Exodus 33

Genesis  «  Exodus 32  ‹  Exodus 33  ›  Exodus 34  »  Leviticus

ԱՍՏՈՒԱԾ ԿԸ ՀՐԱՄԱՅԷ ԻՍՐԱՅԷԼԻ ԹՈՂՈՒԼ ՍԻՆԱ ԼԵՌԸ

Տէրը Մովսէսի ըսաւ. «Վե՛ր ելիր ասկէ, դուն ու ժողովուրդը որ Եգիպտոսի երկրէն բարձրացուցիր, եւ գնա՛ այն երկիրը, որ երդումով խոստացայ Աբրահամի, Իսահակի ու Յակոբի՝ ըսելով. “Քու զարմիդ պիտի տամ զայն”։

Քու առջեւէդ հրեշտակ մը պիտի ղրկեմ եւ Քանանացին, Ամորհացին, Քետացին, Փերեզացին, Խեւացին ու Յեբուսացին պիտի վռնտեմ։

Բարձրացի՛ր կաթ ու մեղր հոսեցնող երկիրը. բայց ես ¹ձեզի հետ՝՝ պիտի չբարձրանամ, որպէսզի քեզ ճամբան չսպառեմ, քանի որ դուն խստապարանոց ժողովուրդ մըն ես»։

Երբ ժողովուրդը այս չարագուշակ լուրը լսեց՝ սգաց, եւ ո՛չ մէկը իր զարդերը իր վրայ դրաւ։

Տէրը ըսած էր Մովսէսի. «Ըսէ՛ Իսրայէլի որդիներուն. “Դուք խստապարանոց ժողովուրդ մըն էք. եթէ վայրկեան մը քու մէջդ բարձրանամ, քեզ պիտի սպառեմ. ուստի հիմա քու վրայէդ վերցո՛ւր զարդերդ, որպէսզի գիտնամ թէ ի՛նչ պիտի ընեմ քեզի”»։

Ուստի Իսրայէլի որդիները իրենց զարդերը հանեցին Քորեբ լերան քով։

ՏԷՐՈՋ ՆԵՐԿԱՅՈՒԹԵԱՆ ԽՈՐԱՆԸ

Մովսէս առաւ վրանը ու բանակավայրէն դուրս լարեց զայն, բանակավայրէն հեռու, եւ Հանդիպումի վրան կոչեց զայն։ Ո՛վ որ Տէրը կը ²խնդրէր, դուրս կ’ելլէր դէպի Հանդիպումի վրանը՝ որ բանակավայրէն դուրս էր։

Երբ Մովսէս դուրս կ’ելլէր՝ դէպի վրանը, ամբողջ ժողովուրդը ոտքի կ’ելլէր, իւրաքանչիւրը իր վրանին մուտքը կը կայնէր ու Մովսէսի ետեւէն կը նայէր, մինչեւ որ ան վրանը մտնէր։

Երբ Մովսէս վրանը մտնէր, ամպի սիւնը կ’իջնէր եւ վրանին մուտքը կը կենար, ու Տէրը Մովսէսի հետ կը խօսէր։

Ամբողջ ժողովուրդը կը տեսնէր թէ ամպի սիւնը վրանին մուտքը կեցած է. ամբողջ ժողովուրդը ոտքի կ’ելլէր եւ իւրաքանչիւրը կ’երկրպագէր՝ իր վրանին մուտքը։

Տէրը կը խօսէր Մովսէսի հետ՝ երես առ երես, ինչպէս մարդ մը իր բարեկամին հետ կը խօսի. ապա Մովսէս բանակավայրը կը վերադառնար։ Բայց անոր սպասարկուն, Նաւէի որդին՝ Յեսու երիտասարդը, վրանէն չէր հեռանար։

ՏԷՐԸ ԿԸ ԽՈՍՏԱՆԱՅ ԻՐ ԺՈՂՈՎՈՒՐԴԻՆ ՀԵՏ ԸԼԼԱԼ

Մովսէս Տէրոջ ըսաւ. «Նայէ՛, դուն ինծի կ’ըսես. “Բարձրացո՛ւր այս ժողովուրդը”. բայց դուն ինծի չգիտցուցիր թէ ո՛վ ինծի հետ պիտի ղրկես։ Սակայն ըսիր. “Քեզ անունովդ կը ճանչնամ”. նաեւ. “Իմ ³առջեւս շնորհք գտար”։

Ուստի հիմա կ’աղերսե՛մ, եթէ քու առջեւդ շնորհք գտայ, ⁴ցուցո՛ւր ինծի քու ճամբադ, կ’աղերսե՛մ, որ ճանչնամ քեզ, որպէսզի քու առջեւդ շնորհք գտնեմ. եւ ⁵յիշէ՛ թէ այս ազգը քո՛ւ ժողովուրդդ է»։

Ան ըսաւ. «Իմ ներկայութիւնս քեզի հետ պիտի երթայ, ու քեզ պիտի հանգստացնեմ»։

Մովսէս անոր ըսաւ. «Եթէ քու ներկայութիւնդ մեզի հետ չերթայ, մեզ ասկէ մի՛ հաներ։

Արդարեւ ի՞նչպէս պիտի գիտցուի թէ ես եւ քու ժողովուրդդ քու առջեւդ շնորհք գտանք. միթէ քու մեզի հետ երթալովդ չէ՞։ Այսպէս՝ ես ու քու ժողովուրդդ երկրագունդի մակերեսին վրայ եղող բոլոր ժողովուրդներէն պիտի զատորոշուինք»։

Տէրը Մովսէսի ըսաւ. «Այս բանն ալ պիտի ընեմ՝ որ դուն ըսիր, որովհետեւ իմ առջեւս շնորհք գտար ու ես քեզ անունովդ կը ճանչնամ»։

Մովսէս ըսաւ. «Կ’աղերսե՛մ, քու փա՛ռքդ ցոյց տուր ինծի»։

Տէրը ըսաւ. «Իմ ամբողջ բարութիւնս քու առջեւէդ պիտի անցընեմ, ու Տէրոջ անունը քու առջեւդ պիտի կանչեմ. անո՛ր որ պիտի ողորմիմ՝ կ’ողորմիմ, եւ անո՛ր վրայ որ պիտի գթամ՝ կը գթամ»։

Նաեւ աւելցուց. «Դուն երեսս չես կրնար տեսնել. որովհետեւ ո՛չ մէկ մարդ կրնայ զիս տեսնել ու ողջ մնալ»։

Տէրը ըսաւ. «Ահա՛ քովս տեղ մը կայ. վէմի՛ն վրայ կայնէ։

Երբ իմ փառքս անցնի, քեզ վէմին ծակին մէջ պիտի դնեմ եւ քեզ ափովս պիտի ծածկեմ, մինչեւ որ ես անցնիմ։

Յետոյ ափս պիտի վերցնեմ, ու իմ ետեւէս պիտի տեսնես. բայց երեսս պիտի չտեսնուի»։