Isaiah 6

Song of Solomon  «  Isaiah 5  ‹  Isaiah 6  ›  Isaiah 7  »  Jeremiah

ԱՍՏՈՒԱԾ ԿԸ ԿԱՆՉԷ ԵՍԱՅԻՆ՝ ՄԱՐԳԱՐԷԱՆԱԼՈՒ

Ոզիա թագաւորին մահուան տարին՝ Տէրը տեսայ, որ բարձր ու ¹վեհանիստ գահի մը վրայ բազմած էր. անոր ²քղանցքը տաճարը կը լեցնէր։

Վերեւը սերովբէներ կեցած էին, որոնցմէ իւրաքանչիւրը վեց թեւ ունէր. երկուքով իրենց երեսը կը ծածկէին, երկուքով իրենց ոտքերը կը ծածկէին, ու երկուքով կը թռչէին։

Իրարու գոչելով կ’ըսէին. «Սո՛ւրբ, սո՛ւրբ, սո՛ւրբ է զօրքերու Տէրը. Ամբողջ երկիրը անոր փառքով լեցուն է»։

³Գոչիւնին ձայնէն սեմերուն հիմերը ցնցուեցան, եւ տունը ծուխով լեցուեցաւ։

Ուստի ըսի. «Վա՜յ ինծի, ահա՛ կը կորսուիմ, Որովհետեւ ես ⁴պիղծ շրթունք ունեցող մարդ մըն եմ, Ու պղծաշուրթն ժողովուրդի մը մէջ կը բնակիմ, Եւ իմ աչքերս զօրքերու Տէրը՝ Թագաւորը տեսան»։

Բայց սերովբէներէն մէկը իմ քովս թռաւ, ձեռքը ⁵կայծ մը ունենալով՝ որ զոհասեղանէն ունելիով առած էր։

Բերանիս դպցնելով՝ ըսաւ. «Ահա՛ ասիկա քու շրթունքիդ դպաւ. Ուստի անօրէնութիւնդ ջնջուեցաւ Եւ մեղքդ քաւուեցաւ»։

Յետոյ լսեցի Տէրոջ ձայնը՝ որ կ’ըսէր. «Ո՞վ ղրկեմ, ու մեզի համար ո՞վ պիտի երթայ»։ Ես ալ պատասխանեցի. «Ահա՛ հոս եմ, զի՛ս ղրկէ»։

Այն ատեն ըսաւ. «Գնա՛, ըսէ՛ այս ժողովուրդին. “⁶Շատ պիտի լսէք՝ բայց պիտի չհասկնաք, ⁷Շատ պիտի տեսնէք՝ բայց պիտի չգիտնաք”։

Այս ժողովուրդին սիրտը ⁸ընդարմացո՛ւր, Անոր ականջները ծանրացո՛ւր եւ աչքերը գոցէ՛, Որպէսզի իր աչքերով չտեսնէ, ականջներով չլսէ, Սիրտով չհասկնայ, եւ դարձի չգայ ու չբուժուի»։

Ես ըսի. «Մինչեւ ե՞րբ, ո՛վ Տէր»։ Ինք ալ պատասխանեց. «Մինչեւ որ քաղաքները բնակիչ չունենալով ⁹ամայանան, Տուներուն մէջ մարդ չըլլայ, Ու ¹⁰երկիրը բոլորովին աւերուի.

Մինչեւ որ Տէրը հեռացնէ մարդիկը, Եւ երկրին մէջ մեծ ¹¹ամայութիւն ըլլայ։

Սակայն անոր մէջ դեռ տասներորդ մաս մը պիտի մնայ, Ան ¹²պիտի վերադառնայ եւ՝՝ ¹³սպառի. Ինչպէս բեւեկնիին ու կաղնիին բունը կը մնայ՝ երբ տապալին, Այնպէս ալ սուրբ զարմը այն ժողովուրդին բունը պիտի ըլլայ»։