Exodus 15

Genesis  «  Exodus 14  ‹  Exodus 15  ›  Exodus 16  »  Leviticus

ՄՈՎՍԷՍԻ ԵՐԳԸ

Այն ատեն Մովսէս ու Իսրայէլի որդիները սա՛ երգը երգեցին Տէրոջ՝ ըսելով. «Պիտի երգեմ Տէրոջ, քանի որ մեծապէս բարձրացաւ. Ձին եւ անոր հեծեալը ծովը նետեց։

¹Տէ՛րն է իմ զօրութիւնս ու սաղմոսս, Եւ իմ փրկութիւնս եղաւ. Ա՛ն է իմ Աստուածս, ու պիտի փառաւորեմ զայն. Իմ հօրս Աստուածն է, եւ պիտի բարձրացնեմ զայն։

Տէրը հզօր պատերազմիկ է. Անոր անունը Եհովա է։

Փարաւոնի կառքերն ու անոր զօրագունդերը ծովը նետեց, Եւ անոր ընտիր զօրավարները Կարմիր ծովուն մէջ մխրճուեցան։

Անդունդները ծածկեցին զանոնք. Քարի պէս խորունկը իջան։

Քու աջ ձեռքդ, ո՛վ Տէր, վեհափառ է ոյժով. Քու աջ ձեռքդ, ո՛վ Տէր, ջախջախեց թշնամին։

Քու մեծափառութեանդ ճոխութեամբ տապալեցիր քեզի դէմ կանգնողները, Քու բորբոքումդ ղրկեցիր, ու զանոնք խոզանի պէս սպառեց։

Քու ռունգերուդ ²շունչով՝ ջուրերը դիզուեցան, ³Յորձանքները կարկառի պէս կայնեցան, Ծովուն սիրտին մէջ անդունդները սառեցան։

Թշնամին կ’ըսէր. “Պիտի հետապնդեմ, պիտի հասնիմ, Աւարը պիտի բաժնեմ, Իմ անձս անոնցմէ պիտի կշտանայ. Իմ սուրս պիտի քաշեմ, Իմ ձեռքս զանոնք պիտի վտարէ”։

Քու հովդ փչեցիր, ծովը զանոնք ծածկեց. ⁴Զօրաւոր ջուրերուն մէջ կապարի պէս ընկղմեցան։

Ո՛վ Տէր, աստուածներուն մէջ քեզի նման ո՞վ կայ։ ⁵Սրբութեան մէջ վեհափառ, գովաբանութեան մէջ ահեղ, Սքանչելիքներ ընող՝ ո՞վ կայ քեզի նման։

Քու աջ ձեռքդ երկարեցիր, Երկիրը զանոնք կլլեց։

Քու կարեկցութեամբդ առաջնորդեցիր այս ժողովուրդը՝ որ դուն փրկեցիր. Քու զօրութեամբդ տարիր զայն քու սուրբ բնակութիւնդ։

Ժողովուրդները պիտի լսեն ու սասանին. Սարսափը պիտի համակէ ⁶Փղշտացիներու երկրին՝՝ բնակիչները։

Այն ատեն Եդովմի պետերը պիտի սոսկան, Դողը պիտի համակէ Մովաբի զօրաւորները. Քանանի բոլոր բնակիչները պիտի հալին։

Անոնց վրայ ահ ու երկիւղ պիտի իյնան. Քու բազուկիդ մեծութենէն՝ քարի պէս լուռ պիտի կենան, Մինչեւ որ քու ժողովուրդդ անցնի, ո՛վ Տէր, Մինչեւ որ անցնի այս ժողովուրդը՝ որ դուն ստացար։

Պիտի բերես զանոնք եւ քու ժառանգութեանդ լեռը պիտի տնկես զանոնք, Ո՛վ Տէր, այն վայրը՝ որ քու բնակութեանդ համար պատրաստեցիր, Ո՛վ Տէր, այն սրբարանին մէջ՝ որ քու ձեռքերդ հաստատեցին։

Տէրը պիտի թագաւորէ ⁷դարէ դար՝՝»։

Արդարեւ Փարաւոնի ձիերը ծովը մտան՝ իր կառքերով ու ձիաւորներով, եւ Տէրը ծովուն ջուրերը անոնց վրայ վերադարձուց. բայց Իսրայէլի որդիները ծովուն մէջտեղէն ցամաքով գացին։

ՄԱՐԻԱՄԻ ԵՐԳԸ

Ահարոնի քոյրը՝ Մարիամ մարգարէուհին՝ թմբուկը իր ձեռքը առաւ, եւ բոլոր կիները անոր ետեւէն դուրս ելան՝ թմբուկներով ու պարերով։

Մարիամ պատասխանեց անոնց. «Երգեցէ՛ք Տէրոջ, քանի որ մեծապէս բարձրացաւ. Ձին եւ անոր հեծեալը ծովը նետեց»։

ԴԱՌՆ ՋՈՒՐԵՐԸ

Մովսէս Կարմիր ծովէն ճամբայ հանեց Իսրայէլը, ու դուրս ելան դէպի Սուրի անապատը։ Երեք օրուան ճամբայ գացին անապատին մէջ, բայց ջուր չգտան։

Երբ Մարա հասան, չէին կրնար խմել Մարայի ջուրերէն, որովհետեւ դառն էին. ուստի անոր անունը ⁸Մարա կոչուեցաւ։

Ժողովուրդը տրտնջեց Մովսէսի դէմ՝ ըսելով. «Ի՞նչ պիտի խմենք»։

Ան ալ Տէրոջ աղաղակեց, եւ Տէրը անոր փայտ մը ցուցուց. երբ զայն ջուրերուն մէջ նետեց՝ ջուրերը ⁹անուշցան։ Հոն կանոն ու ¹⁰դատավճիռ դրաւ անոնց, եւ հոն փորձարկեց զանոնք։

Ան ըսաւ. «Եթէ Տէրոջ՝ քու Աստուծոյդ խօսքը ուշադրութեամբ մտիկ ընես, ինչ որ անոր ¹¹առջեւ ուղիղ է՝ ընես, անոր պատուիրանները ունկնդրես եւ անոր բոլոր կանոնները պահես, այն հիւանդութիւններէն ո՛չ մէկը քու վրադ պիտի բերեմ, որ Եգիպտացիներուն վրայ բերի. որովհետեւ ե՛ս եմ Տէրը՝ որ քեզ կը բուժեմ»։

Յետոյ հասան Եղիմ, ուր տասներկու ջուրի աղբիւր ու եօթանասուն արմաւենի կար։ Հո՛ն բանակեցան՝ ջուրերուն քով։