2 Chronicles 34

1 Chronicles  «  2 Chronicles 33  ‹  2 Chronicles 34  ›  2 Chronicles 35  »  Ezra

ՅՈՒԴԱՅԻ ՅՈՎՍԻԱ ԹԱԳԱՒՈՐԸ (Դ. Թագ. 22. 1-2)

Յովսիա ութ տարեկան էր՝ երբ թագաւոր եղաւ, ու Երուսաղէմի մէջ երեսունմէկ տարի թագաւորեց։

Ան ըրաւ ինչ որ Տէրոջ ¹առջեւ ուղիղ է. իր հօր՝ Դաւիթի ճամբաներէն ընթացաւ, եւ անոնցմէ դէպի աջ կամ ձախ չշեղեցաւ։

ՅՈՎՍԻԱ ԿԸ ՀԵՌԱՑՆԷ ԿՌԱՊԱՇՏՈՒԹԻՒՆԸ (Դ. Թագ. 23. 4-20)

Իր թագաւորութեան ութերորդ տարին, երբ դեռ ինք պատանի էր, սկսաւ իր հօր՝ Դաւիթի Աստուածը փնտռել, եւ տասներկրորդ տարին՝ սկսաւ Յուդան ու Երուսաղէմը մաքրել բարձր տեղերէն, աստարովթներէն, եւ քանդակուած ու ²ձուլածոյ կուռքերէն՝՝։

Բահաղներու բագինները անոր առջեւ փլցուցին, եւ ինք արեւի սիւնարձանները կոտրտեց, որոնք բարձրը՝ անոնց վրայ էին։ Աստարովթներն ու քանդակուած եւ ձուլածոյ կուռքերը կոտրտեց ու մանրեց, եւ անոնց զոհ մատուցանողներուն գերեզմաններուն վրայ ցանեց։

Քուրմերուն ոսկորները անոնց բագիններուն վրայ այրեց, եւ Յուդան ու Երուսաղէմը մաքրեց։

Մանասէի, Եփրեմի եւ Շմաւոնի քաղաքներուն մէջ, մինչեւ Նեփթաղիմ եւ անոնց շրջակայ ³աւերակներուն մէջ՝՝,

բագիններն ու աստարովթները փլցուց, ⁴քանդակուած կուռքերը՝՝ մանրեց ու փշրեց, եւ Իսրայէլի ամբողջ երկրին մէջ եղող բոլոր արեւի սիւնարձանները կոտրտեց. ապա Երուսաղէմ վերադարձաւ։

ՕՐԷՆՔԻՆ ԳԻՐՔԸ ԿԸ ԳՏՆՈՒԻ (Դ. Թագ. 22. 3-20)

Իր թագաւորութեան տասնութերորդ տարին, երբ երկիրն ու իր տունը մաքրեց, Եսելիայի որդին՝ Սափանը, քաղաքապետը՝ Մաասիան, եւ Յովաքազի որդին՝ Յովաքը — ⁵դիւանադպիրը — ղրկեց, որպէսզի Տէրոջ՝ իր Աստուծոյն տունը նորոգեն։

Անոնք Քեղկիա քահանայապետին եկան, Աստուծոյ տունը բերուած դրամը ⁶առին,— որ Ղեւտացիները՝ ⁷դրան պահապանները՝ Մանասէի ու Եփրեմի ձեռքէն, Իսրայէլի ամբողջ մնացորդէն, ամբողջ Յուդայէն եւ Բենիամինէն, ու Երուսաղէմի բնակիչներէն ժողվեր էին,—

եւ գործակատարներուն — Տէրոջ տան վերատեսուչներուն — ձեռքը յանձնեցին. անոնք ալ Տէրոջ տան մէջ աշխատող գործաւորներուն տուին զայն՝ տունը վերաշինելու եւ նորոգելու համար։

Այսինքն հիւսներուն ու կառուցանողներուն տուին, որպէսզի կոփուած քարեր եւ փայտեր գնեն՝ ագոյցներու համար ու Յուդայի թագաւորներուն քանդած տուները ⁸կերտելու համար։

Այդ մարդիկը գործը հաւատարմութեամբ կը կատարէին։ Անոնց վերատեսչութեան համար՝ իբր վերակացու նշանակուած էին Մերարիի որդիներէն՝ Ղեւտացի Յեթ եւ Աբդիա, Կահաթեաններու որդիներէն՝ Զաքարիա ու Մեսուղամ, նաեւ Ղեւտացիներէն բոլոր անոնք՝ որ ⁹վարպետ նուագող՝՝ էին։

Բեռնակիրներուն եւ ամէն տեսակ ¹⁰գործ կատարողներուն վերակացուներն էին. նաեւ ատենադպիրները, ոստիկաններն ու դռնապանները Ղեւտացիներէն էին։

Երբ Տէրոջ տունը բերուած դրամը դուրս կը հանէին, Քեղկիա քահանան Մովսէսի ¹¹միջոցով տրուած Տէրոջ Օրէնքին գիրքը գտաւ։

Քեղկիա Սափան ատենադպիրին ¹²ըսաւ. «Տէրոջ տան մէջ Օրէնքին գիրքը գտայ»։ Քեղկիա այդ գիրքը Սափանի տուաւ։

Սափան գիրքը թագաւորին տարաւ, ու ¹³թագաւորը տեղեկացնելով՝՝ ըսաւ. «Քու ծառաներդ իրենց յանձնուած ամբողջ գործը կը կատարեն։

Տէրոջ տան մէջ գտնուած դրամը ¹⁴հաւաքեցին, ու զայն վերատեսուչներուն ձեռքը եւ գործակատարներուն ձեռքը յանձնեցին»։

Յետոյ Սափան ատենադպիրը թագաւորին ¹⁵ըսաւ. «Քեղկիա քահանան ինծի գիրք մը տուաւ», եւ Սափան անոր մէջէն թագաւորին առջեւ կարդաց։

Երբ թագաւորը Օրէնքին խօսքերը լսեց, իր հագուստները պատռեց։

Յետոյ թագաւորը Քեղկիայի, Սափանի որդիին՝ Աքիկամի, Միքայի որդիին՝ Աբդոնի, Սափան ատենադպիրին ու թագաւորին ծառային՝ Ասայիայի պատուիրեց.

«Գացէ՛ք, ինծի համար, եւ Իսրայէլի ու Յուդայի ճողոպրածներուն համար Տէրոջ խորհո՛ւրդ հարցուցէք՝ այս գտնուած գիրքին խօսքերուն մասին։ Արդարեւ մեծ է Տէրոջ ցասումը՝ որ մեր վրայ թափուած է, որովհետեւ մեր հայրերը Տէրոջ խօսքը չպահեցին, եւ այս գիրքին մէջ բոլոր գրուածները չկատարեցին»։

Քեղկիա եւ թագաւորին մարդիկը գացին Ասրայի որդիին՝ Թեկուայի որդիին՝ Սեղղում հանդերձապետին կնոջ, Ողդա մարգարէուհիին։ Ան Երուսաղէմ կը բնակէր, ¹⁶Մասենայի մէջ։ Անոր հետ այս մասին խօսեցան։

Ան իրենց պատասխանեց. «Տէրը՝ Իսրայէլի Աստուածը սա՛ կը յայտարարէ. “Ձեզ ինծի ղրկող մարդուն ըսէ՛ք.

"Տէրը սա՛ կը յայտարարէ. «Ահա՛ ես այս տեղին եւ անոր բնակիչներուն վրայ չարիք պիտի բերեմ, այսինքն՝ այն բոլոր անէծքները, որոնք Յուդայի թագաւորին առջեւ կարդացուած գիրքին մէջ գրուած են։

Որովհետեւ զիս լքեցին եւ ուրիշ աստուածներու խունկ ծխեցին, որպէսզի իրենց ձեռքերուն բոլոր գործերով զիս գրգռեն. ուստի այս տեղին վրայ իմ ցասումս պիտի թափի ու պիտի չմարի»"։

Բայց Տէրոջ խորհուրդ հարցնելու համար ձեզ ղրկող Յուդայի թագաւորին սա՛ ըսէք. "Տէրը՝ Իսրայէլի Աստուածը սա՛ կը յայտարարէ լսած խօսքերուդ մասին.

«Քանի քու սիրտդ ¹⁷կակուղցաւ, եւ Աստուծոյ առջեւ խոնարհեցար, երբ այս տեղին դէմ ու անոր բնակիչներուն դէմ իր ըսած խօսքերը լսեցիր, եւ իմ առջեւս խոնարհեցար, հագուստներդ պատռեցիր ու իմ առջեւս լացիր, ե՛ս ալ լսեցի»,— կը պատգամէ Տէրը"։

Ահա՛ ես քեզ հայրերուդ քով պիտի ամփոփեմ, ու խաղաղութեամբ քու գերեզմանիդ մէջ պիտի ամփոփուիս։ Այս տեղին վրայ եւ անոր բնակիչներուն վրայ իմ բերելիք բոլոր չարիքներս քու աչքերդ պիտի չտեսնեն”»։ Անոնք ալ թագաւորին տեղեկացուցին։

ՅՈՎՍԻԱ Կ’ՈՒԽՏԷ ՏԷՐՈՋ ՀՆԱԶԱՆԴԻԼ (Դ. Թագ. 23. 1-3)

Թագաւորը մարդ ղրկեց, եւ Յուդայի ու Երուսաղէմի բոլոր երէցները հաւաքեց։

Թագաւորը Տէրոջ տունը բարձրացաւ, նաեւ Յուդայի բոլոր մարդիկն ու Երուսաղէմի բնակիչները.— քահանաները, Ղեւտացիները, եւ ամբողջ ժողովուրդը՝ մեծէն մինչեւ պզտիկը. անոնց ¹⁸առջեւ կարդաց Տէրոջ տան մէջ գտնուած Ուխտի գիրքին բոլոր խօսքերը։

Թագաւորը իր ¹⁹տեղը կայնեցաւ ու Տէրոջ առջեւ ուխտ ²⁰ըրաւ, որ Տէրոջ հետեւի՝ անոր պատուիրանները, վկայութիւններն ու կանոնները ամբողջ սիրտով եւ ամբողջ անձով պահելով, որպէսզի այդ գիրքին մէջ գրուած ուխտին խօսքերը գործադրէ։

Բոլոր Երուսաղէմ ու Բենիամինի մէջ ²¹գտնուողներուն հաւանիլ տուաւ՝՝. ուստի Երուսաղէմի բնակիչները Աստուծոյ — իրենց հայրերուն Աստուծոյն — ուխտին համաձայն վարուեցան։

Յովսիա Իսրայէլի որդիներուն բոլոր երկիրներէն հանեց բոլոր գարշութիւնները, ու բոլոր Իսրայէլի մէջ գտնուողները ²²ստիպեց որ Տէրը՝ իրենց Աստուածը պաշտեն։ Անոր կեանքին բոլոր օրերուն մէջ Տէրոջմէն՝ իրենց հայրերուն Աստուծմէն չհեռացան։