Job 2

Esther  «  Job 1  ‹  Job 2  ›  Job 3  »  Psalm

ՍԱՏԱՆԱՆ ԿՐԿԻՆ ԿԸ ՓՈՐՁԷ ՅՈԲԸ

Ուրիշ օր մըն ալ Աստուծոյ որդիները գացին Տէրոջ առջեւ ներկայանալու։ Սատանան ալ գնաց անոնց մէջ՝ Տէրոջ առջեւ ներկայանալու։

Տէրը Սատանային ըսաւ. «Ուրկէ՞ կու գաս»։ Սատանան Տէրոջ պատասխանեց. «Երկրի վրայ շրջագայելէն ու անոր մէջ պտըտելէն»։

Տէրը Սատանային ըսաւ. «Իմ ծառայիս՝ Յոբի ¹ուշադրութիւն դարձուցի՞ր՝՝։ Երկրի վրայ անոր պէս պարկեշտ եւ ուղիղ, աստուածավախ ու չարութենէ հեռացող մարդ չկայ։ Ան տակաւին իր պարկեշտութեան կառչած է, թէեւ դուն ուզեցիր զիս համոզել որ զայն առանց ²պատճառի ³կորսնցնեմ»։

Սատանան Տէրոջ պատասխանեց. «Մորթի տեղ՝ մորթ. մարդ մը իր ամբողջ ստացուածքը իր կեանքին համար կու տայ։

Բայց հիմա ձեռքդ երկարէ՛ եւ անոր ոսկորին ու մարմինին դպչէ՛, ու պիտի տեսնես թէ ի՛նչպէս քեզի պիտի հայհոյէ»։

Տէրը Սատանային ըսաւ. «Ահա՛ զայն քու ձեռքդ կու տամ. միայն թէ պահէ՛ անոր կեանքը»։

Սատանան Տէրոջ առջեւէն ⁴գնաց, ու Յոբը՝ ոտքին ներբանէն մինչեւ գագաթը՝ ⁵չարչարալից պալարներով զարկաւ։

Ան ալ ⁶խեցատ մը առաւ՝ որպէսզի անով քերուի, ու մոխիրի մէջ նստաւ։

Անոր կինը իրեն ըսաւ. «Դուն տակաւին պարկեշտութեանդ կը կառչի՞ս. Աստուծո՛յ հայհոյէ ու մեռի՛ր»։

Յոբ անոր ըսաւ. «Դուն անզգամ կնոջ մը պէս կը խօսիս։ Աստուծոյ ձեռքէն միայն բարի՞ք ընդունինք, ու ⁷չարիք չընդունի՞նք»։ Այս բոլորին մէջ Յոբ իր շրթունքով չմեղանչեց։

ՅՈԲԻ ԲԱՐԵԿԱՄՆԵՐԸ

Յոբի երեք բարեկամները, Թեմանացի Եղիփազ, ⁸Սոքեցի Բաղդատ, ու Նաամացի Սոփար, երբ լսեցին անոր վրայ հասած այս բոլոր ձախորդութիւնները, եկան՝ իւրաքանչիւրը իր տեղէն. իրարու հանդիպելով՝ գացին անոր ցաւակցելու եւ զինք մխիթարելու։

Հեռուէն իրենց աչքերը վերցնելով տեսան, բայց չճանչցան զայն. ուստի իրենց ձայնը բարձրացնելով լացին։ Իւրաքանչիւրը իր պարեգօտը պատռելով՝ դէպի երկինք նետելով հող ցանեցին իրենց գլուխին վրայ։

Անոր հետ եօթը օր ու եօթը գիշեր գետինը նստան. ո՛չ մէկը անոր խօսք մը ըսաւ, որովհետեւ տեսան թէ անոր կոտտանքը յոյժ սաստիկ էր։