Esther 6

Nehemiah  «  Esther 5  ‹  Esther 6  ›  Esther 7  »  Job

ԹԱԳԱՒՈՐԸ ԿԸ ՊԱՏՈՒԷ ՄՈՒՐԹՔԷՆ

Այդ գիշերը թագաւորին քունը փախաւ, ու հրամայեց որ Ժամանակագրութեան — յիշատակութիւններու — գիրքը բերեն, եւ թագաւորին առջեւ անոնք կարդացուեցան։

Հոն գրուած գտնուեցաւ թէ Մուրթքէ իմացուցեր էր թագաւորին երկու ներքինիներուն՝ Բիգթանի ու Թարէսի մասին, որոնք դրան պահապաններն էին, թէ անոնք ¹մտադրեր էին Ասուերոս թագաւորին վրայ ձեռք երկարել։

Թագաւորը ըսաւ. «Ատոր փոխարէն ի՞նչ պատիւ կամ մեծարանք ²տրուեցաւ Մուրթքէի»։ Թագաւորին ծառայող սպասաւորները պատասխանեցին. «Անոր ոչինչ տրուեցաւ»։

Թագաւորը ըսաւ. «Ո՞վ կայ գաւիթը»։ (Համան ³պալատին արտաքին գաւիթը եկած էր՝ թագաւորին խօսելու, որ Մուրթքէն կախէ այն փայտին վրայ՝ որ ինք անոր համար պատրաստած էր։)

Թագաւորին սպասաւորները անոր պատասխանեցին. «Ահա՛ Համան գաւիթը կը սպասէ»։ Թագաւորը ըսաւ. «Թող ներս գայ»։

Երբ Համան ներս եկաւ, թագաւորը անոր ըսաւ. «Ի՞նչ պէտք է ընել այն մարդուն, որ թագաւորը կը բաղձայ պատուել»։ Համան իր սիրտին մէջ ⁴մտածեց. «Թագաւորը ինձմէ ⁵զատ ուրիշ՝՝ ո՞վ պիտի փափաքի պատուել»։

Ուստի Համան թագաւորին պատասխանեց. «Այն մարդուն համար՝ որ թագաւորը կը փափաքի պատուել,

թող բերեն թագաւորին հագած թագաւորական հանդերձը, թագաւորին հեծած ձին, եւ անոր գլուխը դրուած թագաւորական թագը.

հանդերձն ու ձին թող տրուին թագաւորին մեծամեծ իշխանաւորներէն մէկուն ձեռքը, հանդերձը հագցնեն այն մարդուն՝ որ թագաւորը կը փափաքի պատուել, զայն ձիուն վրայ հեծցնեն, քաղաքին հրապարակին մէջէն անցընեն եւ առջեւէն գոչեն. “Ա՛յսպէս պիտի ըլլայ այն մարդուն, որ թագաւորը կը փափաքի պատուել”»։

Այն ատեն թագաւորը Համանի ըսաւ. «Ինչպէս որ ըսիր՝ շուտո՛վ հանդերձն ու ձին առ, եւ թագաւորին դուռը նստող հրեայ Մուրթքէի ա՛յդպէս ըրէ. քու բոլոր ըսածներէդ ոչի՛նչ թող ⁶պակսի»։

Համան հանդերձն ու ձին առաւ, հանդերձը Մուրթքէի հագցնելով՝ զայն ձիուն վրայ հեծցուց, քաղաքին հրապարակէն անցուց, եւ առջեւէն ⁷կը գոչէր՝՝. «Ա՛յսպէս պիտի ըլլայ այն մարդուն, որ թագաւորը կը փափաքի պատուել»։

Մուրթքէ թագաւորին դուռը վերադարձաւ. իսկ Համան՝ ⁸տրտում ու գլուխը ծածկած՝ շտապելով իր տունը մեկնեցաւ։

Համան իր կնոջ՝ Զերէսի եւ բոլոր ⁹բարեկամներուն պատմեց ամէն ինչ որ իրեն պատահած էր։ Անոր իմաստուններն ու կինը՝ Զերէս իրեն ըսին. «Եթէ Մուրթքէ (որուն առջեւ դուն սկսար իյնալ) Հրեաներու զարմէն է, դուն անոր պիտի չյաղթես, հապա անոր առջեւ անշուշտ պիտի իյնաս»։

Երբ անոնք տակաւին իրեն հետ կը խօսէին, թագաւորին ներքինիները հասան եւ արտորալով Համանը Եսթերի սարքած խնճոյքին տարին։