2 Chronicles 3

1 Chronicles  «  2 Chronicles 2  ‹  2 Chronicles 3  ›  2 Chronicles 4  »  Ezra

Սողոմոն սկսաւ Տէրոջ տունը կառուցանել Երուսաղէմի մէջ, Մորիա լերան վրայ, ուր Տէրը անոր հօր՝ Դաւիթի երեւցեր էր, այն տեղը՝ որ Դաւիթ Յեբուսացի Ոռնայի կալին մէջ պատրաստեր էր։

Իր թագաւորութեան չորրորդ տարին, երկրորդ ամսուան երկրորդ օրը սկսաւ զայն կառուցանել։

Ահա՛ւասիկ Աստուծոյ տունը կառուցանելու համար Սողոմոնի դրած հիմը.— երկայնքը վաթսուն կանգուն էր՝ առաջուան կանգունին չափով, իսկ լայնքը՝ քսան կանգուն։

Ճակատի ներքնագաւիթին երկայնքը քսան կանգուն էր՝ տան լայնքով, ու բարձրութիւնը՝ հարիւր քսան կանգուն. զայն ներսէն մաքուր ոսկիով պատեց։

Մեծ տունը եղեւնափայտով ծածկեց, զայն մաքուր ոսկիով պատեց, եւ անոր վրայ արմաւենիներ ու շղթաներ ¹փորագրեց։

Շքեղութեան համար տունը պատուական քարերով զարդարեց. ոսկին՝ Փարուիմի ոսկի էր։

Տան գերանները, սեմերը, պատերն ու դռները ոսկիով պատեց. պատերուն վրայ քերովբէներ քանդակեց։

Սրբութիւններու սրբութեան տունը շինեց. անոր երկայնքը քսան կանգուն էր՝ տան լայնքով, ու լայնքը՝ քսան կանգուն. զայն վեց հարիւր տաղանդի չափ մաքուր ոսկիով պատեց։

Գամերուն կշիռը յիսուն սիկղ ոսկի էր։ Վերնատունները ոսկիով պատեց։

Սրբութիւններու սրբութեան տան մէջ երկու քանդակուած քերովբէ շինեց, ու զանոնք ոսկիով պատեց։

Քերովբէներուն թեւերը քսան կանգուն երկայնք ունէին։ Մէկ թեւը հինգ կանգուն էր, եւ տան պատին կը դպչէր. միւս թեւն ալ հինգ կանգուն էր, ու միւս քերովբէին թեւին կը դպչէր։

Միւս քերովբէին ալ մէկ թեւը հինգ կանգուն էր եւ տան պատին կը դպչէր, ու միւս թեւը հինգ կանգուն էր եւ միւս քերովբէին թեւին կը յարէր։

Այս քերովբէներուն տարածուած թեւերուն երկայնքը քսան կանգուն էր։ Անոնք իրենց ոտքերուն վրայ կայնած էին, եւ անոնց երեսը դէպի ²տունը կը նայէր։

Վարագոյրը կապուտակէ, ծիրանիէ, բոսոր կարմիրէ ու բեհեզէ շինեց, եւ անոր վրայ քերովբէներ ³գործեց։

ԵՐԿՈՒ ՊՂԻՆՁԷ ՍԻՒՆԵՐԸ (Գ. Թագ. 7. 15-22)

Տան առջեւ երեսունհինգ կանգուն ⁴բարձրութեամբ երկու սիւն շինեց. անոնց գագաթը եղող խոյակը հինգ կանգուն էր։

⁵Դաբիրին մէջի շղթաներուն պէս շղթաներ շինեց, ու սիւներուն գագաթը դրաւ. նաեւ հարիւր նուռ շինեց ու շղթաներուն ⁶անցուց։

Սիւները տաճարին առջեւ կանգնեցուց, մէկը աջ կողմէն եւ միւսը ձախ կողմէն. աջ կողմը եղողին անունը Յաքին կոչեց, ու ձախ կողմը եղողին անունը՝ Բոոզ։