Esther 8

Nehemiah  «  Esther 7  ‹  Esther 8  ›  Esther 9  »  Job

ՀՐՈՎԱՐՏԱԿԸ ԿԸ ԽԱՓԱՆՈՒԻ

Այդ օրը Ասուերոս թագաւորը Հրեաներու հակառակորդին՝ Համանի տունը Եսթեր թագուհիին ¹պարգեւեց. Մուրթքէ ալ թագաւորին ներկայացաւ, որովհետեւ Եսթեր թագաւորին իմացուցեր էր թէ ան իրեն ի՛նչ ազգական էր։

Թագաւորը հանեց իր մատանին՝ որ Համանէն ²վերցուցեր էր, ու զայն Մուրթքէի տուաւ. իսկ Եսթեր Մուրթքէն նշանակեց Համանի տան վրայ։

Եսթեր վերստին խօսեցաւ թագաւորին ներկայութեան, անոր ոտքերը ինկաւ եւ լալով աղաչեց անոր՝ որ ³խափանէ Ագագացի Համանի մտածած չարիքը եւ Հրեաներուն դէմ անոր ⁴պատրաստած ծրագիրը՝՝։

Թագաւորը ոսկի մականը Եսթերի երկարեց. Եսթեր ալ ոտքի ելաւ, թագաւորին առջեւ կայնեցաւ

եւ ըսաւ. «Եթէ թագաւորին ⁵հաճելի է ու ես իր ⁶առջեւ շնորհք գտայ, եթէ սա՛ բանը թագաւորին ⁷կը յարմարի՝՝ ու ես իր աչքերուն հաճելի եմ, թող գրուի՝ որ Ագագացի Ամադաթայի որդիին՝ Համանի ⁸ծրագիրը խափանուի՝՝, այսինքն՝ անոր ⁹նամակները, որ գրեց՝ թագաւորին բոլոր գաւառներուն մէջ եղող Հրեաները կորսնցնելու համար։

Արդարեւ ի՞նչպէս պիտի կարենամ տեսնել իմ ժողովուրդիս պատահելիք չարիքը. ի՞նչպէս պիտի կարենամ տեսնել իմ ազգակիցներուս կորսուիլը»։

Ասուերոս թագաւորը Եսթեր թագուհիին ու հրեայ Մուրթքէի պատասխանեց. «Ահա՛ Համանի տունը Եսթերի պարգեւեցի, ու զայն փայտի վրայ կախեցին՝ քանի որ իր ձեռքը Հրեաներուն վրայ երկարեց։

Դո՛ւք ալ թագաւորին անունով գրեցէք ինչ որ ձեզի ¹⁰հաճելի է՝ Հրեաներուն մասին, եւ կնքեցէ՛ք թագաւորին մատանիով. որովհետեւ թագաւորին անունով գրուած ու թագաւորին մատանիով կնքուած գրութիւնը ¹¹չի խափանուիր՝՝»։

Այն ատեն — երրորդ ամսուան, այսինքն՝ Սիվան ամսուան քսաներեքերորդ օրը — թագաւորին ատենադպիրները կանչուեցան, եւ Մուրթքէի ամբողջ պատուիրածին համաձայն գրուեցաւ Հրեաներուն, նաեւ սատրապներուն, կուսակալներուն ու գաւառներու իշխանաւորներուն,— հարիւր քսանեօթը գաւառներուն՝ Հնդկաստանէն մինչեւ Եթովպիա,— ամէն գաւառի իր գիրով եւ ամէն ժողովուրդի իր լեզուով, նաեւ Հրեաներուն՝ իրենց գիրով ու լեզուով։

Ասուերոս թագաւորին անունով գրեց եւ թագաւորին մատանիով կնքեց, ապա նժոյգներու եւ ¹²ճայիկներէ ծնած՝՝ ջորիներու վրայ հեծած ¹³սուրհանդակներով նամակներ՝՝ ղրկեց,

որոնցմով թագաւորը բոլոր քաղաքներու Հրեաներուն արտօնութիւն կու տար որ համախմբուին, իրենց ¹⁴կեանքը պաշտպանեն՝՝, եւ ¹⁵իրենց վրայ յարձակող՝՝ ժողովուրդին ու գաւառին բոլոր զինեալ ոյժերը, նաեւ մանուկներն ու կիները կոտորեն, մեռցնեն եւ կորսնցնեն, ու անոնց ունեցածը իբր աւար կողոպտեն,

Ասուերոս թագաւորին բոլոր գաւառներուն մէջ՝ ¹⁶նոյն օրը՝՝, տասներկրորդ ամսուան — այսինքն՝ Ադար ամսուան — տասներեքերորդ օրը։

Իւրաքանչիւր գաւառի մէջ ¹⁷հրատարակուելիք հրովարտակին գրութեան պատճէնը բոլոր ժողովուրդներուն ¹⁸հաղորդուեցաւ, որպէսզի Հրեաները այդ օրուան համար պատրաստ ըլլան՝ իրենց թշնամիներէն վրէժ առնելու։

Սուրհանդակները նժոյգներու եւ ջորիներու վրայ հեծան, ու արտորալով ¹⁹մեկնեցան՝ թագաւորին հրամանէն հարկադրուելով. հրովարտակը Շուշան մայրաքաղաքին մէջ ալ հրատարակուեցաւ։

Մուրթքէ դուրս ելաւ թագաւորին առջեւէն՝ ²⁰կապուտակէ ու ճերմակ բեհեզէ թագաւորական հանդերձով, ոսկիէ մեծ թագով, եւ բեհեզէ ու ²¹ծիրանիէ պատմուճանով. Շուշան քաղաքը ցնծութեամբ աղաղակեց եւ ուրախացաւ.

Հրեաները լոյս, ուրախութիւն, բերկրանք ու պատիւ ունեցան։

Ամէն գաւառի եւ ամէն քաղաքներուն մէջ, ո՛ւր որ թագաւորին հրամանը եւ հրովարտակը կը հասնէին, Հրեաները ուրախութիւն ու բերկրանք, խնճոյք եւ ²²տօնախմբութեան օր ունեցան։ Երկրին ժողովուրդներէն շատերը Հրեայ եղան, որովհետեւ Հրեաներուն երկիւղը ինկաւ իրենց վրայ։