Ezra 7

2 Chronicles  «  Ezra 6  ‹  Ezra 7  ›  Ezra 8  »  Nehemiah

ԵԶՐԱՍ ԿԸ ՀԱՍՆԻ ԵՐՈՒՍԱՂԷՄ

Այս բաներէն ետք, Պարսկաստանի թագաւորին՝ Արտաշէսի թագաւորութեան ատենը, Եզրաս — որդին Սարայիայի, որդին Ազարիայի, որդին Քեղկիայի,

որդին Սեղղումի, որդին Սադովկի, որդին Աքիտովբի,

որդին Ամարիայի, որդին Ազարիայի, որդին Մարիոթի,

որդին Զարիայի, որդին Ոզիի, որդին Բոկկիի,

որդին Աբիսուայի, որդին Փենեհէսի, որդին Եղիազարի, որդին Ահարոն աւագ քահանային —,

այս Եզրասը Բաբելոնէն բարձրացաւ. ան արագագիր դպիրն էր Մովսէսի Օրէնքին, որ Տէրը՝ Իսրայէլի Աստուածը տուեր էր։ Թագաւորը անոր ¹շնորհեց ամէն ինչ որ պահանջեր էր, որովհետեւ Տէրոջ՝ իր Աստուծոյն ձեռքը իր վրան էր։

(Արտաշէս թագաւորին եօթներորդ տարին՝ Իսրայէլի որդիներէն, քահանաներէն ու Ղեւտացիներէն, երգողներէն, դռնապաններէն եւ Նաթանայիմներէն ոմանք Երուսաղէմ բարձրացան։)

Ան հինգերորդ ամիսը Երուսաղէմ հասաւ, թագաւորին եօթներորդ տարին։

Արդարեւ առաջին ամսուան առաջին օրը Բաբելոնէն ²մեկնեցաւ, եւ Աստուծոյ բարի ձեռքը անոր վրայ ըլլալով՝ հինգերորդ ամսուան առաջին օրը Երուսաղէմ հասաւ.

որովհետեւ Եզրաս իր սիրտը ³տրամադրած էր՝ որպէսզի Տէրոջ Օրէնքը փնտռէ ու գործադրէ, եւ կանոններն ու ⁴դատավճիռները սորվեցնէ Իսրայէլի մէջ։

ԱՐՏԱՇԷՍ ԿԱՅՍՐԻՆ ԵԶՐԱՍԻ ՏՈՒԱԾ ՓԱՍՏԱԹՈՒՂԹԸ

Ահա՛ւասիկ այն տեղեկագիրին պատճէնը, որ Արտաշէս թագաւորը տուաւ Եզրաս քահանային ու դպիրին, որ Տէրոջ ⁵պատուիրած խօսքերուն՝՝ գրողն էր, նաեւ անոր կանոններուն՝ Իսրայէլի տրուած։

«Թագաւորներու թագաւորը՝ Արտաշէս, Եզրաս քահանային, երկինքի Աստուծոյն Օրէնքին դպիրին, կատարեալ խաղաղութիւն, եւայլն։

Հրաման կու տամ, որ իմ թագաւորութեանս մէջ եղող Իսրայէլի ժողովուրդէն եւ անոր քահանաներէն ու Ղեւտացիներէն բոլոր յօժարակամ Երուսաղէմ գացողները՝ քեզի հետ երթան։

Արդարեւ դուն թագաւորին ու անոր եօթը խորհրդականներուն ⁶կողմէն կը ղրկուիս, որպէսզի Հրէաստանը եւ Երուսաղէմը քննարկես՝ քու ձեռքդ եղած Աստուծոյդ Օրէնքին համաձայն,

եւ տանիս այն արծաթն ու ոսկին՝ որ թագաւորը եւ իր խորհրդականները յօժարակամ ընծայեցին Իսրայէլի Աստուծոյն,— որուն բնակարանը Երուսաղէմի մէջ է,—

նաեւ բոլոր արծաթն ու ոսկին՝ որ Բաբելոնի ամբողջ գաւառին մէջ պիտի գտնես, ժողովուրդին ու քահանաներուն յօժարակամ ընծային հետ, որ կը մատուցանեն Երուսաղէմի մէջ եղող իրենց Աստուծոյն տան։

Ուրեմն այդ դրամով ա՛նյապաղ զուարակներ, խոյեր ու գառներ գնէ, նաեւ անոնց հացի ընծաներն ու թափելիք նուէրները, եւ զանոնք մատուցանէ՛ Երուսաղէմ եղող ձեր Աստուծոյն տան զոհասեղանին վրայ.

իսկ մնացած արծաթով ու ոսկիով՝ ինչ որ քեզի ու եղբայրներուդ ⁷պատշաճ թուի՝՝ ընել, ըրէ՛ք զայն՝ ձեր Աստուծոյն կամքին համաձայն։

Այն առարկաները՝ որ քու Աստուծոյդ տան պաշտամունքին համար քեզի տրուեցան, ⁸զետեղէ՛ զանոնք Երուսաղէմի Աստուծոյն առջեւ։

Ուրիշ ինչ որ քու Աստուծոյդ տան համար հարկաւոր է ու քեզի ⁹կը պատշաճի՝՝ տալ, տո՛ւր զայն թագաւորին գանձատունէն։

Ու ես, Արտաշէս թագաւորս, հրաման կու տամ ձեզի՝ Գետին միւս կողմը եղող բոլոր գանձապետներուդ, որ ա՛նյապաղ կատարէք ինչ որ Եզրաս քահանան, երկինքի Աստուծոյն Օրէնքին դպիրը, ձեզմէ խնդրէ.

առանց ¹⁰հաշուելու տուէ՛ք մինչեւ հարիւր տաղանդ արծաթ, հարիւր քոռ ցորեն, հարիւր մար գինի, հարիւր մար իւղ, եւ ա՛ղ։

Ինչ որ երկինքի Աստուածը հրամայեր է՝ թող փութաջանութեա՛մբ գործադրուի երկինքի Աստուծոյն տան համար, որպէսզի թագաւորին եւ անոր որդիներուն թագաւորութեան վրայ զայրոյթ չըլլայ։

Ձեզի կը գիտցնենք թէ բոլոր քահանաներէն, Ղեւտացիներէն, երգողներէն, դռնապաններէն, Նաթանայիմներէն եւ այս Աստուծոյ տան սպասարկուներէն հարկ, տուրք ու մաքս առնելու հրաման չկայ։

Իսկ դո՛ւն, ո՛վ Եզրաս, քու Աստուծոյդ իմաստութեամբ՝ որ ձեռքդ ունիս, դատաւորնե՛ր եւ իշխաննե՛ր նշանակէ, որ Գետին միւս կողմը եղող ամբողջ ժողովուրդը դատեն, այսինքն բոլոր անոնք՝ որ քու Աստուծոյդ Օրէնքը գիտեն. չգիտցողներուն ալ սորվեցուցէ՛ք։

Ո՛վ որ քու Աստուծոյդ Օրէնքն ու թագաւորին օրէնքը չգործադրէ՝ ա՛նյապաղ ¹¹թող դատապարտուի՝՝, կա՛մ մահուան, կա՛մ աքսորի, կա՛մ գոյքերու գրաւումի, կա՛մ ալ բանտարկութեան»։

ԵԶՐԱՍ ԿԸ ՓԱՌԱԲԱՆԷ ՏԷՐԸ

Օրհնեա՜լ ըլլայ Տէրը՝ մեր հայրերուն Աստուածը, որ Երուսաղէմի մէջ եղող Տէրոջ տունը ¹²զարդարելու համար՝ այսպիսի փափաք դրաւ թագաւորին սիրտին մէջ։

Ինծի կարեկցութիւն ¹³ցոյց տուաւ՝՝ թագաւորին, անոր խորհրդականներուն ու թագաւորին բոլոր զօրաւոր իշխանաւորներուն առջեւ. Տէրոջ՝ իմ Աստուծոյս ձեռքը իմ վրաս ըլլալով՝ ուժովցայ, եւ Իսրայէլէն գլխաւոր ¹⁴մարդիկ հաւաքեցի՝ որպէսզի ինծի հետ բարձրանան։