Job 5

Esther  «  Job 4  ‹  Job 5  ›  Job 6  »  Psalm

«Հիմա գոչէ՛. արդեօք կա՞յ մէկը՝ որ քեզի պատասխանէ, Եւ սուրբերէն որո՞ւն պիտի դարձնես քու երեսդ։

Ստոյգ է թէ գրգռութիւնը յիմարը կը սպաննէ, Ու նախանձը ¹անմիտը կը մեռցնէ։

Ես յիմարին արմատանալը տեսայ, Բայց իսկոյն անոր բնակութիւնը անիծեցի։

Անոր որդիները ապահովութենէ հեռու են. Անոնք դրան մէջ կը կոխկռտուին Եւ ազատող մը չկայ։

Անօթի՛ն կ’ուտէ անոր հունձքը, Ու զայն փուշերու մէջէն իսկ կը յափշտակէ. Եւ ²ծարաւա՛ծը կը կլլէ անոնց գոյքերը։

Արդարեւ պատուհասը հողէն չ’ելլեր, Ու տաժանքը գետինէն չի բուսնիր.

Թէպէտ մարդը տաժանքի համար կը ծնի, Ինչպէս ³կրակի կայծերը՝՝ վեր կը թռչին։

Իսկ ես Աստուծոյ պիտի դիմէի, Իմ հարցս Աստուծոյ պիտի յանձնէի,

Որ անհետազօտելի մեծագործութիւններ կը կատարէ, Սքանչելիքներ՝ առանց թիւի։

Ի՛նք երկրի վրայ անձրեւ կու տայ, Ու դաշտերուն վրայ ջուրեր կը ղրկէ։

Նաեւ ցածերը կը բարձրացնէ, Եւ ⁴սգաւորները ապահովութեան կը ⁵հասցնէ։

Ի՛նք խորամանկներուն ⁶հնարքները կը ձախողեցնէ, Որպէսզի անոնց ձեռքերը չկարենան իրենց գաղափարները գործադրել։

Իմաստունները իրենց ⁷խորագիտութեան մէջ կը բռնէ, Ու խոտորածներուն խորհուրդը շուտով կը խափանուի.

Ցերեկը խաւարի կը հանդիպին, Եւ կէսօրին կը խարխափեն՝ ինչպէս գիշերուան մէջ։

Իսկ աղքատը սուրէն, անոնց բերանէն Ու հզօրին ձեռքէն կ’ազատէ.

Այսպէս՝ չքաւորը յոյս կ’ունենայ, Սակայն ⁸անիրաւը իր բերանը կը գոցէ։

Ահա՛ երանելի է այն մարդը՝ որ Աստուած կը յանդիմանէ։ Ուրեմն Ամենակարողին պատիժը մի՛ անարգեր.

Արդարեւ ի՛նք կը վիրաւորէ ու կը փաթթէ, Ի՛նք կը խոցէ եւ իր ձեռքերը կը բուժեն։

Վեց տագնապներէ քեզ պիտի ազատէ, Ու եօթներորդին՝ քեզի չարիք պիտի չդպչի.

Սովի ժամանակ քեզ մահէն պիտի ազատէ, Եւ պատերազմի մէջ՝ սուրին ձեռքէն։

Լեզուի խարազանէն ապահով պիտի ըլլաս, Ու կործանումէն պիտի չվախնաս՝ երբ ան գայ։

Կործանումին եւ սովին վրայ պիտի ծիծաղիս, Ու երկրի գազաններէն պիտի չվախնաս.

Արդարեւ դաշտի քարերուն հետ դաշինք պիտի կնքես, Եւ դաշտին գազանները քեզի հետ խաղաղութեամբ պիտի վարուին։

Պիտի գիտնաս թէ վրանիդ մէջ յաջողութիւն կայ. Քու բնակարանդ աչքէ պիտի անցընես, ու ⁹ոչինչ պակաս պիտի գտնես՝՝։

Պիտի գիտնաս թէ զարմդ բազմաթիւ է, Ու քու շառաւիղներդ՝ երկրի բոյսին պէս։

¹⁰Լա՛ւ ծերացած՝՝ գերեզմանը պիտի մտնես, Ցորենի խուրձի մը պէս՝ որ իր ժամանակին կը վերցնեն։

Ահա՛ մենք ասիկա ¹¹քննեցինք, այս այսպէս է. Մտիկ ըրէ՛ ասիկա ու գիտցի՛ր զայն՝ քու բարիքիդ համար»։