Esther 4

Nehemiah  «  Esther 3  ‹  Esther 4  ›  Esther 5  »  Job

ՄՈՒՐԹՔԷ ԵՍԹԵՐԷՆ ՕԳՆՈՒԹԻՒՆ ԿԸ ԽՆԴՐԷ

Երբ Մուրթքէ բոլոր կատարուածները գիտցաւ, իր հանգուստները պատռեց, եւ քուրձ հագաւ ու վրան մոխիր ցանեց։ Յետոյ քաղաքին մէջտեղը ¹գնաց՝ բարձր եւ ²ողբալից ձայնով աղաղակելով,

ու թագաւորին դրան առջեւ հասնելով կայնեցաւ, քանի քուրձ հագած մարդ մը չէր կրնար թագաւորին դռնէն ներս մտնել։

Բոլոր գաւառներուն մէջ, ո՛ւր որ թագաւորին հրամանը եւ հրովարտակը կը հասնէին, Հրեաներուն մէջ մեծ սուգ կ’ըլլար, ծոմ, լաց ու կոծ. շատերն ալ քուրձի եւ մոխիրի վրայ կը պառկէին։

Եսթերի սպասուհիներն ու ներքինիները եկան եւ իրեն պատմեցին։ Թագուհին չափազանց սարսափեցաւ. հագուստներ ղրկեց՝ որ Մուրթքէի հագցնեն ու անոր վրայէն քուրձը հանեն, բայց ան չընդունեց։

Եսթեր Հաթաքը կանչեց, թագաւորին ներքինիներէն մէկը, (որ թագաւորը ³նշանակեր էր՝ անոր ⁴սպասարկելու,) եւ անոր պատուիրեց որ Մուրթքէէն հասկնայ թէ այդ ի՛նչ էր, ու ինչո՛ւ այդպէս կը վարուէր։

Ուստի Հաթաք Մուրթքէի քով ⁵գնաց, թագաւորին դրան առջեւի հրապարակը։

Մուրթքէ անոր պատմեց բոլոր իրեն պատահածները, նաեւ Համանի յայտարարութիւնը՝ թէ խոստացած էր թագաւորին գանձին արծաթ ⁶տալ Հրեաներուն համար, որպէսզի զանոնք կորսնցնէ։

Զանոնք բնաջնջելու համար Շուշանի մէջ ⁷հրատարակուած հրովարտակին գրութեան պատճէնը տուաւ անոր, որպէսզի Եսթերի ցուցնէ, անոր բացատրէ, եւ անոր պատուիրէ որ թագաւորին քով մտնէ, անոր աղաչէ ու անոր առջեւ իր ժողովուրդին համար թախանձէ։

Հաթաք գնաց եւ Մուրթքէի խօսքերը Եսթերի հաղորդեց։

Եսթեր Հաթաքի հետ խօսեցաւ ու պատուիրեց որ Մուրթքէի սա՛ պատասխանը տանի.

«Թագաւորին բոլոր ծառաները եւ թագաւորին գաւառներուն ժողովուրդները լաւ գիտեն թէ օրէնք մը կայ՝ որ ⁸մահուան կը դատապարտէ՝՝ այն մարդը կամ կինը, որ թագաւորին ներքին գաւիթը կը մտնէ՝ առանց կանչուած ըլլալու. միայն ողջ կը մնայ ա՛ն՝ որուն թագաւորը իր ոսկի մականը կ’երկարէ։ Իսկ ես թագաւորին քով մտնելու կանչուած չեմ երեսուն օրէ ի վեր»։

Եսթերի խօսքերը Մուրթքէի հաղորդեցին.

Մուրթքէ ալ ըսաւ որ Եսթերի սա՛ պատասխանը տանին. «⁹Մի՛ կարծեր՝՝ թէ թագաւորին տունը ըլլալով՝ բոլոր Հրեաներէն միայն դո՛ւն պիտի ազատիս։

Արդարեւ եթէ դուն լռես այս ժամանակին մէջ, ուրիշ տեղէ մը ¹⁰օգնութիւն եւ ազատում պիտի ¹¹հասնին Հրեաներուն, բայց դուն ու հօրդ տունը պիտի կորսուիք. ո՞վ գիտէ, թերեւս դուն այսպիսի ատենուան մը համար ¹²թագուհի եղար՝՝»։

Եսթեր հրամայեց որ Մուրթքէի սա՛ ¹³պատասխանը տանին՝՝.

«Գնա՛, Շուշան գտնուող բոլո՛ր Հրեաները հաւաքէ, եւ ինծի համար ծո՛մ պահեցէք. երեք օր մի՛ ուտէք ու մի՛ խմէք՝ գիշեր թէ ցերեկ։ Ես ալ նոյնպէս ծոմ պիտի պահեմ՝ իմ սպասուհիներովս, եւ այդպէս թագաւորին քով պիտի մտնեմ, ինչ որ օրէնքին համաձայն չէ, ու եթէ մեռնիմ՝ թող մեռնիմ»։

Այն ատեն Մուրթքէ ¹⁴հեռացաւ, եւ գործադրեց ամէն ինչ որ Եսթեր իրեն պատուիրեր էր։