2 Chronicles 31

1 Chronicles  «  2 Chronicles 30  ‹  2 Chronicles 31  ›  2 Chronicles 32  »  Ezra

ԵԶԵԿԻԱ ԿԸ ՎԵՐԱԿԱԶՄԷ ԿՐՕՆԱԿԱՆ ԿԵԱՆՔԸ

Երբ այս բոլորը աւարտեցաւ, հոն գտնուող բոլոր Իսրայելացիները Յուդայի քաղաքները ¹գացին, եւ ամբողջ Յուդայի, Բենիամինի, Եփրեմի ու Մանասէի մէջ եղող արձանները կոտրտեցին, աստարովթները կտրեցին եւ բարձր տեղերն ու բագինները փլցուցին, մինչեւ որ զանոնք բոլորովին սպառեցին։ Յետոյ Իսրայէլի որդիները իրենց քաղաքները վերադարձան, իւրաքանչիւրը՝ իր կալուածը։

Եզեկիա քահանաներուն ու Ղեւտացիներուն դասերը ²հաստատեց՝ իրենց բաժանմունքներուն համեմատ,— թէ՛ քահանաներէն եւ թէ Ղեւտացիներէն իւրաքանչիւրը՝ իր պաշտօնին համեմատ,— ողջակէզներու եւ խաղաղութեան զոհերու համար, ու Տէրոջ ³գաւիթներուն դռներուն մէջ պաշտօն կատարելու, շնորհակալ ըլլալու եւ գովաբանելու համար։

Նաեւ իր ինչքէն առնուելիք թագաւորին բաժինը որոշեց՝ ողջակէզներուն համար, այսինքն՝ առտուան եւ իրիկուան ողջակէզներուն համար, ու Շաբաթ օրերու, ամսագլուխներու եւ հանդիսաւոր տօներու ողջակէզներուն համար, ինչպէս գրուած է Տէրոջ Օրէնքի գիրքին մէջ։

Երուսաղէմ բնակող ժողովուրդին հրամայեց որ քահանաներուն ու Ղեւտացիներուն բաժինը տան, որպէսզի անոնք Տէրոջ Օրէնքը կատարելու ⁴նուիրուին։

Երբ այս հրամանը ⁵հրապարակուեցաւ, Իսրայէլի որդիները ցորենին, քաղցուիին, իւղին, մեղրին, եւ արտերու բոլոր բերքերուն ⁶երախայրիքը առատութեամբ բերին. բոլորին տասանորդը առատապէս բերին։

Յուդայի քաղաքները բնակող Իսրայէլի ու Յուդայի որդիները՝ իրենք ալ բերին եւ դիզեցին արջառներուն ու ոչխարներուն տասանորդները, եւ Տէրոջ՝ իրենց Աստուծոյն ⁷ընծայուած սուրբ բաներուն տասանորդները։

Անոնք երրորդ ամսուան մէջ սկսան ⁸դիզել, ու եօթներորդ ամսուան մէջ աւարտեցին։

Երբ Եզեկիա եւ իշխանաւորները եկան ու տեսան այդ դէզերը, Տէրը եւ անոր ժողովուրդը՝ Իսրայէլը օրհնեցին։

Եզեկիա այդ դէզերուն մասին հարցուց քահանաներուն ու Ղեւտացիներուն։

Սադովկի տունէն եղող աւագ քահանան՝ Ազարիա անոր պատասխանեց. «Երբ սկսան բարձրացնելիք ընծաները Տէրոջ տունը բերել, կերանք, կշտացանք, ու շատ աւելցաւ, որովհետեւ Տէրը իր ժողովուրդը օրհնեց. աւելցածը այս մթերքն է»։

Եզեկիա հրամայեց որ Տէրոջ տան մէջ ⁹մթերանոցներ պատրաստեն. ուստի զանոնք պատրաստեցին,

եւ բարձրացնելիք ընծաները, տասանորդներն ու ¹⁰սուրբ բաները՝՝ հաւատարմութեամբ ներս տարին։ Անոնց ¹¹վերակացուն Ղեւտացի Քոնոնիա էր, եւ անոր եղբայրը՝ Սեմէի իր ¹²փոխանորդն էր։

Յեքիէլ, Ազազիա, Նահաթ, Ասայէլ, Յերիմովթ, Յովզաբադ, Եղիէլ, Յեսմաքիա, Մահաթ ու Բանեա վերատեսուչներ էին՝ Քոնոնիայի եւ անոր եղբօր՝ Սեմէիի ձեռքին տակ, Եզեկիա թագաւորին ու Տէրոջ տան առաջնորդին՝ Ազարիայի հրամանով։

Արեւելեան կողմին դռնապանը, Ղեւտացի Յեմնայի որդին՝ Կովրէ, Աստուծոյ բերուած յօժարակամ ընծաներուն վրայ նշանակուած էր՝ Տէրոջ բարձրացնելիք ընծաներն ու ամենասուրբ բաները ¹³բաժնելու համար։

Քահանաներու քաղաքներուն մէջ՝ իր հրամանին տակ ունէր Եդենը, Մինիամինը, Յեսուն, Սեմայիան, Ամարիան եւ Սեքենիան, որպէսզի իրենց եղբայրներուն՝ մեծին ու պզտիկին՝ հաւատարմութեամբ բաժնեն ընծաները, իրենց դասերուն համեմատ.—

ազգահամարին մէջ արձանագրուած երեք տարեկանէն վեր եղող բոլոր արուներուն, որոնք ամէն ¹⁴օր Տէրոջ տունը կը մտնէին՝ իրենց պաշտօններուն եւ դասերուն համեմատ իրենց ծառայութիւնը կատարելու.

նաեւ ազգահամարին մէջ արձանագրուած քահանաներուն՝ իրենց նահապետութիւններուն համեմատ, եւ քսան տարեկանէն վեր եղող Ղեւտացիներուն՝ իրենց պաշտօններուն ու դասերուն համեմատ.

նաեւ ազգահամարին մէջ արձանագրուած անոնց բոլոր մանուկներուն, կիներուն, որդիներուն եւ աղջիկներուն, այսինքն՝ անոնց ամբողջ համախմբումին, քանի հաւատարմութեամբ կը ¹⁵սրբանային։

Իսկ անոնց քաղաքներուն արուարձաններուն արտերուն մէջ եղող Ահարոնին որդիներուն՝ քահանաներուն համար, ամէն քաղաքի մէջ՝ իրենց անուններով որոշուած մարդիկ կային, որոնք քահանաներուն բոլոր արուներուն ու Ղեւտացիներու ազգահամարին մէջ բոլոր արձանագրուածներուն բաժիններ կու տային։

Եզեկիա այսպէս վարուեցաւ ամբողջ Յուդայի մէջ, եւ ըրաւ ինչ որ Տէրոջ՝ իր Աստուծոյն առջեւ լաւ, ուղիղ ու ճշմարիտ է։

Իր ¹⁶ձեռնարկած բոլոր գործերը — թէ՛ Աստուծոյ տան ծառայութեան համար, եւ թէ Օրէնքին ու պատուիրաններուն համար — կատարեց իր ամբողջ սիրտով իր Աստուածը փնտռելով, ու յաջողեցաւ։