Exodus 22

Genesis  «  Exodus 21  ‹  Exodus 22  ›  Exodus 23  »  Leviticus

ՀԱՏՈՒՑՈՒՄԻ ՕՐԷՆՔՆԵՐ

«Երբ մէկը եզ մը կամ ոչխար մը գողնայ, ու մորթէ կամ ծախէ զայն, մէկ եզին փոխարէն հինգ արջառ եւ մէկ ոչխարին փոխարէն չորս ոչխար պիտի հատուցանէ։

Երբ գող մը տուն ծակելու ատեն գտնուի, զարնուի ու մեռնի, անոր համար արիւնի վրէժխնդրութիւն պիտի չըլլայ։

Եթէ անոր վրայ արեւը ծագած էր, անոր համար արիւնի վրէժխնդրութիւն պիտի ըլլայ, որովհետեւ ան կրնար լման հատուցանել. եթէ ոչինչ ունենար, իր գողցածին համար կրնար ծախուիլ։

Եթէ գողցածը իր ձեռքը ողջ գտնուի, եզ ըլլայ թէ էշ կամ ոչխար, կրկինը պիտի հատուցանէ։

Երբ մէկը արտի մը կամ այգիի մը ¹վնաս տայ՝՝, արձակելով իր անասունը որ ուրիշի մը արտին մէջ արածի, իր արտին լաւագոյն բերքէն եւ այգիին լաւագոյն բերքէն պիտի հատուցանէ։

Եթէ կրակ ²ցայտէ, ցանկապատին փուշերուն փակչի, ու ցորենի խուրձերը, կամ հասուն ցորենը, եւ կամ արտը սպառին, կրակը վառողը այրածին արժէքը լման պիտի հատուցանէ։

Երբ մէկը իր ընկերին դրամ կամ առարկայ յանձնէ՝ պահելու համար, եւ այդ մարդուն տունէն գողցուի, եթէ գողը գտնուի՝ կրկի՛նը թող հատուցանէ։

Եթէ գողը չգտնուի, տան տէրը պիտի ներկայանայ դատաւորներուն, ստուգելու համար թէ իր ձեռքը դպցուցա՛ծ է իր ընկերին ստացուածքին։

Ամէն տեսակ յանցանքի համար, եզի, իշու, ոչխարի կամ հանդերձի համար, կամ ամէն տեսակ կորսուած բանի համար՝ որ մէկը կը հաստատէ թէ իրն է, երկու կողմերուն խնդիրը դատաւորներուն առջեւ պիտի տարուի. ո՛վ որ դատաւորները դատապարտեն, անիկա կրկինը պիտի հատուցանէ իր ընկերին։

Երբ մէկը իր ընկերին էշ մը, եզ մը, ոչխար մը, կամ որեւէ անասուն յանձնէ՝ պահելու համար, եւ ան մեռնի, կամ վիրաւորուի, կամ ³թշնամին առնէ տանի՝՝ ու տեսնող մը չըլլայ,

երկուքին միջեւ Տէրոջ անունով երդումը պիտի հաստատէ թէ իր ընկերին ստացուածքին ձեռք դպցուցած չէ. անոր տէրը պիտի ընդունի երդումը, եւ ինք պիտի չհատուցանէ։

Բայց եթէ իրապէս իր քովէն գողցուած է, ինք անոր տիրոջ պիտի հատուցանէ։

Եթէ գազանէ բզքտուած է, թող բերէ զայն՝ իբր վկայութիւն, որ բզքտուածին արժէքը չհատուցանէ։

Երբ մէկը իր ընկերէն անասուն մը փոխ առնէ ու ան վիրաւորուի կամ մեռնի մինչ անոր տէրը անոր հետ չէ, ինք անշո՛ւշտ պիտի հատուցանէ.

բայց եթէ անոր տէրը անոր հետ էր, պիտի չհատուցանէ։ Եթէ վարձուած էր, վարձքին տեղ թող սեպուի»։

ԲԱՐՈՅԱԿԱՆ ԵՒ ԿՐՕՆԱԿԱՆ ՕՐԷՆՔՆԵՐ

«Երբ մէկը չնշանուած կոյս մը հրապուրէ ու անոր հետ պառկի, անշո՛ւշտ անոր օժիտը տալով զայն իրեն կին պիտի ընէ։

Եթէ աղջիկին հայրը բոլորովին մերժէ տալ, ան կոյսերու օժիտին չափ դրամ պիտի ⁴տայ։

Կախարդուհին ողջ մի՛ պահեր։

Ո՛վ որ անասունի հետ պառկի, անշո՛ւշտ պիտի մեռցուի։

Միմիայն Տէրոջմէն զատ ուրիշ աստուածներու զոհողը բոլորովին պիտի անճիտուի։

Գաղթականը մի՛ կեղեքեր եւ զայն մի՛ տանջեր. որովհետեւ դուք ալ Եգիպտոսի երկրին մէջ պանդուխտ էիք։

Ո՛չ մէկ այրի կամ որբ տառապեցուցէք։

Եթէ զանոնք տառապեցնէք որեւէ կերպով, եւ անոնք ինծի աղաղակեն, անշո՛ւշտ պիտի լսեմ անոնց աղաղակը.

իմ բարկութիւնս պիտի բորբոքի, ձեզ սուրով պիտի մեռցնեմ, ու ձեր կիները՝ այրի, ու ձեր որդիները՝ որբ պիտի ըլլան։

Երբ իմ ժողովուրդէս քու քովդ եղող դժբախտի մը դրամ փոխ տաս, վաշխառուի մը պէս մի՛ ըլլար անոր, ու վաշխ մի՛ դներ անոր վրայ։

Եթէ քու ընկերիդ հանդերձը գրաւ առնես, արեւը մայր չմտած իրեն վերադարձուր.

որովհետեւ ա՛յդ է միայն անոր ծածկոցը, իր մորթին հանդերձն է ատիկա. ինչո՞վ պիտի պառկի։ Եթէ ինծի աղաղակէ՝ մտիկ պիտի ընեմ, քանի որ ես ողորմած եմ։

Դատաւորներուն մի՛ հայհոյեր, եւ քու ժողովուրդիդ իշխանը մի՛ անիծեր։

Քու արմտիքներուդ ու հեղուկներուդ ⁵արդիւնքը մի՛ ուշացներ ինծի մատուցանել. քու որդիներուդ անդրանիկները ինծի պիտի տաս։

Քու եզիդ ու ոչխարիդ ալ սա՛պէս ըրէ.— եօթը օր իր մօր հետ պիտի ըլլայ, եւ ութերորդ օրը զայն ինծի պիտի տաս։

Դուք ինծի սուրբ մարդիկ պիտի ըլլաք. դաշտին մէջ գազաններէն բզքտուածին միսը մի՛ ուտէք, այլ՝ շուներո՛ւն նետեցէք»։