Deuteronomy 33

Numbers  «  Deuteronomy 32  ‹  Deuteronomy 33  ›  Deuteronomy 34  »  Joshua

ՄՈՎՍԷՍ Կ’ՕՐՀՆԷ ԻՍՐԱՅԷԼԻ ՏՈՀՄԵՐԸ

Ահա՛ւասիկ այն օրհնութիւնը, որով Աստուծոյ մարդը՝ Մովսէս օրհնեց Իսրայէլի որդիները, իր մեռնելէն առաջ։

Ան ըսաւ. «Տէրը Սինայէ եկաւ, Անոնց վրայ Սէիրէ ծագեցաւ, Փառան լեռնէն փայլեցաւ, Ու բիւրաւոր սուրբերով եկաւ. Անոր աջ ձեռքէն Օրէնքին կրակը ելաւ անոնց համար։

Այո՛, ան ժողովուրդները կը սիրէ. Բոլոր սուրբերը քու ձեռքդ են. Անոնք քու խօսքերդ ընդունելու համար Ոտքերուդ քով կը նստին։

Մովսէս մեզի ¹տուաւ Օրէնքը, Յակոբի համախմբումին ստացուածքը։

Երբ ժողովուրդին գլխաւորները Իսրայէլի տոհմերուն հետ միաբանութեամբ հաւաքուեցան, Ինք ²Իսրայէլի մէջ իշխան՝՝ եղաւ»։

«Ռուբէն թող ապրի ու չմեռնի, Եւ անոր ³մարդիկը փոքրաթիւ՝՝ թող չըլլան»։

Ահա՛ւասիկ ինչ որ Յուդայի համար ըսաւ. «Ո՛վ Տէր, Յուդայի ձայնը մտի՛կ ըրէ, Ու զայն իր ժողովուրդի՛ն բեր. Անոր ձեռքերը թող բաւական ըլլան իրեն, Եւ անոր հակառակորդներուն դէմ օգնակա՛ն եղիր»։

Ղեւիի համար ըսաւ. «Թումիմդ եւ Ուրիմդ քու բարեպաշտ մարդուդ քով թող ըլլան, Որ Մասսայի մէջ փորձեցիր Ու Մերիպայի ջուրին քով անոր հետ վիճեցար.

Ա՛ն որ իր հօր եւ մօր համար՝ “Զայն չտեսայ” ըսաւ, Իր եղբայրները չճանչցաւ Ու իր որդիները չգիտցաւ. Քանի որ անոնք քու խօսքիդ ուշադիր եղան Եւ քու ուխտդ պահեցին։

Անո՛նք պիտի սորվեցնեն քու կանոններդ՝ Յակոբի, Ու քու Օրէնքդ՝ Իսրայէլի. Քու ⁴առջեւդ խունկ պիտի մատուցանեն, Եւ քու զոհասեղանիդ վրայ՝ ⁵ողջակէզ։

Ո՛վ Տէր, օրհնէ՛ անոր ոյժը, Ու հաւանէ՛ անոր ձեռքերուն գործին. Անոր դէմ կանգնողներուն եւ զայն ատողներուն մէ՛ջքը կոտրէ, Որպէսզի ա՛լ ոտքի չելլեն»։

Բենիամինի համար ըսաւ. «Տէրոջ սիրելին իր քով ապահովութեամբ պիտի բնակի. Աստուած զայն ամէն օր պիտի պաշտպանէ, Եւ անոր ⁶ուսերուն մէջ պիտի բնակի»։

Յովսէփի համար ըսաւ. «Անոր երկիրը Տէրոջմէն թող օրհնուի Երկինքի թանկագին պարգեւներով՝ ցօղով, Ու վարը պառկող անդունդներով,

Արեւին արտադրած թանկագին բերքերով, Եւ ⁷ամիսներուն թանկագին արդիւնքներով,

Վաղեմի լեռներուն ⁸թանկագին պտուղներով՝՝ Ու դարաւոր բլուրներուն թանկագին պարգեւներով,

Երկրի եւ անոր լիութեան թանկագին պարգեւներով։ Մորենիին մէջ բնակողին բարեհաճութեամբ Ասոնք Յովսէփի գլուխին վրայ, Իր եղբայրներուն մէջ նուիրաբերուածին գագաթին վրայ թող գան։

Ան իր ցուլին առջինեկին պէս վայելչութիւն ունի, Եւ իր եղջիւրները ⁹գոմէշի եղջիւրներուն կը նմանին. Անոնցմով ժողովուրդները միասին պիտի զարնէ՝ Մինչեւ երկրի ծայրերը։ Ասո՛նք են Եփրեմի բիւրաւորները, Ասո՛նք են Մանասէի հազարաւորները»։

Զաբուղոնի համար ըսաւ. «Ուրախացի՛ր, ո՛վ Զաբուղոն, երբ դուրս ելլես, Ու դուն, ո՛վ Իսաքար, քու վրաններուդ մէջ։

Ժողովուրդները լեռը հրաւիրելով՝ Հոն արդարութեան զոհեր պիտի մատուցանեն, Քանի որ անոնք ծովերուն առատութիւնը Եւ աւազին մէջ թաղուած գանձերը պիտի ծծեն»։

Գադի համար ըսաւ. «Գադը ընդարձակողը թող օրհնուի. Մատակ առիւծի պէս կը կենայ, Թեւ ու գագաթ կը բզքտէ։

Ան երկրին առաջնակարգ մասը իրեն ¹⁰ընտրեց, Որովհետեւ օրէնսդիրին բաժինը հո՛ն ծածկուած է. Ու ժողովուրդին գլխաւորներուն հետ գալով՝ Տէրոջ արդարութիւնը եւ անոր դատավճիռները Իսրայէլի ¹¹հանդէպ գործադրեց»։

Դանի համար ըսաւ. «Դան առիւծի ձագ է, Ան Բասանէն պիտի ցատկէ»։

Նեփթաղիմի համար ըսաւ. «Նեփթաղիմ, բարեհաճութեամբ կշտացած, Եւ Տէրոջ օրհնութեամբ լեցուած, Արեւմուտքին ու հարաւին թող տիրանայ»։

Ասերի համար ըսաւ. «Ասեր որդիներով թող օրհնուի, Իր եղբայրներուն հաճելի ըլլայ, Եւ ոտքը իւղի մէջ թաթխէ։

Քու ¹²կղպանքներդ երկաթէ ու պղինձէ ըլլան, Եւ քու ¹³ոյժդ օրերուդ չափ ըլլայ»։

«¹⁴Իսրայէլի Աստուծոյն պէս չկայ. Ան քեզի օգնելու համար՝ Երկինքին վրայ կը ¹⁵նստի, Եւ նօսր ամպերուն վրայ՝ իր մեծափառութեան մէջ։

¹⁶Յաւիտենական Աստուածը քեզի ¹⁷պատսպարան է, Անոր յաւիտենական բազուկները քեզի ¹⁸պաշտպան են՝՝. Քանի որ թշնամիները առջեւէդ պիտի վռնտէ, Ու պիտի ըսէ. “Բնաջնջէ՛ զանոնք”։

Իսրայէլ ապահովութեամբ պիտի բնակի՝ առանձին. Յակոբի ակը ցորենի ու քաղցուի երկրի մը մէջ պիտի ըլլայ, Եւ անոր երկինքէն ցօղ պիտի կաթի։

Երանի՜ քեզի, ո՛վ Իսրայէլ. ո՞ր ժողովուրդը քեզի նման Տէրոջմով փրկուած է։ Որովհետեւ քու օգնութեանդ վահանը Ու մեծափառութեանդ սուրը ան է։ Թշնամիներդ ¹⁹քու առջեւդ պիտի քծնին՝՝, Եւ անոնց բարձր տեղերը պիտի կոխես»։