Deuteronomy 34

Numbers  «  Deuteronomy 33  ‹  Deuteronomy 34  ›  Joshua 1  »  Joshua

ՄՈՎՍԷՍԻ ՄԱՀԸ

Մովսէս Մովաբի դաշտերէն Նաբաւ լեռը բարձրացաւ, Փասգայի գագաթը՝ Երիքովի դիմաց, ու Տէրը անոր ցուցուց ամբողջ Գաղաադի երկիրը՝ մինչեւ Դան,

ամբողջ Նեփթաղիմը, Եփրեմի եւ Մանասէի երկիրը, Յուդայի ամբողջ երկիրը՝ մինչեւ արեւմտեան ծովը,

նաեւ հարաւային կողմը, Երիքովի հովիտին դաշտը, արմաւենիներու քաղաքը, մինչեւ Սեգովր։

Տէրը անոր ըսաւ. «Ահա՛ւասիկ այն երկիրը, որուն համար Աբրահամի, Իսահակի ու Յակոբի երդում ըրի՝ ըսելով. “Քու զարմիդ պիտի տամ զայն”։ Քու աչքերովդ տեսնել տուի քեզի, բայց դուն հոն պիտի չանցնիս»։

Այսպէս Տէրոջ ծառան՝ Մովսէս հոն մեռաւ, Մովաբի երկրին մէջ, Տէրոջ ¹հրամանին համաձայն։

Տէրը զայն Մովաբի երկիրը՝ ձորի մը մէջ թաղեց, Բեթփէովրի դիմաց. ո՛չ մէկ մարդ անոր գերեզմանին տեղը գիտցաւ՝ մինչեւ այսօր։

Մովսէս հարիւր քսան տարեկան էր՝ երբ մեռաւ. իր աչքը մթագնած չէր եւ կենսունակութիւնը ²գացած չէր։

Իսրայէլի որդիները Մովսէսի համար երեսուն օր լացին Մովաբի դաշտերուն մէջ. ապա Մովսէսի սուգին լացի օրերը վերջացան։

Նաւէի որդին՝ Յեսու իմաստութեան հոգիով լեցուած էր, որովհետեւ Մովսէս իր ձեռքերը անոր վրայ դրեր էր։ Ուստի Իսրայէլի որդիները անոր հնազանդեցան, եւ Տէրոջ Մովսէսի պատուիրածին համաձայն ըրին։

Իսրայէլի մէջ ա՛լ մարգարէ մը չելաւ Մովսէսի պէս, որովհետեւ Տէրը զինք երես առ երես ճանչցաւ.

Տէրը զինք Եգիպտոսի երկիրը ղրկեց բոլոր նշաններով ու հրաշքներով՝ զանոնք Փարաւոնի, անոր բոլոր ծառաներուն եւ ամբողջ երկրին առջեւ ընելու,

ու Մովսէս՝ իր ձեռքին ամբողջ ոյժով՝ այդ ամբողջ մեծ արհաւիրքը գործադրեց ամբողջ Իսրայէլի աչքերուն առջեւ։