Ezra 4

2 Chronicles  «  Ezra 3  ‹  Ezra 4  ›  Ezra 5  »  Nehemiah

ՏԱՃԱՐԻՆ ՇԻՆՈՒԹԵԱՆ ԸՆԴԴԻՄՈՒԹԻՒՆ

Երբ Յուդայի ու Բենիամինի թշնամիները լսեցին թէ ¹տարագրութենէն վերադարձողները՝՝ Տէրոջ՝ Իսրայէլի Աստուծոյն տաճարը կը կառուցանեն,

Զօրաբաբէլի ու նահապետներուն ներկայացան եւ անոնց ըսին. «Մե՛նք ալ ձեզի հետ կառուցանենք. արդարեւ մենք ալ ձեզի պէս ձեր Աստուածը կը փնտռենք, ու մեզ հոս ²բերող Ասորեստանի Ասորդան թագաւորին օրերէն ի վեր անոր զոհ կը մատուցանենք»։

Բայց Զօրաբաբէլ, Յեսու եւ Իսրայէլի նահապետներուն մնացորդը անոնց ըսին. «Դուք մեզի հետ ո՛չ մէկ գործ ունիք՝ մեր Աստուծոյն տուն մը կառուցանելու համար. հապա միայն մենք պիտի կառուցանենք Տէրոջ՝ Իսրայէլի Աստուծոյն տունը, ինչպէս Պարսկաստանի թագաւորը — Կիւրոս թագաւորը — մեզի պատուիրեց»։

Ուստի այդ երկրին ժողովուրդը Յուդայի ժողովուրդին ձեռքերը թուլցուց, ու զանոնք շփոթեցուց՝ որ չկառուցանեն։

Անոնց ծրագիրը ձախողեցնելու համար՝ անոնց դէմ խորհրդականներ վարձեցին Պարսկաստանի Կիւրոս թագաւորին բոլոր օրերը, եւ մինչեւ Պարսկաստանի Դարեհ թագաւորին թագաւորութիւնը։

Ասուերոսի թագաւորութեան ատեն, անոր թագաւորութեան սկիզբը, Հրէաստանի ու Երուսաղէմի բնակիչներուն դէմ ամբաստանագիր գրեցին։

Արտաշէսի օրերը՝ Բեսեղամ, Միթրիդատ, Տաբէէլ եւ իրենց մնացեալ ընկերները Պարսկաստանի Արտաշէս թագաւորին գրեցին։ Տեղեկագիրը ³ասորական գիրերով գրուած էր, ու ⁴մեկնութիւնը ⁵ասորերէն էր։

Հռէում հրամանատարը եւ Սամսայ ատենադպիրը Երուսաղէմի դէմ սա՛ կերպով նամակ մը գրեցին Արտաշէս թագաւորին։

ԵՐՈՒՍԱՂԷՄԻ ՇԻՆՈՒԹԵԱՆ ԸՆԴԴԻՄՈՒԹԻՒՆ

(Այն ատեն Հռէում հրամանատարը, Սամսայ ատենադպիրը եւ իրենց մնացեալ ընկերները՝ Դինացիները, Ափարսաթաքացիները, Տարփաղեցիները, Ափերսացիները, Արքուեցիները, Բաբելոնացիները, Շուշանացիները, Դաւեցիները, Եղամացիները,

նաեւ մնացեալ ժողովուրդները, որոնք մեծ ու պատուական Ասենափարը փոխադրեց ու Սամարիայի քաղաքներուն մէջ բնակեցուց, եւ ուրիշներ, որոնք Գետին այս կողմը կը գտնուին, եւայլն, նամակ մը գրեցին։)

Ահա՛ւասիկ այն նամակին պատճէնը, որ իրեն ղրկեցին. «Արտաշէս թագաւորին. քու ծառաներդ, Գետին այս կողմը բնակող մարդիկը, եւայլն։

Թագաւորը թող գիտնայ թէ քու քովէդ մեզի ⁶վերադարձող Հրեաները Երուսաղէմ եկան, եւ այդ ըմբոստ ու անիրաւ քաղաքը կը կառուցանեն՝ պարիսպներ ⁷վերականգնելով եւ հիմեր ⁸նորոգելով։

Թագաւորը հիմա թող գիտնայ թէ եթէ այս քաղաքը վերստին կառուցանուի եւ անոր պարիսպները վերականգնին, անոնք հարկ, տուրք ու մաքս պիտի չվճարեն. այսպէս՝ թագաւորներու եկամուտին վնաս տուած պիտի ըլլաս։

Քանի պալատէն ⁹կը ստանանք մեր թոշակը՝՝, չէինք կրնար թագաւորին իրաւազրկութեան հանդուրժել. հետեւաբար այս նամակը ղրկեցինք ու թագաւորին գիտցուցինք,

որպէսզի քու հայրերուդ Յիշատակութիւններու գիրքին մէջ փնտռուի. արդարեւ այդ Յիշատակութիւններու գիրքին մէջ պիտի գտնես եւ գիտնաս թէ այդ քաղաքը ըմբոստ, թագաւորներուն ու գաւառներուն վնասակար քաղաք մը եղած է, եւ թէ ¹⁰հին ժամանակներէն ի վեր անոր մէջ ընդվզում ¹¹կազմակերպեր են. հետեւաբար այս քաղաքը աւերակ եղած է։

Մենք թագաւորին կը գիտցնենք թէ եթէ այս քաղաքը վերստին կառուցանուի ու անոր պարիսպները վերականգնին, այս պատճառով Գետին այս կողմը բաժին պիտի չունենաս»։

Թագաւորն ալ պատասխան ղրկեց Հռէում հրամանատարին, Սամսայ ատենադպիրին, եւ իրենց մնացեալ ընկերներուն՝ որոնք Սամարիայի մէջ ու Գետին միւս կողմը եղող մնացեալ տեղերուն մէջ կը բնակէին, սա՛ խօսքերով.

«¹²Ողջո՜յն, եւայլն։ Մեզի ղրկուած ձեր տեղեկագիրը իմ առջեւս ճշգրտապէս կարդացուեցաւ։

Ես հրաման տուի, ու փնտռեցին եւ գտան թէ այդ քաղաքը հին ժամանակներէն ի վեր թագաւորներու դէմ ապստամբեր է, ու անոր մէջ ըմբոստութիւն եւ ընդվզում կազմակերպեր են։

Նաեւ Երուսաղէմի մէջ հզօր թագաւորներ եղեր են, որոնք Գետին ամբողջ միւս կողմը եղողներուն վրայ տիրեր են, եւ իրենց հարկ, տուրք ու մաքս վճարուեր է։

Հիմա հրամա՛ն տուէք որ այդ ¹³մարդիկը դադրեցնեն քաղաքին կառուցումը, մինչեւ որ ինձմէ ուրիշ հրաման տրուի։

Զգուշացէ՛ք որ ասիկա ընելու մէջ չթերանաք, որ չարութիւնը չշատնայ ու թագաւորներուն վնաս չըլլայ»։

Հետեւաբար, երբ Արտաշէս թագաւորին տեղեկագիրին պատճէնը Հռէումի, Սամսայ ատենադպիրին եւ անոնց ընկերներուն առջեւ կարդացուեցաւ, արտորալով Երուսաղէմ գացին՝ Հրեաներուն քով, ու բռնութեամբ եւ ոյժով անոնց կառուցումը դադրեցուցին։

Այն ատեն Երուսաղէմ եղող Աստուծոյ տան գործը դադրեցաւ, ու մինչեւ Պարսկաստանի Դարեհ թագաւորին թագաւորութեան երկրորդ տարին՝ դադրած մնաց։