Esther 9

Nehemiah  «  Esther 8  ‹  Esther 9  ›  Esther 10  »  Job

ՀՐԵԱՆԵՐԸ ԿԸ ՋԱՐԴԵՆ ԻՐԵՆՑ ԹՇՆԱՄԻՆԵՐԸ

Տասներկրորդ ամսուան — այսինքն՝ Ադար ամսուան — տասներեքերորդ օրը, երբ թագաւորին հրամանին եւ անոր հրովարտակին գործադրութեան ժամանակը հասաւ, մինչ Հրեաներուն ¹ոսոխները կը յուսային անոնց վրայ տիրել, այդ օրը կացութիւնը յեղաշրջուեցաւ, որովհետեւ Հրեանե՛րը տիրեցին զիրենք ատողներուն վրայ։

Ասուերոս թագաւորին բոլոր գաւառներուն մէջ՝ Հրեաները իրենց քաղաքներուն մէջ համախմբուեցան, որպէսզի իրենց չարիք ընել ²մտադրողներուն վրայ ձեռք երկարեն. ո՛չ մէկը կրցաւ անոնց ³ընդդիմանալ, որովհետեւ անոնց երկիւղը բոլոր ժողովուրդներուն վրայ ինկած էր։

Գաւառներուն բոլոր իշխանաւորները, սատրապները, կուսակալներն ու թագաւորին գործակատարները Հրեաներուն նեցուկ կ’ըլլային, որովհետեւ անոնց վրայ Մուրթքէի երկիւղը ինկած էր։

Արդարեւ Մուրթքէ ⁴պալատին մէջ մեծ էր, եւ անոր համբաւը բոլոր գաւառները ⁵տարածուած էր, քանի այդ մարդը՝ Մուրթքէ ⁶հետզհետէ կը մեծնար։

Հրեաները իրենց բոլոր ոսոխները սուրի հարուածով զարկին՝ ջարդելով ու կորսնցնելով, եւ զիրենք ատողներուն հետ վարուեցան իրենց կամքին համաձայն։

Հրեաները Շուշան մայրաքաղաքին մէջ հինգ հարիւր մարդ մեռցնելով կորսնցուցին.

նաեւ Փարսանդաթան, Դաղփոնը, Ասփաթան,

Փորաթան, Ադալիան, Արիդաթան,

Փարմասթան, Արիսային, Արիդային ու Վայեզաթան,—

Հրեաներու հակառակորդին՝ Ամադաթայի որդիին՝ Համանի տասը որդիները,— մեռցուցին. բայց աւարին ձեռք չերկարեցին։

Այդ օրը Շուշան մայրաքաղաքին մէջ մեռցուածներուն թիւը թագաւորին ⁷հաղորդուեցաւ։

Թագաւորը Եսթեր թագուհիին ըսաւ. «Հրեաները Շուշան մայրաքաղաքին մէջ հինգ հարիւր մարդ, ու Համանի տասը որդիները մեռցնելով կորսնցուցին. արդեօք թագաւորին միւս գաւառներուն մէջ ինչե՜ր ըրած են։ Իսկ հիմա ի՞նչ է խնդրանքդ. ըսէ՛, ու պիտի տրուի քեզի։ Տակաւին ի՞նչ պահանջ ունիս. ըսէ՛, ու պիտի կատարուի»։

Եսթեր պատասխանեց. «Եթէ թագաւորին ⁸հաճելի է, Շուշանի մէջ եղող Հրեաներուն թող արտօնութիւն տրուի, որ վաղն ալ այս օրուան հրովարտակին համաձայն վարուին. Համանի տասը որդիներն ալ փայտի վրայ թող կախուին»։

Թագաւորը հրամայեց որ այդպէս ըլլայ. Շուշանի մէջ հրովարտակը ⁹հրատարակուեցաւ, եւ Համանի տասը որդիները կախուեցան։

Շուշանի մէջ եղող Հրեաները Ադար ամսուան տասնչորրորդ օրն ալ համախմբուեցան, ու Շուշանի մէջ երեք հարիւր մարդ մեռցուցին. բայց աւարին ձեռք չերկարեցին։

Թագաւորին գաւառներուն մէջ եղող միւս Հրեաներն ալ համախմբուեցան, իրենց ¹⁰կեանքը պաշտպանեցին՝՝ եւ իրենց թշնամիներէն հանգստացան. զիրենք ատողներէն եօթանասունհինգ հազար մարդ մեռցուցին, բայց աւարին ձեռք չերկարեցին։

Ասիկա Ադար ամսուան տասներեքերորդ օրը եղաւ. անոր տասնչորրորդ օրը հանգստացան, ու զայն խնճոյքի եւ ուրախութեան օր ըրին.

իսկ Շուշանի մէջ եղող Հրեաները այդ ամսուան տասներեքերորդ օրն ու տասնչորրորդ օրը հաւաքուեցան, եւ տասնհինգերորդ օրը հանգստացան, ու զայն խնճոյքի եւ ուրախութեան օր ըրին։

Հետեւաբար՝ գիւղացի Հրեաները, որոնք անպարիսպ ¹¹գիւղաքաղաքներու մէջ կը բնակէին, Ադար ամսուան տասնչորրորդ օրը ուրախութեան, խնճոյքի ու ¹²տօնախմբութեան օր ըրին՝ իրարու բաժիններ ղրկելով։

Մուրթքէ այս բաները գրեց, եւ Ասուերոս թագաւորին բոլոր գաւառներուն մէջ մօտ թէ հեռու եղող բոլոր Հրեաներուն ¹³նամակներ ղրկեց,

որպէսզի ամէն տարի իրենց մէջ տօն կատարեն Ադար ամսուան տասնչորրորդ օրը եւ անոր տասնհինգերորդ օրը,

(իբր օրեր՝ երբ Հրեաները իրենց թշնամիներէն հանգստացան, եւ իբր այն ամիսը՝ երբ իրենց տրտմութիւնը՝ ուրախութեան փոխուեցաւ, ու իրենց սուգը՝ ¹⁴տօնախմբութեան օրուան,) զանոնք խնճոյքի եւ ուրախութեան օրեր ընեն, անոնց մէջ իրարու բաժիններ ղրկելով, իսկ աղքատներուն՝ պարգեւներ։

Հրեաները ընդունեցին ընել ինչ որ սկսած էին, եւ ինչ որ Մուրթքէ իրենց գրած էր։

Արդարեւ բոլոր Հրեաներուն հակառակորդը, Ագագացի Ամադաթայի որդին՝ Համան մտածեր էր Հրեաները կորսնցնել, ու ¹⁵փուր (այսինքն՝ վիճակ) ձգեր էր՝ զանոնք խուճապի մատնելու եւ կորսնցնելու համար։

Բայց երբ Եսթեր թագաւորին ներկայացաւ, ան ¹⁶նամակներով հրամայեց որ Հրեաներուն դէմ Համանի ¹⁷պատրաստած չար ծրագիրը՝՝ անոր գլուխը վերադառնայ, ու զինք եւ իր որդիները փայտի վրայ կախեն։

Հետեւաբար այդ օրերը Փուրիմ կոչուեցան՝ ¹⁸փուր անունին համաձայն։ Ուստի, այս նամակին բոլոր խօսքերուն համար, նաեւ այս մասին իրենց տեսածներուն եւ իրենց պատահածներուն համար,

Հրեաները ¹⁹որոշեցին ու ²⁰յանձն առին որ իրենք, իրենց զարմը եւ բոլոր իրենց միացողները ամէն տարի առանց անտեսելու տօն կատարեն այդ երկու օրերը՝ իրենց ²¹կանոնին եւ ատենին համաձայն։

Այդ օրերը պիտի յիշատակուին ու ²²տօնուին ²³սերունդէ սերունդ՝՝, ամէն գերդաստանի մէջ, ամէն գաւառի մէջ եւ ամէն քաղաքի մէջ. այս Փուրիմի օրերը Հրեաներէն պիտի չանտեսուին, ու անոնց յիշատակը իրենց զարմէն պիտի չկորսուի։

ՓՈՒՐԻՄԻ ՏՕՆԸ

Աբիքէլի աղջիկը՝ Եսթեր թագուհին, եւ հրեայ Մուրթքէ ամբողջ ²⁴պնդումով գրեցին Փուրիմը հաստատող այս երկրորդ նամակը։

Ասուերոսի թագաւորութեան հարիւր քսանեօթը գաւառներուն մէջ եղող բոլոր Հրեաներուն չ նամակներ ղրկուեցան՝ խաղաղութեան ու ճշմարտութեան խօսքերով,

որպէսզի այս Փուրիմի օրերը իրենց սահմանուած ատենին մէջ հաստատեն՝ ինչպէս հրեայ Մուրթքէն ու Եսթեր թագուհին անոնց պատուիրեցին. անոնք ալ իրենց համար եւ իրենց զարմին համար հաստատեցին ծոմապահութեան ու իրենց աղաղակին վերաբերեալ հրահանգները։

Այսպէս՝ Եսթերի հրամանը հաստատեց Փուրիմի վերաբերեալ այս հրահանգները, եւ ասիկա գիրքի մէջ գրուեցաւ։