Esther 7

Nehemiah  «  Esther 6  ‹  Esther 7  ›  Esther 8  »  Job

ՀԱՄԱՆ ԿԸ ԴԱՏԱՊԱՐՏՈՒԻ ՄԱՀՈՒԱՆ

Թագաւորը Համանի հետ ¹խնճոյքի գնաց Եսթեր թագուհիին քով։

Թագաւորը երկրորդ օրն ալ՝ ²գինի խմելու՝՝ ատեն՝ Եսթերի ըսաւ. «Ո՛վ Եսթեր թագուհի, ի՞նչ է խնդրանքդ. ըսէ՛, ու քեզի պիտի տրուի։ Ի՞նչ է պահանջդ. մինչեւ թագաւորութեան կէսն ալ ըլլայ՝ պիտի կատարուի»։

Եսթեր թագուհին պատասխանեց. «Եթէ քու ³առջեւդ շնորհք գտայ, ո՛վ թագաւոր, ու եթէ թագաւորին ⁴հաճելի է, խնդրանքիս փոխարէն իմ կեանքս թող ⁵շնորհուի ինծի, եւ պահանջիս փոխարէն՝ իմ ժողովուրդս։

Արդարեւ թէ՛ ես եւ թէ իմ ժողովուրդս ծախուած ենք՝ կոտորուելու, սպաննուելու եւ կորսուելու. եթէ ծախուած ըլլայինք իբր ստրուկ կամ ստրկուհի՝ լուռ կը կենայի, թէպէտ թշնամին թագաւորին կրած վնասը չէր կրնար հատուցանել»։

Ասուերոս թագաւորը խօսեցաւ Եսթեր թագուհիին եւ ըսաւ. «Ո՞վ է ան, եւ ո՞ւր է ան, որ ⁶համարձակեցաւ այսպէս ընել»։

Եսթեր պատասխանեց. «Հակառակորդն ու թշնամին՝ այս չար Համանն է»։ Համան թագաւորին ու թագուհիին առջեւ զարհուրեցաւ։

Թագաւորը ⁷խնճոյքէն ցասումով ոտքի ելաւ եւ ապարանքին պարտէզը գնաց։ Բայց Համան հոն կեցաւ՝ որպէսզի իր կեանքին համար Եսթեր թագուհիին թախանձէ, որովհետեւ տեսաւ թէ իր վրայ չարիք որոշուած է թագաւորէն։

Երբ թագաւորը ապարանքին պարտէզէն ⁸խնճոյքին սենեակը՝՝ վերադարձաւ, Համան Եսթերի եղած ⁹բազմոցին վրայ փռուած՝՝ էր։ Թագաւորը ըսաւ. «Միթէ իմ քովս՝ տան մէջ թագուհի՞ն ալ պիտի ¹⁰բռնաբարէ»։ Երբ այս խօսքը թագաւորին բերանէն ելաւ, Համանի երեսը ծածկեցին։

Այն ատեն Արբոնա, ներքինիներէն մէկը, թագաւորին ներկայութեան ըսաւ. «Ահա՛ այն յիսուն կանգուն բարձրութեամբ փայտը, որ Համան պատրաստեց թագաւորին բարիք ¹¹ընող Մուրթքէի համար, Համանի տան մէջ կեցած է»։ Թագաւորն ալ ըսաւ. «Զինք կախեցէ՛ք անոր վրայ»։

Ուստի Համանը Մուրթքէի համար պատրաստած փայտին վրայ կախեցին։ Այն ատեն թագաւորին ցասումը մեղմացաւ։