Exodus 26

Genesis  «  Exodus 25  ‹  Exodus 26  ›  Exodus 27  »  Leviticus

ԱՍՏՈՒԾՈՅ ՆԵՐԿԱՅՈՒԹԵԱՆ ՎՐԱՆԸ (Ելք. 36. 8-38)

«Խորանը շինէ՛ տասը վարագոյրով՝ մանուած բարակ քթանէ, կապուտակէ, ծիրանիէ ու կրկնակի կարմիրէ. շինէ՛ զանոնք՝ հնարագիտութեամբ գործուած քերովբէներով միասին։

Մէկ վարագոյրին երկայնքը քսանութ կանգուն ըլլայ, եւ մէկ վարագոյրին լայնքը՝ չորս կանգուն։ Բոլոր վարագոյրները մէկ չափ թող ունենան։

Հինգ վարագոյր իրարու թող կցուի, ու միւս հինգ վարագոյրն ալ իրարու թող կցուի։

Կցուածքին ծայրի մէկ վարագոյրին եզերքին վրայ կապուտակէ օղակնե՛ր շինէ. միւս կցուածքին ծայրի վարագոյրին եզերքն ալ նո՛յնպէս շինէ։

Մէկ վարագոյրին վրայ յիսո՛ւն օղակ շինէ, եւ միւս կցուածքին վրայ եղող վարագոյրին ծայրն ալ յիսո՛ւն օղակ շինէ. օղակները դէմ դիմաց թող ըլլան։

Յիսո՛ւն ոսկի ճարմանդ շինէ ու վարագոյրները ճարմանդներո՛վ կոճկէ, որպէսզի միակտուր խորան ըլլայ։

Այծի մազէ վարագոյրնե՛ր շինէ՝ որ վրան մը ըլլայ խորանին վրայ. տասնմէ՛կ վարագոյր շինէ։

Մէկ վարագոյրին երկայնքը երեսուն կանգուն ըլլայ, եւ մէկ վարագոյրին լայնքը՝ չորս կանգուն. տասնմէկ վարագոյրները մէ՛կ չափով ըլլան։

Հինգ վարագոյր զա՛տ կցէ, ու վեց վարագոյր՝ զատ. վեցերորդ վարագոյրը վրանին առջեւի կողմը երկուքի՛ ծալէ։

Կցուածքին ծայրը եղող մէկ վարագոյրին եզերքին վրայ յիսո՛ւն օղակ շինէ, եւ միւս կցուածքին ծայրը եղող վարագոյրին եզերքին վրայ՝ յիսուն օղակ։

Յիսո՛ւն պղինձէ ճարմանդ շինէ, ճարմանդները օղակներո՛ւն անցուր ու վրա՛նը կոճկէ, որպէսզի միակտուր ըլլայ։

Վրանին վարագոյրներէն աւելորդ մնացածը, այսինքն վարագոյրին աւելցած կէսը, խորանին ետեւը ¹կախուած թող մնայ։

Վրանին վարագոյրներուն երկայնքէն աւելցածը, մէկ կանգուն՝ մէկ կողմէն, եւ մէկ կանգուն՝ միւս կողմէն, կախուած թող մնայ խորանին կողմերը, զայն մէկ կողմէն ու միւս կողմէն ծածկելու համար։

Վրանին համար ծա՛ծք մը շինէ՝ կարմիր ներկուած խոյի մորթերէ, եւ ծածք մըն ալ անոր վրայ՝ իշղարի մորթերէ։

Խորանին համար կանգնած մնացող տախտակնե՛ր շինէ՝ սատիմի փայտէ։

Մէկ տախտակին երկայնքը տասը կանգուն ըլլայ, ու մէկ տախտակին լայնքը՝ մէկուկէս կանգուն։

Ամէն մէկ տախտակ երկու ագուցիկ ծայր թող ունենայ՝ իրարու առընթեր. խորանին բոլոր տախտակները ա՛յսպէս ըրէ։

Շինէ՛ խորանին տախտակները.— դէպի հարաւ՝ հարաւային կողմը քսան տախտակ շինէ,

ու քսան տախտակներուն տակ՝ քառասո՛ւն արծաթէ խարիսխ։ Մէկ տախտակի տակ՝ իր երկու ագուցիկ ծայրերը անցընելու համար երկու խարիսխ թող ըլլայ, եւ ուրիշ տախտակի մը տակ՝ իր երկու ագուցիկ ծայրերը անցընելու համար՝ երկու խարիսխ։

Խորանին միւս կողմին համար՝ հիւսիսային կողմը քսա՛ն տախտակ շինէ,

ու անոնց քառասուն արծաթէ խարիսխները.— մէկ տախտակի տակ՝ երկու խարիսխ, եւ ուրիշ տախտակի մը տակ՝ երկու խարիսխ։

Խորանին ետեւի կողմին համար՝ դէպի արեւմուտք վե՛ց տախտակ շինէ,

ու խորանին անկիւններուն համար՝ ետեւի կողմը երկո՛ւ տախտակ շինէ։

Ներքեւէն կրկնակ թող ըլլան, իսկ գագաթէն օղակով մը միացած. երկուքն ալ ա՛յսպէս թող ըլլան, երկու անկիւններուն համար թող ըլլան։

Այսպէս՝ անոնք ութ տախտակ պիտի ըլլան, ու անոնց արծաթէ խարիսխները՝ տասնվեց խարիսխ.— մէկ տախտակի տակ՝ երկու խարիսխ ըլլայ, եւ ուրիշ տախտակի մը տակ՝ երկու խարիսխ։

Սատիմի փայտէ նիգե՛ր շինէ. խորանին մէկ կողմի տախտակներուն համար՝ հինգ նիգ ըլլայ,

խորանին միւս կողմի տախտակներուն համար՝ հինգ նիգ, ու դէպի արեւմուտք՝ խորանին ետեւի կողմի տախտակներուն համար՝ հինգ նիգ։

Մէջտեղի նիգը, այսինքն տախտակներուն մէջտեղ եղողը, մէկ ծայրէն միւս ծայրը թող անցնի։

Տախտակները ոսկիո՛վ պատէ, եւ անոնց օղակները՝ այսինքն նիգերուն անցընելու տեղերը՝ ոսկիէ՛ շինէ։ Նիգերն ալ ոսկիո՛վ պատէ։

Խորանը կանգնեցո՛ւր այն ձեւին համաձայն, որ լերան վրայ քեզի ցոյց տրուեցաւ։

Վարագո՛յր մը շինէ՝ կապուտակէ, ծիրանիէ, կրկնակի կարմիրէ ու մանուած բարակ քթանէ. հնարագիտութեամբ գործուած քերովբէներով միասին թող շինուի։

Զայն դի՛ր սատիմի փայտէ չորս ոսկեպատ սիւնի վրայ. անոնց ²ճանկերը ոսկիէ ըլլան, ու չորս արծաթէ խարիսխի վրայ թող դրուին։

Վարագոյրը ճարմանդներէ՛ն վար կախէ, եւ հո՛ն բեր՝ վարագոյրին ներսը՝ Վկայութեան տապանակը։ Վարագոյրը ձեզի համար Սրբութիւնը պիտի զատէ Սրբութիւններու սրբութենէն։

Եւ Քաւութիւնը դի՛ր Վկայութեան տապանակին վրայ, Սրբութիւններու սրբութեան մէջ։

Վարագոյրէն դո՛ւրս դիր սեղանը, ու սեղանին դիմաց՝ խորանին հարաւային կողմը՝ աշտանակը. սեղանը դի՛ր հիւսիսային կողմը։

Վրանին մուտքին համար ասեղնագործ վարագո՛յր մը շինէ՝ կապուտակէ, ծիրանիէ, կրկնակի կարմիրէ եւ մանուած բարակ քթանէ։

Դրան վարագոյրին համար սատիմի փայտէ հի՛նգ սիւն շինէ ու զանոնք ոսկիո՛վ պատէ. անոնց ճանկերը ոսկիէ ըլլան, եւ անոնց համար պղինձէ հի՛նգ խարիսխ ձուլէ»։