Job 1

Esther  «  Esther 10  ‹  Job 1  ›  Job 2  »  Psalm

ՍԱՏԱՆԱՆ ԿԸ ՓՈՐՁԷ ՅՈԲԸ

Հուսի երկրին մէջ Յոբ անունով մարդ մը կար։ Այդ մարդը պարկեշտ, ուղիղ եւ աստուածավախ էր, ու չարութենէ կը հեռանար։

Անոր եօթը որդի ու երեք աղջիկ ծնան։

Անոր ստացուածքը եօթը հազար ոչխար, երեք հազար ուղտ, հինգ հարիւր զոյգ եզ եւ հինգ հարիւր մատակ էշ էր, ու յոյժ շատ ծառաներ ունէր։ Այդ մարդը բոլոր ¹արեւելքցիներէն մեծ էր։

Անոր որդիները կ’երթային, եւ իւրաքանչիւրը իր օրը իր տան մէջ խնճոյք կը սարքէր. մարդ ղրկելով իրենց երեք քոյրերը կը հրաւիրէին, որպէսզի իրենց հետ ուտեն ու խմեն։

Երբ խնճոյքին օրերը կ’աւարտէին, Յոբ ²կանչել կու տար զանոնք՝՝ եւ կը սրբացնէր. առտուն կանուխ ելլելով՝ անոնց բոլորին թիւով ողջակէզներ կը մատուցանէր, որովհետեւ Յոբ կ’ըսէր. «Թերեւս որդիներս մեղանչեցին, եւ իրենց սիրտին մէջ Աստուծոյ հայհոյեցին»։ Յոբ ³ամէն ատեն՝՝ այսպէս կ’ընէր։

⁴Օր մը՝ Աստուծոյ որդիները գացին ⁵Տէրոջ առջեւ ներկայանալու. ⁶Սատանան ալ գնաց անոնց մէջ։

Տէրը Սատանային ըսաւ. «Ուրկէ՞ կու գաս»։ Սատանան Տէրոջ պատասխանեց. «Երկրի վրայ շրջագայելէն ու անոր մէջ պտըտելէն»։

Տէրը Սատանային ըսաւ. «Իմ ծառայիս՝ Յոբի ⁷ուշադրութիւն դարձուցի՞ր՝՝։ Երկրի վրայ անոր պէս պարկեշտ եւ ուղիղ, աստուածավախ ու չարութենէ հեռացող մարդ չկայ»։

Սատանան Տէրոջ պատասխանեց. «Միթէ Յոբ ձրի՞ ⁸կը պաշտէ Աստուած՝՝։

Դուն զինք, անոր տունը եւ անոր բոլոր ունեցածները չցանկապատեցի՞ր. անոր ձեռքերուն գործերը օրհնեցիր, ու անոր ստացուածքը երկրի վրայ շատցաւ։

Հիմա ձեռքդ երկարէ՛ եւ անոր ամբողջ ունեցածին դպչէ՛, ու պիտի տեսնես թէ ի՛նչպէս քեզի պիտի հայհոյէ»։

Տէրը Սատանային ըսաւ. «Ահա՛ անոր ամբողջ ունեցածը քու ձեռքդ կու տամ. միայն թէ իր վրայ ձեռք մի՛ երկարեր»։ Այն ժամանակ Սատանան Տէրոջ առջեւէն ⁹գնաց։

ՅՈԲԻ ԶԱՒԱԿՆԵՐՆ ՈՒ ՀԱՐՍՏՈՒԹԻՒՆԸ ԿԸ ԿՈՐՍՈՒԻՆ

Օր մը անոր որդիներն ու աղջիկները իրենց մեծ եղբօր տան մէջ կ’ուտէին ու գինի կը խմէին։

Պատգամաբեր մը եկաւ Յոբի եւ ըսաւ. «Երբ եզները կը հերկէին ու մատակ էշերը անոնց քով կ’արածէին,

Սաբայեցիները յարձակեցան, զանոնք առին, եւ ծառաները սուրի բերանէ անցուցին. միայն ե՛ս ճողոպրեցայ, ու եկայ՝ որպէսզի քեզի պատմեմ»։

Երբ ան տակաւին կը խօսէր, ուրիշ մէկն ալ եկաւ եւ ըսաւ. «Երկինքէն Աստուծոյ կրակը իջաւ, ու հօտերը եւ ծառաները այրեց ու զանոնք սպառեց. միայն ե՛ս ճողոպրեցայ, եւ եկայ՝ որպէսզի քեզի պատմեմ»։

Երբ ան տակաւին կը խօսէր, ուրիշ մէկն ալ եկաւ ու ըսաւ. «Քաղդէացիները՝ երեք գունդի բաժնուած՝ ուղտերուն վրայ յարձակեցան եւ զանոնք յափշտակեցին, ու ծառաները սուրի բերանէ անցուցին. միայն ե՛ս ճողոպրեցայ, եւ եկայ՝ որպէսզի քեզի պատմեմ»։

Երբ ան տակաւին կը խօսէր, ուրիշ մէկն ալ եկաւ ու ըսաւ. «Մինչ որդիներդ եւ աղջիկներդ իրենց մեծ եղբօր տան մէջ կ’ուտէին ու գինի կը խմէին,

ահա՛ անապատէն մեծ հով մը եկաւ, տան չորս կողմերը այնպէս զարկաւ՝ որ երիտասարդներուն վրայ փլաւ, եւ անոնք մեռան. միայն ե՛ս ճողոպրեցայ, ու եկայ՝ որպէսզի քեզի պատմեմ»։

Այն ատեն Յոբ կանգնեցաւ, իր պարեգօտը պատռեց եւ գլուխին մազերը կտրեց, ու գետինը իյնալով երկրպագեց

եւ ըսաւ. «Մօրս ¹⁰արգանդէն մերկ ելայ, ու հոն մերկ պիտի վերադառնամ։ Տէ՛րը տուաւ ու Տէ՛րը առաւ, օրհնեա՜լ ըլլայ Տէրոջ անունը»։

Այս բոլորին մէջ Յոբ չմեղանչեց, եւ Աստուծոյ հանդէպ ¹¹անպատշաճ չեղաւ՝՝։