս որ քեզմէ առաջ եղած թագաւորներէն ո՛չ մէկը նմանը ունեցած է, ու քեզմէ ետք եկողներն ալ նմանը պիտի չունենան»։
13Սողոմոն Գաբաւոնի բարձր տեղէն՝ Հանդիպումի վրանին առջեւէն Երուսաղէմ վերադարձաւ, եւ Իսրայէլի վրայ թագաւորեց։
ՍՈՂՈՄՈՆԻ ԶՕՐՈՒԹԻՒՆԸ ԵՒ ՀԱՐՍՏՈՒԹԻՒՆԸ (Գ. Թագ. 10. 26-29)
14Սողոմոն կառքեր ու ձիաւորներ հաւաքեց. ան հազար չորս հարիւր կառք եւ տասներկու հազար ձիաւոր ունէր։ Զանոնք կառքերու քաղաքներուն մէջ ու Երուսաղէմ՝ թագաւորին քով տեղաւորեց։
15Թագաւորը Երուսաղէմի մէջ արծաթը եւ ոսկին քարերու պէս հասարակ բան մը ըրաւ, ու մայրիի փայտը դաշտագետինի մէջ եղող ժանտաթզենիներուն չափ առատ ըրաւ։
16Սողոմոնի ձիերը Եգիպտոսէն կու գային. թագաւորին վաճառականներուն կարաւանը որոշ գինով մը ձիերու երամակներ կը գնէր։
17Եգիպտոսէն կառք մը 9կ’արտածուէր վեց հարիւր սիկղ արծաթի, իսկ ձի մը՝ հարիւր յիսուն սիկղ արծաթի. Քետացիներու բոլոր թագաւորներուն համար, եւ Սուրիայի թագաւորներուն համար ալ՝ անոնց ձեռքով այդպէս կ’արտածուէին։