Exodus 36

Genesis  «  Exodus 35  ‹  Exodus 36  ›  Exodus 37  »  Leviticus

Այն ատեն Բեսելիէլ, Ոհողիաբ եւ բոլոր սիրտով իմաստունները, որոնց որ Տէրը իմաստութիւն ու հանճար տուաւ՝ կատարել գիտնալու համար սրբարանի ծառայութեան ամէն տեսակ գործ, Տէրոջ բոլոր պատուիրածներուն համաձայն ըրին։

ԺՈՂՈՎՈՒՐԴԸ ԿԸ ԲԵՐԷ ՇԱՏ ԸՆԾԱՆԵՐ

Մովսէս կանչեց Բեսելիէլն ու Ոհողիաբը, եւ բոլոր սիրտով իմաստունները՝ որոնց սիրտին մէջ Տէրը իմաստութիւն դրաւ, այսինքն բոլոր անոնք՝ որ պատրաստակամ սիրտով գործին մօտեցան, զայն ընելու համար։

Անոնք Մովսէսէ առին բոլոր բարձրացնելիք ընծաները, որ Իսրայէլի որդիները բերին՝ սրբարանի ծառայութեան գործը անոնցմով ընելու համար։ Սակայն ասոնք տակաւին ամէն առտու յօժարակամ ընծաներ կը բերէին անոր։

Սրբարանին ամբողջ գործը կատարող բոլոր իմաստուն մարդիկը՝ իւրաքանչիւրը իր ըրած գործէն եկաւ,

եւ խօսեցան Մովսէսի՝ ըսելով. «Ժողովուրդը աւելի՛ կը բերէ, քան որչափ պէտք է՝ ծառայելու այն գործին, որ Տէրը պատուիրեց ընել»։

Ուստի Մովսէս պատուիրեց բանակավայրին մէջ ¹ծանուցանել. «Ա՛լ ո՛չ մարդ, ո՛չ կին թող գործ ընէ սրբարանին բարձրացնելիք ընծային համար»։ Այսպէս ժողովուրդը ընծայ բերելէն դադրեցաւ,

որովհետեւ բերուած նիւթերը ամբողջ գործը ընելու համար բաւական էին, եւ աւելցան ալ։

ՏԷՐՈՋ ՆԵՐԿԱՅՈՒԹԵԱՆ ՎՐԱՆԻՆ ՇԻՆՈՒԹԻՒՆԸ (Ելք. 26. 1-37)

Խորանին գործը կատարողներէն ամէն սիրտով իմաստուն՝ տասը վարագոյր շինեց մանուած բարակ քթանէ, կապուտակէ, ծիրանիէ ու կրկնակի կարմիրէ. զանոնք հնարագիտութեամբ գործուած քերովբէներով միասին շինեց։

Մէկ վարագոյրին երկայնքը՝ քսանութ կանգուն էր, եւ մէկ վարագոյրին լայնքը՝ չորս կանգուն. բոլոր վարագոյրները մէկ չափ ունէին։

Հինգ վարագոյր իրարու կցեց, միւս հինգ վարագոյրն ալ իրարու կցեց։

Կցուածքին ծայրի մէկ վարագոյրին եզերքին վրայ կապուտակէ օղակներ շինեց. միւս կցուածքին ծայրի վարագոյրին եզերքն ալ նոյնպէս շինեց։

Մէկ վարագոյրին վրայ յիսուն օղակ շինեց, եւ միւս կցուածքին վրայ եղող վարագոյրին ծայրն ալ յիսուն օղակ շինեց. օղակները դէմ դիմաց էին։

Յիսուն ոսկի ճարմանդ շինեց, ու վարագոյրները ճարմանդներով իրարու կոճկեց. այսպէս՝ խորանը միակտուր եղաւ։

Խորանին վրայի վրանին համար այծի մազէ վարագոյրներ շինեց. անոնցմէ տասնմէկ վարագոյր շինեց։

Մէկ վարագոյրին երկայնքը երեսուն կանգուն էր, եւ մէկ վարագոյրին լայնքը՝ չորս կանգուն. տասնմէկ վարագոյրը մէկ չափ ունէր։

Հինգ վարագոյր զատ կցեց, ու վեց վարագոյր՝ զատ։

Կցուածքին ծայրի վարագոյրին եզերքին վրայ յիսուն օղակ շինեց, եւ միւս կցուածքին ծայրի վարագոյրին եզերքին վրայ՝ յիսուն օղակ։

Յիսուն պղինձէ ճարմանդ շինեց, որպէսզի վրանը կոճկէ ու միակտուր ըլլայ։

Վրանին համար կարմիր ներկուած խոյի մորթերէ ծածք մը շինեց, եւ անոր վրայ՝ իշղարի մորթերէ ծածք մը։

Խորանին համար կանգնած մնացող տախտակներ շինեց՝ սատիմի փայտէ։

Մէկ տախտակին երկայնքը տասը կանգուն էր, ու մէկ տախտակին լայնքը՝ մէկուկէս կանգուն։

Ամէն մէկ տախտակ իրարու առընթեր երկու ագուցիկ ծայր ունէր. խորանին բոլոր տախտակները ա՛յսպէս ըրաւ։

Խորանին տախտակներ շինեց.— դէպի հարաւ՝ անոր հարաւային կողմին համար քսան տախտակ,

ու քսան տախտակներուն տակ՝ քառասուն արծաթէ խարիսխ. այսինքն մէկ տախտակի տակ՝ իր երկու ագուցիկ ծայրերը անցընելու համար երկու խարիսխ շինեց, եւ ուրիշ տախտակի մը տակ՝ իր երկու ագուցիկ ծայրերը անցընելու համար՝ երկու խարիսխ։

Խորանին միւս կողմին համար՝ դէպի հիւսիս քսան տախտակ շինեց,

ու անոնց քառասուն արծաթէ խարիսխները.— մէկ տախտակի տակ՝ երկու խարիսխ, եւ ուրիշ տախտակի մը տակ՝ երկու խարիսխ։

Խորանին ետեւի կողմին համար՝ դէպի արեւմուտք վեց տախտակ շինեց։

Խորանին ետեւի կողմի անկիւններուն համար երկու տախտակ շինեց։

Անոնք ներքեւէն կրկնակ էին, իսկ գագաթէն օղակով մը կը միանային։ Երկուքին ալ երկու անկիւնները ա՛յսպէս ըրաւ։

Այսպէս՝ ութ տախտակ էին, ու անոնց արծաթէ խարիսխները՝ տասնվեց խարիսխ էին, ամէն մէկ տախտակի տակ՝ երկու խարիսխ։

Սատիմի փայտէ նիգեր շինեց. խորանին մէկ կողմի տախտակներուն համար՝ հինգ,

խորանին միւս կողմի տախտակներուն համար՝ հինգ նիգ, եւ խորանին ետեւի կողմի — դէպի արեւմուտք եղող — տախտակներուն համար՝ հինգ նիգ։

Մէջտեղի նիգը այնպէս շինեց, որ տախտակներուն մէջտեղէն՝ մէկ ծայրէն միւս ծայրը անցնի։

Տախտակները ոսկիով պատեց, ու անոնց օղակները ոսկիէ շինեց՝ նիգերուն անցընելու տեղեր ըլլալու համար։ Նիգերն ալ ոսկիով պատեց։

Կապուտակէ, ծիրանիէ, կրկնակի կարմիրէ ու մանուած բարակ քթանէ շինեց վարագոյրը. հնարագիտութեամբ գործուած՝ քերովբէներով միասին շինեց զայն։

Սատիմի փայտէ չորս սիւն շինեց անոր, եւ ոսկիով պատեց զանոնք. անոնց ճանկերը ոսկիէ էին. անոնց չորս արծաթէ խարիսխ ձուլեց։

Վրանի մուտքին համար՝ կապուտակէ, ծիրանիէ, կրկնակի կարմիրէ եւ մանուած բարակ քթանէ ասեղնագործ վարագոյր մը շինեց։

Անոր հինգ սիւներն ու անոնց ճանկերը շինեց, եւ անոնց խոյակներն ու կապերը ոսկիով պատեց. անոնց հինգ խարիսխները պղինձէ էին։