2 Chronicles 24

1 Chronicles  «  2 Chronicles 23  ‹  2 Chronicles 24  ›  2 Chronicles 25  »  Ezra

ՅՈՎԱՍ ՅՈՒԴԱՅԻ ԹԱԳԱՒՈՐ (Դ. Թագ. 12. 1-16)

Յովաս եօթը տարեկան էր՝ երբ թագաւոր եղաւ, ու Երուսաղէմի մէջ քառասուն տարի թագաւորոեց։ Իր մօր անունը Սաբիա էր՝ Բերսաբէ քաղաքէն։

Յովաս ըրաւ ինչ որ Տէրոջ ¹առջեւ ուղիղ է՝ Յովիադա քահանային բոլոր օրերուն մէջ։

Յովիադա իրեն երկու կին առնել տուաւ, ու որդիներ եւ աղջիկներ ծնաւ։

Ասկէ ետք Յովաս ²փափաքեցաւ Տէրոջ տունը վերականգնել։

Քահանաներն ու Ղեւտացիները հաւաքեց, եւ անոնց ըսաւ. «Դո՛ւրս ելէք՝ Յուդայի քաղաքները, ու ձեր Աստուծոյն տունը նորոգելու համար՝ ամէն տարի դրա՛մ հաւաքեցէք ամբողջ Իսրայէլէն. այս գործը շտապելո՛վ կատարեցէք»։ Բայց Ղեւտացիները չշտապեցին։

Ուստի թագաւորը կանչեց Յովիադան՝ գլխաւորը, եւ անոր ըսաւ. «Ինչո՞ւ Ղեւտացիներէն չպահանջեցիր, որ Յուդայէն ու Երուսաղէմէն բերեն Տէրոջ ծառային՝ Մովսէսի դրած հարկը Իսրայէլի համախմբումին վրայ, Վկայութեան վրանին համար»։

(Արդարեւ անօրէն Գոթողիան եւ անոր որդիները Աստուծոյ տունը քանդեր էին, ու Տէրոջ տան բոլոր ³սուրբ բաները՝՝ Բահաղներուն նուիրեր էին։)

Ուստի թագաւորը հրամայեց որ սնտուկ մը շինեն եւ զայն Տէրոջ տան դրան դուրսի կողմը դնեն։

Ապա Յուդայի մէջ ու Երուսաղէմի մէջ ⁴ծանուցանել տուին, որ Տէրոջ բերեն Աստուծոյ ծառային՝ Մովսէսի դրած հարկը Իսրայէլի վրայ, անապատին մէջ։

Բոլոր իշխանաւորները եւ ամբողջ ժողովուրդը ուրախացան, ու բերին սնտուկին մէջ ձգեցին իրենց դրամը, մինչեւ որ նորոգութիւնը աւարտեցին։

Երբ ատենը կ’ըլլար որ սնտուկը թագաւորին վերատեսուչներուն տարուէր Ղեւտացիներուն ձեռքով, որովհետեւ անոնք կը տեսնէին թէ դրամը շատցեր է, թագաւորին ատենադպիրն ու աւագ քահանային վերատեսուչը կու գային սնտուկը պարպելու. ապա զայն բերելով իր տեղը կը վերադարձնէին։ Ամէն օր այսպէս ընելով՝ առատ դրամ ժողվեցին։

Թագաւորը եւ Յովիադա զայն Տէրոջ տան ծառայութեան գործակատարներուն կու տային. անոնք ալ քարակոփներ ու հիւսներ կը վարձէին՝ Տէրոջ տունը վերականգնելու համար, նաեւ երկաթագործներ եւ պղնձագործներ՝ Տէրոջ տունը նորոգելու համար։

Գործաւորները կ’աշխատէին, ու նորոգութեան գործը անոնց ձեռքով կատարուեցաւ։ Այսպէս՝ Աստուծոյ տունը ⁵վերականգնեցին եւ զայն զօրացուցին։

Երբ նորոգութիւնը աւարտեցին, մնացած դրամը թագաւորին ու Յովիադայի առջեւ բերին, եւ անով Տէրոջ տան համար անօթներ շինուեցան.— պաշտօնին ու ողջակէզներուն համար անօթներ, խնկամաններ, եւ ուրիշ ոսկիէ ու արծաթէ անօթներ։ Յովիադայի բոլոր օրերը Տէրոջ տան մէջ շարունակ ողջակէզներ կը մատուցանէին։

Յովիադա մեռաւ, ծերացած եւ իր օրերէն կշտացած. մեռած ատենը հարիւր երեսուն տարեկան էր։

Զինք Դաւիթի քաղաքին մէջ՝ թագաւորներուն հետ թաղեցին, քանի որ ան Իսրայէլի մէջ բարիք ըրեր էր Աստուծոյ եւ անոր տան համար։

ՅՈՎԻԱԴԱՅԻ ԿԱՐԳԱԴՐՈՒԹԻՒՆԸ ԿԸ ՓՈԽՈՒԻ

Յովիադայի մեռնելէն ետք՝ Յուդայի իշխանաւորները եկան ու թագաւորին երկրպագեցին. այն ատեն թագաւորը անոնց մտիկ ըրաւ։

Տէրոջ՝ իրենց հայրերուն Աստուծոյն տունը լքեցին, եւ աստարովթներն ու կուռքերը պաշտեցին. ուստի Յուդայի ու Երուսաղէմի վրայ զայրոյթ եղաւ իրենց այս յանցանքին համար։

Արդարեւ անոնց մարգարէներ ղրկեց, որպէսզի զանոնք Տէրոջ վերադարձնեն. անոնց վկայեցին, բայց անոնք չունկնդրեցին։

Աստուծոյ Հոգին Յովիադա քահանային ⁶որդիին՝ Զաքարիայի վրայ հանգչեցաւ՝՝. ան ժողովուրդին մէջ բարձր տեղ մը կայնեցաւ եւ անոնց ըսաւ. «Աստուած սա՛ կը յայտարարէ. “Դուք ինչո՞ւ Տէրոջ պատուիրանները կ’անտեսէք. բնա՛ւ պիտի չյաջողիք։ Քանի դուք Տէրը լքեցիք, ան ալ ձեզ պիտի լքէ”»։

Անոնք ալ իր դէմ դաւադրեցին, ու զինք թագաւորին պատուէրով Տէրոջ տան գաւիթին մէջ ⁷քարկոծեցին։

Յովաս թագաւորը չյիշեց անոր հօր՝ Յովիադայի կարեկցութեամբ վարուիլը իրեն հետ, եւ անոր որդին մեռցուց. ան ալ մեռած ատենը ըսաւ. «Տէրը թող տեսնէ ու ⁸դատէ»։

ՅՈՎԱՍ ԹԱԳԱՒՈՐԻՆ ՎԱԽՃԱՆԸ

Տարուան վախճանին, Սուրիայի զօրագունդը ⁹Յովասի դէմ բարձրանալով՝ Յուդայի ու Երուսաղէմի վրայ ¹⁰յարձակեցաւ. ժողովուրդին մէջէն բոլոր ¹¹իշխանաւորները կոտորեցին, եւ անոնց ամբողջ աւարը Դամասկոսի թագաւորին ղրկեցին։

Ասորիներուն զօրագունդը փոքրաթիւ մարդոցմով եկաւ, բայց Տէրը յոյժ բազմաթիւ զօրագունդ մը անոնց ձեռքը մատնեց, քանի որ անոնք Տէրը՝ իրենց հայրերուն Աստուածը լքած էին։ Այսպէս՝ Ասորիները Աստուծոյ դատավճիռը գործադրեցին Յովասի վրայ։

Երբ անոնք իր քովէն գացին՝ մեծ հիւանդութիւններու մէջ ձգելով զինք, անոր ծառաները իրեն դէմ դաւադրեցին՝ Յովիադա քահանային որդիներուն արիւնին համար. զայն իր մահիճին մէջ սպաննեցին, ու մեռաւ։ Զայն Դաւիթի քաղաքին մէջ թաղեցին. բայց թագաւորներու գերեզմաններուն մէջ չթաղեցին։

Ահա՛ւասիկ անոր դէմ դաւադրողները.— ամմոնացի կնոջ՝ Սամէթի որդին՝ Զաբադ, ու մովաբացի կնոջ՝ Սամարիթի որդին՝ Յովզաբադ։

Անոր որդիներուն մասին, իր քով հաւաքուած հարկին շատութեան մասին եւ Աստուծոյ տան ¹²նորոգութեան մասին՝ ահա՛ Թագաւորներու գիրքին Յիշատակարանին մէջ գրուած է։ Անոր տեղ իր որդին՝ Ամասիա թագաւոր եղաւ։