Exodus 30

Genesis  «  Exodus 29  ‹  Exodus 30  ›  Exodus 31  »  Leviticus

ԽՈՒՆԿ ԾԽԵԼՈՒ ԶՈՀԱՍԵՂԱՆԸ (Ելք. 37. 25-28)

«Խունկ ծխելու զոհասեղա՛ն մը շինէ. սատիմի՛ փայտէ շինէ զայն։

Անոր երկայնքը կանգուն մը ըլլայ, անոր լայնքը՝ կանգուն մը — քառակուսի թող ըլլայ —, եւ անոր բարձրութիւնը՝ երկու կանգուն։ Անոր եղջիւրները իրմէ առնուած ըլլան։

Զայն զո՛ւտ ոսկիով պատէ — անոր վրան, անոր կողմերը՝ բոլորաձեւ, ու անոր եղջիւրները —, եւ անոր շուրջը ոսկի շրջանա՛կ մը շինէ։

Անոր երկո՛ւ ոսկի օղակ շինէ՝ անոր շրջանակին տակ, անոր երկու անկիւնները. անոր երկո՛ւ կողմերուն վրայ շինէ, որպէսզի անոնք անցընելու տեղեր ըլլան ձողերուն՝ զայն ասոնցմով կրելու համար։

Ձողերը սատիմի՛ փայտէ շինէ եւ զանոնք ոսկիո՛վ պատէ։

Զայն դի՛ր Վկայութեան տապանակին քով եղող վարագոյրին առջեւ — Վկայութեան վրայ եղող Քաւութեան առջեւ —, ուր ես քեզի պիտի հանդիպիմ։

Ահարոն անոր վրայ անուշաբոյր խունկ թող ծխէ. ամէն առտու, երբ ճրագները յարդարէ՝ խունկ թող ծխէ։

Նաեւ իրիկուան դէմ, երբ ճրագները վառէ՝ Ահարոն խունկ թող ծխէ, որ Տէրոջ առջեւ մշտատեւ խունկ ըլլայ ձեր սերունդներուն մէջ։

Անոր վրայ օտար խունկ, կամ ողջակէզ, կամ հացի ընծայ մի՛ մատուցանէք. անոր վրայ թափելիք նուէր մի՛ ¹ընծայէք։

Ահարոն տարին մէ՛կ անգամ անոր եղջիւրներուն վրայ թող քաւութիւն ընէ. քաւութիւններուն մեղքի պատարագին արիւնով անոր վրայ թող քաւութիւն ընէ տարին մէ՛կ անգամ, ձեր սերունդներուն մէջ։ Ասիկա ամենասուրբ է Տէրոջ»։

ՏԷՐՈՋ ՆԵՐԿԱՅՈՒԹԵԱՆ ՎՐԱՆԻՆ ՏՈՒՐՔԸ

Տէրը խօսեցաւ Մովսէսի՝ ըսելով.

«Երբ Իսրայէլի որդիներուն գումարը առնես՝ իրենց թուարկումին համեմատ, անոնցմէ իւրաքանչիւրը իր անձին փրկանքը թող տայ Տէրոջ՝ զանոնք թուարկած ատենդ, որպէսզի անոնց մէջ հարուած չըլլայ երբ զանոնք թուարկես։

Անոնք սա՛ թող տան. ամէն մէկը որ կ’անցնի թուարկումէն՝ սրբարանի սիկղին համեմատ կէս սիկղ արծաթ թող տայ։ Մէկ սիկղը քսան կերատ է. Տէրոջ բարձրացնելիք ընծան կէս սիկղ ըլլայ։

Ամէն քսան տարեկանէն վեր եղող՝ որ կ’անցնի թուարկումէն, բարձրացնելիք ընծայ թող տայ Տէրոջ։

Երբ ձեր անձերուն քաւութիւն ընելու համար Տէրոջ բարձրացնելիք ընծան տաք՝ կէս սիկղէն ո՛չ աւելի թող տայ հարուստը, ո՛չ ալ պակաս՝ չքաւորը։

Իսրայէլի որդիներէն ա՛ռ քաւութեան արծաթը եւ ²յատկացո՛ւր Հանդիպումի վրանին ծառայութեան, որպէսզի Տէրոջ առջեւ յիշատակ ըլլայ Իսրայէլի որդիներուն՝ ձեր անձերուն քաւութիւն ընելու համար»։

ՊՂԻՆՁԷ ԱՒԱԶԱՆԸ

Տէրը խօսեցաւ Մովսէսի՝ ըսելով.

«Նաեւ պղինձէ աւազա՛ն մը շինէ լուացումի համար. անոր խարիսխն ալ պղինձէ ըլլայ։ Հանդիպումի վրանին եւ զոհասեղանին մէջտե՛ղ դիր զայն, ու ջո՛ւր լեցուր անոր մէջ։

Ահարոն եւ իր որդիները անոր մէջ թող լուան իրենց ձեռքերն ու ոտքերը։

Երբ անոնք Հանդիպումի վրանը մտնեն, կամ երբ զոհասեղանին մօտենան՝ պաշտօն կատարելու եւ Տէրոջ պատարագ մատուցանելու համար, ջուրով թող լուացուին՝ որպէսզի չմեռնին։

Ուստի իրենց ձեռքերն ու ոտքերը թող լուան, որպէսզի չմեռնին. ասիկա իրենց յաւիտենական կանոն թող ըլլայ, թէ՛ իրեն եւ թէ՛ իր զարմին՝ իրենց սերունդներուն մէջ»։

ՕԾՈՒՄԻՆ ԻՒՂԸ

Տէրը խօսեցաւ Մովսէսի՝ ըսելով.

«Ա՛ռ քեզի ³պատուական բուրաւէտ համեմներ,— զուտ զմուռս՝ հինգ հարիւր սիկղ, անոր կէսին չափ՝ այսինքն երկու հարիւր յիսուն սիկղ բուրաւէտ կինամոն, երկու հարիւր յիսուն սիկղ բուրաւէտ խունկեղէգ,

հինգ հարիւր սիկղ կասիա՝ սրբարանի սիկղին համեմատ, ու մէկ հիմէն ձէթ,—

եւ սուրբ օծումի ի՛ւղ շինէ զանոնք, ⁴բուրագործի արհեստին համեմատ բաղադրուած օծանելիք մը։ Ան սուրբ օծումի իւղ թող ըլլայ,

ու անո՛վ օծէ Հանդիպումի վրանը, Վկայութեան տապանակը,

սեղանը եւ անոր բոլոր առարկաները, աշտանակն ու անոր առարկաները, խունկին զոհասեղանը,

ողջակէզին զոհասեղանը՝ իր բոլոր առարկաներուն հետ, աւազանն ու անոր խարիսխը։

Սրբացո՛ւր զանոնք, որպէսզի ամենասուրբ ըլլան. ինչ որ անոնց դպչի՝ սուրբ պիտի ըլլայ։

Ահարոն եւ իր որդիները օծէ՛ ու զանոնք սրբացո՛ւր, որպէսզի ինծի քահանայութիւն կատարեն։

Իսրայէլի որդիներուն ըսէ՛. “Ասիկա ինծի օծումի սուրբ իւղ թող ըլլայ ձեր սերունդներուն մէջ։

Զայն մարդու մարմինի վրայ մի՛ թափէք, եւ անոր չափերուն համեմատ անոր նմանը մի՛ շինէք։ Ասիկա սուրբ է, ու ձեզի սուրբ պիտի ըլլայ։

Ո՛վ որ անոր նմանը բաղադրէ, կամ ո՛վ որ անկէ ⁵օտարի վրայ դնէ, իր ժողովուրդէն պիտի բնաջնջուի”»։

ԽՈՒՆԿԸ

Տէրը Մովսէսի ըսաւ. «Ա՛ռ քեզի բոյրեր, այսինքն՝ ստաշխ, եղունգ եւ քաղբան, այս բոյրերը՝ զուտ կնդրուկով. ամէն մէկէն՝ հաւասար ծանրութեամբ թող ըլլայ։

Անոնցմով խո՛ւնկ շինէ՝ բուրագործի արհեստին համեմատ բաղադրուած, ⁶իրարու խառնուած՝՝, մաքուր ու սուրբ։

Անկէ ծեծէ՛ քիչ մը՝ շատ մանր, եւ դի՛ր Հանդիպումի վրանին մէջ՝ Վկայութեան առջեւ, ուր ես քեզի պիտի հանդիպիմ։ Ան ձեզի ամենասուրբ պիտի ըլլայ։

Այդ շինելիք խունկիդ չափերուն համեմատ դուք ձեզի համար մի՛ շինէք. ան քեզի սուրբ պիտի ըլլայ, Տէրոջ նուիրուած։

Ո՛վ որ հոտոտելու համար անոր նմանը շինէ, իր ժողովուրդէն պիտի բնաջնջուի»։