Exodus 21

Genesis  «  Exodus 20  ‹  Exodus 21  ›  Exodus 22  »  Leviticus

ՎԵՐԱԲԵՐՈՒՄ ՍՏՐՈՒԿՆԵՐՈՒ ՀԱՆԴԷՊ (Բ. Օր. 15. 12-18)

«Ահա՛ւասիկ այն կանոնները՝ որ անոնց պիտի ներկայացնես։

Երբ եբրայեցի ծառայ մը գնես, ան վեց տարի ստրուկ պիտի ըլլայ, ու եօթներորդ տարին ազատ դուրս պիտի ելլէ, առանց վճարումի։

Եթէ մինակ մտաւ, մինակ պիտի ելլէ. եթէ կին ունէր, կինն ալ իրեն հետ պիտի ելլէ։

Եթէ իր տէ՛րը իրեն կին տուաւ եւ ան իրեն որդիներ կամ աղջիկներ ծնած է, կինն ու անոր զաւակները տիրոջ պիտի ըլլան, եւ ինք մինակ պիտի ելլէ։

Իսկ եթէ ծառան յայտարարէ. “Ես կը սիրեմ իմ տէրս, կինս ու որդիներս, չեմ ուզեր դուրս ելլել եւ ազատ ըլլալ”,

իր տէրը դատաւորներուն պիտի ներկայացնէ զինք, ու դրան կամ դրանդիներուն մօտեցնէ. իր տէրը հերիւնով պիտի ծակէ իր ականջը, եւ ինք միշտ ստրուկ պիտի ըլլայ անոր։

Երբ մէկը իր աղջիկը ծախէ աղախին ըլլալու համար, ան դուրս պիտի չելլէ՝ ինչպէս ծառաները կ’ելլեն։

Եթէ ան ¹անհաճոյ ըլլայ իր տիրոջ՝ որ զայն իրեն նշաներ էր, զայն թող փրկել տայ. զայն օտար ժողովուրդի ծախելու իրաւասութիւն պիտի չունենայ, որովհետեւ անոր անհաւատարիմ եղաւ։

Եթէ զայն իր որդիին նշանած է, աղջիկներու կանոնին համաձայն պիտի վարուի անոր հետ։

Եթէ իրեն ուրիշ կին առնէ, անոր ուտելիքը, հանդերձն ու մերձաւորութիւնը պիտի չպակսեցնէ։

Եթէ անոր չընէ այս երեք բաները, ան առանց վճարումի դուրս պիտի ելլէ, առանց դրամի»։

ՕՐԷՆՔՆԵՐ ՎԱՅՐԱԳ ԳՈՐԾԵՐՈՒ ՄԱՍԻՆ

«Մարդու մը զարնելով զայն մեռցնողը՝ անշո՛ւշտ պիտի մեռցուի։

Իսկ եթէ դարան չմտաւ, հապա զայն Աստուած մատնեց իր ձեռքը, քեզի տեղ մը պիտի որոշեմ, որպէսզի ինք հոն փախչի։

Բայց եթէ մէկը յանդգնութեամբ իր ընկերին վրայ գայ եւ զայն խորամանկութեամբ սպաննէ, նոյնիսկ իմ զոհասեղանէ՛ս առ զայն՝ որպէսզի մեռնի։

Իր հայրը կամ մայրը ծեծողը՝ անշո՛ւշտ պիտի մեռցուի։

Մարդ գողցողը, զայն ծախած ըլլայ թէ ան իր ձեռքը գտնուի, անշո՛ւշտ պիտի մեռցուի։

Իր հայրը կամ մայրը անիծողը անշո՛ւշտ պիտի մեռցուի։

Երբ մարդիկ իրարու հետ կռուին ու մէկը միւսին քարով կամ բռունցքով զարնէ եւ ան չմեռնի, հապա անկողին պառկի.

եթէ դարձեալ ոտքի ելլէ ու իր ցուպով դուրսը քալէ, զարնողը անպարտ պիտի ըլլայ. միայն անոր ²կորսնցուցած ժամանակին արժէքը՝՝ պիտի հատուցանէ՝ մինչեւ որ բոլորովին բուժուի։

Երբ մէկը գաւազանով իր ստրուկին կամ աղախինին զարնէ եւ ան իր ձեռքին տակ մեռնի, անշո՛ւշտ անկէ վրէժ պիտի առնուի։

Բայց եթէ օր մը կամ երկու օր ³ապրի, անկէ վրէժ պիտի չառնուի, քանի որ ան իր դրամն է։

Երբ մարդիկ կռուին, եւ անոնցմէ մէկը յղի կնոջ մը զարնելով՝ անոր ծնանիլ տայ, թէեւ ուրիշ փորձանք մը չըլլայ՝ ան անշո՛ւշտ պիտի կրէ այդ կնոջ ամուսինին իր վրայ դրած տուգանքը, դատաւորներուն դատավճիռին համաձայն հատուցանելով։

Բայց եթէ փորձանք մը ըլլայ, ⁴կեանքի տեղ կեանք՝՝ պիտի տաս,

աչքի տեղ աչք, ակռայի տեղ ակռայ, ձեռքի տեղ ձեռք, ոտքի տեղ ոտք,

խարանի տեղ խարան, վէրքի տեղ վէրք, հարուածի տեղ հարուած։

Երբ մէկը իր ստրուկին աչքին կամ աղախինին աչքին զարնէ եւ կուրցնէ, զայն ազատ պիտի արձակէ անոր աչքին փոխարէն։

Ու եթէ իր ստրուկին ակռան կամ աղախինին ակռան փրցնէ, զայն ազատ պիտի արձակէ անոր ակռային փոխարէն»։

ՍԵՓԱԿԱՆԱՏԻՐՈՋ ՊԱՏԱՍԽԱՆԱՏՈՒՈՒԹԻՒՆԸ

«Երբ եզ մը իր եղջիւրներով մարդու մը կամ կնոջ մը զարնէ ու մեռցնէ, եզը անշո՛ւշտ պիտի քարկոծուի եւ անոր միսը պիտի չուտուի. սակայն եզին տէրը անպարտ ըլլայ։

Իսկ եթէ եզը ⁵առաջուընէ զարնող էր եւ անոր ⁶տէրը տեղեակ՝՝ էր, բայց զայն ներս պահած չէր, եթէ մարդ մը կամ կին մը մեռցուցեր է՝ եզը պիտի քարկոծուի, ու անոր տէրն ալ մեռցուի։

Եթէ փրկանք մը պարտադրուի իրեն, իր անձին փրկութեան համար՝ պիտի վճարէ ինչ որ իրեն պարտադրուի։

Որդիի մը թէ աղջիկի մը զարկած ըլլայ եզը, ա՛յս կանոնին համաձայն պիտի ըլլայ անոր։

Եթէ եզը ստրուկի մը կամ աղախինի մը զարնէ, իր տէրը երեսուն սիկղ արծաթ պիտի տայ անոնց տիրոջ, իսկ եզը պիտի քարկոծուի։

Երբ մէկը հոր մը բանայ, կամ մէկը հոր մը փորէ եւ չծածկէ, ու հոն եզ մը կամ էշ մը իյնայ,

հորին տէրը պիտի հատուցանէ եւ անոնց տիրոջ դրամ պիտի տայ. սակայն մեռածը իրը պիտի ըլլայ։

Երբ մէկուն եզը իր ընկերին եզին զարնէ ու մեռցնէ, ողջ եզը պիտի ծախեն եւ անոր դրամը բաժնեն, ու մեռածն ալ բաժնեն։

Իսկ եթէ գիտցուած էր թէ եզը առաջուընէ զարնող է, բայց անոր տէրը զայն ներս պահած չէ, անշո՛ւշտ պիտի հատուցանէ՝ եզի փոխարէն եզ. սակայն մեռածը իրը պիտի ըլլայ»։