Esther 3

Nehemiah  «  Esther 2  ‹  Esther 3  ›  Esther 4  »  Job

ՀԱՄԱՆ ԿԸ ԾՐԱԳՐԷ ՀՐԵԱՆԵՐԸ ԲՆԱՋՆՋԵԼ

Այս ¹դէպքերէն ետք, Ասուերոս թագաւորը Ագագացի Ամադաթայի որդին՝ Համանը մեծցուց, զայն բարձրացուց, եւ անոր աթոռը իրեն հետ եղող բոլոր իշխանաւորներուն աթոռէն վեր դրաւ։

Թագաւորին դուռը եղող թագաւորին բոլոր ծառաները ծռելով կ’երկրպագէին Համանի, վասնզի թագաւորը այդպէս պատուիրեր էր անոր մասին. բայց Մուրթքէ չէր ծռեր ու չէր երկրպագեր։

Թագաւորին դուռը եղող թագաւորին ծառաները Մուրթքէի ըսին. «Ինչո՞ւ թագաւորին պատուէրը կ’անտեսես»։

Անոնք ամէն օր անոր կը խօսէին, բայց անոնց մտիկ չէր ըներ. ուստի Համանի պատմեցին, որպէսզի տեսնեն թէ արդեօք Մուրթքէ իր խօսքերուն վրայ հաստատ պիտի կենա՛յ. արդարեւ ան իր Հրեայ ըլլալը անոնց իմացուցեր էր։

Երբ Համան տեսաւ թէ Մուրթքէ ծռելով իրեն չ’երկրպագեր, ցասումով լեցուեցաւ.

բայց իր աչքերուն արհամարհելի էր միայն Մուրթքէի վրայ ձեռք երկարել, քանի որ Մուրթքէի ժողովուրդը իրեն յայտներ էին. Համան ²մտադրեց Մուրթքէի ժողովուրդը բնաջնջել, այսինքն՝ Ասուերոսի ամբողջ թագաւորութեան մէջ եղող բոլոր Հրեաները։

Ասուերոս թագաւորին տասներկրորդ տարին, առաջին ամիսը, այսինքն՝ Նիսան ամսուան մէջ, Համանի առջեւ ³փուր (այսինքն՝ վիճակ) ձգեցին, ⁴ամէն օրուան եւ ամէն ամսուան համար՝՝, մինչեւ տասներկրորդ ամիսը, այսինքն՝ Ադար ամիսը։

Յետոյ Համան Ասուերոս թագաւորին ըսաւ. «Քու թագաւորութեանդ բոլոր գաւառներուն մէջ՝ ժողովուրդը մը կայ, ժողովուրդներուն մէջ ցրուած ու տարածուած։ Անոնց օրէնքները բոլոր ժողովուրդներուն օրէնքներէն տարբեր են։ Անոնք թագաւորին օրէնքները չեն գործադրեր. ուստի չի պատշաճիր որ թագաւորը անոնց արտօնէ։

Եթէ թագաւորին ⁵հաճելի է, թող ⁶հրաման տրուի՝՝ որ զանոնք բնաջնջեն. ես ալ տասը հազար տաղանդ արծաթ ⁷կու տամ՝՝ ⁸պաշտօնատարներուն, որպէսզի թագաւորին գանձը բերեն»։

Այն ատեն թագաւորը իր ձեռքէն մատանին հանեց, զայն Հրեաներու ⁹հակառակորդին՝ Ագագացի Ամադաթայի որդիին՝ Համանի տուաւ,

ու թագաւորը Համանի ըսաւ. «Այդ արծաթը քեզի տրուած է, նաեւ այդ ժողովուրդը, որպէսզի անոնց հետ վարուիս ինչպէս որ ¹⁰քեզի հաճելի՝՝ ըլլայ»։

Առաջին ամսուան տասներեքերորդ օրը՝ թագաւորին ատենադպիրները կանչուեցան, ու Համանի ամբողջ պատուիրածին համաձայն գրուեցաւ թագաւորին սատրապներուն, բոլոր գաւառներուն վրայ նշանակուած կուսակալներուն եւ իւրաքանչիւր ժողովուրդի իշխանաւորներուն, ամէն գաւառի իր գիրով ու ամէն ժողովուրդի իր լեզուով. Ասուերոս թագաւորին անունով գրուեցաւ, եւ թագաւորին մատանիով կնքուեցաւ։

¹¹Նամակները սուրհանդակներու ձեռքով ղրկուեցան թագաւորին բոլոր գաւառները, որպէսզի մէկ օրուան մէջ, տասներկրորդ ամսուան — այսինքն՝ Ադար ամսուան — տասներեքերորդ օրը, բոլոր Հրեաները — երիտասարդներէն մինչեւ ծերերը, նաեւ մանուկներն ու կիները — կոտորեն, սպաննեն ու կորսնցնեն, եւ անոնց ունեցածը իբր աւար կողոպտեն։

Իւրաքանչիւր գաւառի մէջ ¹²հրատարակուելիք հրովարտակին գրութեան պատճէնը բոլոր ժողովուրդներուն ¹³հաղորդուեցաւ, որպէսզի այդ օրուան համար պատրաստ ըլլան։

Սուրհանդակները թագաւորին հրամանէն հարկադրուելով՝ ¹⁴մեկնեցան, ու հրովարտակը Շուշան մայրաքաղաքին մէջ ալ հրատարակուեցաւ։ Թագաւորը ու Համան խմելու նստան, սակայն Շուշան քաղաքը շփոթութեան մէջ էր։