2 Chronicles 35

1 Chronicles  «  2 Chronicles 34  ‹  2 Chronicles 35  ›  2 Chronicles 36  »  Ezra

ՅՈՎՍԻԱ ԿԸ ՏՕՆԷ ԶԱՏԻԿԸ (Դ. Թագ. 23. 21-23)

Յովսիա Երուսաղէմի մէջ Տէրոջ Զատիկը կատարեց. զատիկը առաջին ամսուան տասնչորրորդ օրը մորթեցին։

Քահանաները իրենց պաշտօնին վրայ ¹նշանակեց, ու զանոնք ²քաջալերեց որ Տէրոջ տան ծառայութիւնը կատարեն։

Ամբողջ Իսրայէլի սորվեցնող ու Տէրոջ սրբացած Ղեւտացիներուն ըսաւ. «Սուրբ տապանակը Իսրայէլի թագաւորին, Դաւիթի որդիին՝ Սողոմոնի կառուցանած տո՛ւնը դրէք, որ ձեր ուսերուն վրայ բեռ չըլլայ. ու հիմա ծառայեցէ՛ք Տէրոջ՝ ձեր Աստուծոյն եւ անոր ժողովուրդին՝ Իսրայէլի։

Պատրաստուեցէ՛ք ձեր նահապետութիւններով՝ ձեր դասերուն համեմատ, Իսրայէլի թագաւորին՝ Դաւիթի գրածին համաձայն, եւ անոր որդիին՝ Սողոմոնի գրածին համաձայն։

Սրբարանի՛ն մէջ ³տեղաւորուեցէք, ձեր եղբայրներուն — ժողովուրդին որդիներուն — նահապետութիւններուն ազգատոհմերուն համեմատ, ու Ղեւտացիներուն նահապետութիւններուն դասաւորումին համեմատ։

Զատիկը մորթեցէ՛ք, դուք ձեզ սրբացուցէ՛ք, եւ զայն պատրաստեցէ՛ք ձեր եղբայրներուն համար, որպէսզի Տէրոջ Մովսէսի ⁴միջոցով ըսած խօսքին համաձայն կատարուի»։

Յովսիա ժողովուրդին որդիներուն — բոլոր հոն գտնուողներուն — հօտերէն գառ եւ այծի ձագ ⁵պարգեւեց՝ թիւով երեսուն հազար, բոլորն ալ զատիկի համար, նաեւ արջառներէն երեք հազար զուարակ. ասոնք թագաւորին ինչքէն էին։

Իր իշխանաւորներն ալ յօժարութեամբ պարգեւեցին ժողովուրդին, քահանաներուն ու Ղեւտացիներուն։ Աստուծոյ տան առաջնորդները՝ Քեղկիա, Զաքարիա եւ Յեքիէլ, զատիկի համար երկու հազար վեց հարիւր գառ ու երեք հարիւր արջառ տուին քահանաներուն։

Քոնոնիա եւ անոր եղբայրները՝ Սեմայիա ու Նաթանայէլ, նաեւ Ղեւտացիներուն պետերը՝ Ասաբիա, Յէիէլ եւ Յովզաբադ, զատիկի համար հինգ հազար գառ ու հինգ հազար արջառ պարգեւեցին Ղեւտացիներուն։

Այսպէս՝ պաշտամունքը ⁶կազմակերպուեցաւ. թագաւորին պատուէրին համաձայն՝ քահանաները իրենց ⁷տեղը կայնեցան, եւ Ղեւտացիները՝ իրենց դասերուն համեմատ։

Զատիկը կը մորթէին, ու քահանաները անոնց ձեռքէն արիւնը առնելով կը սրսկէին, իսկ Ղեւտացիները մորթը կը հանէին։

Ողջակէզ ըլլալու մասերը կը ⁸զատէին, եւ զանոնք ժողովուրդին որդիներուն կու տային՝ նահապետութիւններուն ազգատոհմերուն համեմատ, որպէսզի Տէրոջ մատուցանեն՝ Մովսէսի գիրքին մէջ գրուածին համաձայն. արջառներն ալ նոյնպէս ըրին։

Զատիկը կրակով եփեցին՝ կանոնին համաձայն. բայց միւս սուրբ բաները կաթսաներով, սաներով ու տապակներով եփեցին, եւ ⁹աճապարանքով բաժնեցին ժողովուրդին բոլոր որդիներուն։

Յետոյ իրենց ու քահանաներուն համար պատրաստեցին. արդարեւ Ահարոնի որդիները՝ քահանաները մինչեւ գիշեր ողջակէզներն ու ճարպերը մատուցանելով զբաղած էին. ուստի Ղեւտացիները իրենց համար եւ Ահարոնի որդիներուն՝ քահանաներուն համար պատրաստեցին։

Երգողները՝ Ասափի որդիները իրենց կայանը կեցած էին,— Դաւիթի, Ասափի, Եմանի, ու թագաւորին տեսանողին՝ Իդիթունի պատուէրին համաձայն,— իսկ դռնապանները իւրաքանչիւր դրան առջեւ էին. պէտք չեղաւ որ իրենց պաշտօնէն հեռանան, որովհետեւ անոնց համար իրենց եղբայրները՝ Ղեւտացիները կը պատրաստէին։

Այսպէս՝ Յովսիա թագաւորին պատուէրին համաձայն՝ այդ օրը Տէրոջ ամբողջ պաշտամունքը կազմակերպուեցաւ, Զատիկը կատարելու եւ ողջակէզները Տէրոջ զոհասեղանին վրայ մատուցանելու համար։

Այդ ատեն հոն գտնուող Իսրայէլի որդիները Զատիկն ու Բաղարջակերքի տօնը եօթը օր կատարեցին։

Սամուէլ մարգարէին օրերէն ի վեր՝ Իսրայէլի մէջ ասոր պէս Զատիկ մը կատարուած չէր. Յովսիայի, քահանաներուն, Ղեւտացիներուն, հոն գտնուող ամբողջ Յուդայի եւ Իսրայէլի, ու Երուսաղէմի բնակիչներուն կատարած Զատիկին պէս՝ Իսրայէլի բոլոր թագաւորները կատարած չէին։

Այս Զատիկը Յովսիայի թագաւորութեան տասնութերորդ տարին կատարուեցաւ։

ՅՈՎՍԻԱՅԻ ԹԱԳԱՒՈՐՈՒԹԵԱՆ ՎԱԽՃԱՆԸ (Դ. Թագ. 23. 28-30)

Այս բոլորէն ետք, երբ Յովսիա ¹⁰տաճարը կազմակերպած էր, Եգիպտոսի Նեքաւով թագաւորը բարձրացաւ՝ Եփրատի քով Քարքամիս քաղաքին դէմ պատերազմելու, եւ Յովսիա անոր հանդիպելու ¹¹գնաց։

Ան պատգամաւորներ ղրկեց իրեն, ու ըսաւ. «Ո՛վ Յուդայի թագաւոր, դուն ինծի հետ ի՞նչ գործ ունիս. ես այսօր քեզի դէմ եկած չեմ, հապա այն տան դէմ՝ որ կը պատերազմի ինծի դէմ։ Աստուած ինծի հրամայեց որ արտորամ. ինծի հետ եղող Աստուծոյ ընդդիմանալէ հրաժարէ՛, որ քեզ չբնաջնջէ»։

Բայց Յովսիա ¹²չվերադարձաւ, հապա անոր դէմ պատերազմելու համար ծպտուեցաւ։ Մտիկ չըրաւ Նեքաւովի խօսքը՝ որ Աստուծոյ բերանէն էր, ու Մակեդդովի հովիտը պատերազմելու գնաց։

¹³Աղեղնաւորները Յովսիա թագաւորը նետով զարկին։ Թագաւորը իր ծառաներուն ըսաւ. «Զիս ¹⁴հեռացուցէ՛ք ասկէ, որովհետեւ ծանրօրէն վիրաւորուեցայ»։

Ուստի իր ծառաները զինք կառքէն հանեցին, եւ իր ունեցած երկրորդ կառքը նստեցնելով Երուսաղէմ տարին։ Ան մեռաւ ու իր հայրերուն գերեզմաններուն մէջ թաղուեցաւ. ամբողջ Յուդան եւ Երուսաղէմը Յովսիայի համար սգացին։

Երեմիա Յովսիայի վրայ ողբաց։ Բոլոր երգիչներն ու երգչուհիները՝ մինչեւ այսօր իրենց ողբերուն մէջ Յովսիայի մասին կը խօսին։ Զանոնք երգելու ¹⁵սովորութիւնը մտցուցին՝՝ Իսրայէլի մէջ. անոնք ահա՛ Ողբերուն մէջ գրուած են։

Յովսիայի մնացեալ արարքները, եւ անոր բարեպաշտութիւնը՝ Տէրոջ Օրէնքին մէջ գրուածին համաձայն,

անոր արարքները, առաջիններն ու վերջինները, ահա՛ Իսրայէլի եւ Յուդայի Թագաւորներու գիրքին մէջ գրուած են։