Ezra 1

2 Chronicles  «  2 Chronicles 36  ‹  Ezra 1  ›  Ezra 2  »  Nehemiah

ԿԻՒՐՈՍ Կ’ԱՐՏՕՆԷ ՀՐԵԱՆԵՐՈՒՆ ՎԵՐԱԴԱՐՁԸ

Պարսկաստանի Կիւրոս թագաւորին առաջին տարին, որպէսզի Երեմիայի բերանով ըսուած ¹Տէրոջ խօսքը ²իրագործուի, Տէրը Պարսկաստանի Կիւրոս թագաւորին հոգին արթնցուց, եւ ան իր ամբողջ թագաւորութեան մէջ ³ծանուցանել տուաւ ու նաեւ հրովարտակ գրեց՝ ըսելով.

«Սա՛ կը յայտարարէ Կիւրոս՝ Պարսկաստանի թագաւորը. “Երկինքի Աստուածը՝ Եհովան երկրի բոլոր թագաւորութիւնները ինծի տուաւ, եւ ի՛նք ինծի հրահանգեց որ ⁴Հրէաստանի Երուսաղէմին մէջ իրեն տուն մը կառուցանեմ։

Ձեզմէ ո՛վ որ անոր ամբողջ ժողովուրդէն է, իր Աստուածը՝ Եհովան իրեն հետ թող ըլլայ, ու Հրէաստանի Երուսաղէմը թող բարձրանայ եւ Իսրայէլի Աստուծոյն՝ Եհովայի — Երուսաղէմի մէջ եղող Աստուծոյն — տունը կառուցանէ։

Ամէն տեղ ուր մնացողներէն իւրաքանչիւրը պանդխտացած է, իր ⁵քաղաքացիները արծաթով, ոսկիով, ինչքով եւ անասուններով թող նեցուկ ըլլան իրեն, Երուսաղէմի մէջ եղող Աստուծոյն տան համար տրուած յօժարակամ ընծաներէն զատ”»։

Այն ատեն Յուդայի եւ Բենիամինի ⁶նահապետները, քահանաներն ու Ղեւտացիները կանգնեցան այն բոլոր մարդոց հետ, որոնց հոգին Աստուած արթնցուցած էր, որպէսզի բարձրանան եւ Երուսաղէմ եղող Տէրոջ տունը կառուցանեն։

Անոնց շուրջը եղողներէն բոլորն ալ իրենց ⁷օգնեցին արծաթէ առարկաներով, ոսկիով, ինչքով, անասուններով ու թանկագին իրերով, բոլոր յօժարակամ ընծայուածներէն զատ։

Կիւրոս թագաւորը Տէրոջ տան անօթները դուրս հանեց, որոնք Նաբուգոդոնոսոր Երուսաղէմէն հանելով՝ իր աստուծոյն տունը դրեր էր։

Պարսկաստանի Կիւրոս թագաւորը զանոնք Միթրիդատ գանձապետին ձեռքով դուրս հանել տուաւ, եւ զանոնք ⁸համրանքով յանձնեց՝՝ Յուդայի Սասբասար իշխանին։

Ահա՛ւասիկ անոնց թիւը.— երեսուն ոսկիէ կոնք, հազար արծաթէ կոնք, քսանինը դանակ,

երեսուն ոսկիէ ըմպանակ, չորս հարիւր տասը արծաթէ ըմպանակ՝ երկրորդ կարգի, ու հազարաւոր ուրիշ անօթներ։

Բոլոր ոսկիէ եւ արծաթէ առարկաները՝ հինգ հազար չորս հարիւր հատ էին։ Սասբասար ասոնք բոլորը ⁹տարաւ, երբ տարագրութեան գացողները Բաբելոնէն Երուսաղէմ ¹⁰վերադարձան։