Esther 1

Nehemiah  «  Nehemiah 13  ‹  Esther 1  ›  Esther 2  »  Job

ՎԱՇԹԻ ԹԱԳՈՒՀԻՆ ԿԸ ԳՐԳՌԷ ԹԱԳԱՒՈՐԸ

Ասուերոսի օրերը, (այս այն Ասուերոսն է, որ Հնդկաստանէն մինչեւ Եթովպիա՝ հարիւր քսանեօթը գաւառի վրայ կը թագաւորէր,)

այն օրերը՝ երբ Ասուերոս թագաւորը իր թագաւորութեան գահին վրայ կը նստէր Շուշան մայրաքաղաքին մէջ,

իր թագաւորութեան երրորդ տարին՝ ան խնճոյք մը սարքեց իր բոլոր իշխանաւորներուն ու ծառաներուն. Պարսկաստանի եւ Մարաստանի ¹կտրիճները, մեծամեծներն ու գաւառներու պետերը անոր առջեւ էին։

Երկար ժամանակ, այսինքն՝ հարիւր ութսուն օր, իր թագաւորութեան փառաւոր հարստութիւնը եւ իր մեծութեան հոյակապ շքեղութիւնը ցոյց տուաւ։

Երբ այդ օրերը լրացան, թագաւորը Շուշան մայրաքաղաքը գտնուող ամբողջ ժողովուրդին, մեծէն մինչեւ պզտիկին, եօթը օր խնճոյք սարքեց՝ թագաւորին ապարանքին պարտէզի գաւիթին մէջ։

Ճերմակ բեհեզէ, կանաչ կերպասէ եւ ²կապուտակէ վարագոյրներ՝ բեհեզէ ու ³ծիրանիէ պարաններով եւ արծաթէ օղակներով՝ մարմարէ սիւներէ ⁴կախուած էին. ոսկիէ եւ արծաթէ ⁵բազմոցներ զետեղուած էին պորփիւրէ, ճերմակ մարմարէ, ալապաստրէ ու սեւ մարմարէ սալայատակի մը վրայ։

Խմելիքները ոսկիէ անօթներով կու տային, տեսակ-տեսակ անօթներով։ Թագաւորական գինին առատ էր, թագաւորին ⁶առատաձեռնութեան համեմատ։

Օրէնքին համաձայն կը խմէին, եւ ո՛չ մէկը հարկադրուած էր. արդարեւ թագաւորը իր տան բոլոր մեծերուն ⁷հրամայեր էր որ իւրաքանչիւրին փափաքին համաձայն վարուին։

Վաշթի թագուհին ալ կիներո՛ւն խնճոյք սարքեց՝ Ասուերոս թագաւորին ⁸պալատին մէջ։

Եօթներորդ օրը, երբ թագաւորին սիրտը գինիէն զուարթացած էր, ⁹իր առջեւ սպասարկող եօթը ներքինիներուն՝ Մեհումանի, Բիզթայի, Արբոնայի, Բիգթայի, Աբագթայի, Զեթարի ու Քարքասի հրամայեց

որ Վաշթի թագուհին իր թագաւորական թագով թագաւորին առջեւ բերեն, որպէսզի ժողովուրդներուն եւ իշխանաւորներուն ցոյց տայ անոր գեղեցկութիւնը, որովհետեւ ան վայելուչ տեսք ունէր։

Բայց Վաշթի թագուհին մերժեց երթալ՝ ներքինիներուն ¹⁰միջոցով ղրկուած թագաւորին հրամանին համաձայն. ուստի թագաւորը չափազանց զայրացաւ եւ իր ցասումը բռնկեցաւ։

Այն ատեն թագաւորը ժամանակները գիտցող իմաստուններուն ըսաւ. (արդարեւ թագաւորը այս կերպով խորհուրդ կը հարցնէր բոլոր օրէնք եւ դատաստան գիտցողներուն.

իր մօտն էին Պարսկաստանի ու Մարաստանի եօթը իշխանաւորները.— Կարսենա, Սեթար, Ադմաթա, Թարսիս, Մերէս, Մարսենա եւ Մեմուքան. անոնք թագաւորին երեսը կը տեսնէին ու թագաւորութեան ¹¹առաջին խորհրդականներն էին՝՝.)

«Օրէնքին համաձայն ի՞նչ պէտք է ընել Վաշթի թագուհիին, քանի ներքինիներուն միջոցով Ասուերոս թագաւորին ղրկած հրամանը չգործադրեց»։

Այն ատեն Մեմուքան՝ թագաւորին ու իշխանաւորներուն առջեւ պատասխանեց. «Վաշթի թագուհին ո՛չ միայն թագաւորին դէմ անօրէնութիւն ըրաւ, հապա բոլոր իշխանաւորներուն դէմ եւ Ասուերոս թագաւորին բոլոր գաւառներուն մէջ եղող բոլոր ժողովուրդներուն դէմ։

Արդարեւ թագուհիին արարքին լուրը բոլոր կիներուն մէջ պիտի ¹²տարածուի, անոնց ամուսիններն ալ իրենց աչքերուն պիտի արհամարհուին՝ երբ ըսուի. “Ասուերոս թագաւորը հրամայեց որ Վաշթի թագուհին իր առջեւ բերեն, բայց ան չեկաւ”։

Եւ այսօր թագուհիին արարքին լուրը լսող Պարսկաստանի ու Մարաստանի իշխանուհիները նոյնպէս պիտի պատասխանեն թագաւորին բոլոր իշխանաւորներուն, ուստի բաւական արհամարհանք եւ զայրոյթ պիտի ըլլայ։

Հետեւաբար՝ եթէ թագաւորին ¹³հաճելի է՝ իրմէ թագաւորական հրաման մը թող ¹⁴տրուի,— ու Պարսիկներու եւ Մարերու օրէնքներուն մէջ թող արձանագրուի՝ անփոփոխելի ըլլալու համար,— որ Վաշթի անգամ մըն ալ Ասուերոս թագաւորին առջեւ չգայ, ու թագաւորը անոր ¹⁵թագուհութիւնը անկէ լաւ եղող ուրիշ կնոջ մը տայ։

Ուստի երբ թագաւորին ¹⁶տալիք վճիռը լսուի իր ամբողջ թագաւորութեան մէջ, որ շատ ընդարձակ է, բոլոր կիները՝ մեծէն մինչեւ պզտիկը՝ իրենց ամուսինները պիտի պատուեն»։

Այս խօսքը թագաւորին եւ իշխանաւորներուն ¹⁷հաճելի եղաւ, ու թագաւորը Մեմուքանի ըսածին համաձայն ըրաւ,

թագաւորին բոլոր գաւառներուն ¹⁸նամակներ ղրկելով, իւրաքանչիւր գաւառի՝ իր գիրով, եւ իւրաքանչիւր ժողովուրդի՝ իր լեզուով, որպէսզի ամէն մարդ իր տան մէջ իշխէ ու իր ժողովուրդին լեզուով խօսի։