Job 10

Esther  «  Job 9  ‹  Job 10  ›  Job 11  »  Psalm

«Անձս կեանքէս ձանձրացաւ. Համարձակ պիտի գանգատիմ, ¹Սիրտիս դառնութեամբ պիտի խօսիմ,

Պիտի ըսեմ Աստուծոյ. “Մի՛ դատապարտեր զիս, Գիտցո՛ւր ինծի թէ ի՛նչ բանի համար ինծի հետ կը վիճիս.

²Հաճելի՞ է քեզի՝ զիս հարստահարել, Ձեռքերուդ գործը անարգել, Եւ ամբարիշտներուն խորհուրդը ³լուսաւորել։

Միթէ դուն մարմնաւոր աչքե՞ր ունիս. Կը տեսնե՞ս՝ ինչպէս մարդը կը տեսնէ։

Միթէ քու օրերդ մարդուն օրերուն պէ՞ս են, Քու տարիներդ ⁴մարդուն տարիներուն չա՞փ են,

Որ իմ անօրէնութիւնս կը փնտռես Ու մեղքս կը քննես։

Գիտես թէ ամբարիշտ չեմ. Բայց չկայ մէկը, որ քու ձեռքէդ զիս ազատէ։

Քո՛ւ ձեռքերդ զիս ⁵ստեղծեցին Եւ ⁶իմ բոլոր անդամներս կազմեցին՝՝, Ու զիս կը ⁷կորսնցնես։

Կ’աղերսե՛մ, յիշէ՛ թէ զիս կաւի պէս շինեցիր, Եւ զիս հողին պիտի վերադարձնես։

Միթէ զիս կաթի պէս չթափեցի՞ր, Ու պանիրի պէս ⁸թանձրացուցիր։

Զիս մորթով եւ միսով հագուեցուցիր, Ու զիս ոսկորներով եւ ջիղերով հիւսեցիր.

Ինծի կեանք ու կարեկցութիւն շնորհեցիր, Եւ քու խնամքդ իմ հոգիս պահպանեց։

Ասոնք սիրտիդ մէջ պահեցիր. Գիտեմ թէ ասոնք ⁹միտքդ են։

Եթէ մեղանչեմ, դուն զիս կը դիտես Եւ իմ անօրէնութենէս անպատիժ չես թողուր զիս։

Եթէ ամբարիշտ ըլլամ, վա՜յ է ինծի. Եթէ արդար ալ ըլլամ, գլուխս չեմ վերցներ, Անարգանքով ¹⁰յագեցած ըլլալով. Հիմա նայէ՛ իմ տառապանքիս,

¹¹Որ կ’աւելնայ՝՝։ ¹²Մռնչող առիւծի՝՝ պէս զիս կը հետապնդես, Եւ դարձեալ իմ վրաս ¹³յաղթող կ’ըլլաս.

Ինծի դէմ վկաներդ կը վերանորոգես, Ու քու ¹⁴սրտմտութիւնդ իմ վրաս կը շատցնես. Փոփոխութիւններու եւ պատերազմի կը հանդիպիմ։

Ուրեմն ինչո՞ւ զիս արգանդէն հանեցիր. Երանի՜ թէ հոն շունչս տայի եւ աչք չտեսնէր զիս,

Որ չեղածի պէս ըլլայի Ու մօրս ¹⁵արգանդէն գերեզմանը տարուէի։

Իմ օրերս սակաւաթիւ չե՞ն. Հրաժարէ՛ ինձմէ, եւ թո՛ղ որ քիչ մը հանգչիմ

Այն տեղը երթալէս առաջ, ուրկէ պիտի չվերադառնամ.— Խաւարի եւ մահուան շուքի երկիրը,

Այդ մութ երկիրը, մահուան շուքին պէս մութ, Ուր անկարգութիւն կայ, ու լոյսը մթութեան պէս է”»։