Job 11

Esther  «  Job 10  ‹  Job 11  ›  Job 12  »  Psalm

Այն ատեն Նաամացի Սոփար պատասխանեց.

«Միթէ շատ խօսքերուն պատասխան պիտի չտրուի՞, Ու լեզուանի մարդը կրնա՞յ խօսքով արդարանալ։

Քու զրաբանութիւններդ ¹մարդիկը պիտի լռեցնե՞ն, Երբ դուն կը ծաղրես, մէկը պիտի չըլլա՞յ՝ որ քեզ խայտառակէ։

Արդարեւ դուն ըսիր. “Իմ խօսքս անխարդախ է, Եւ քու աչքերուդ ²անարատ եմ”։

Սակայն երանի՜ թէ Աստուած խօսէր, Քեզի դէմ իր շրթունքը բանար,

Ու քեզի յայտնէր իր իմաստութեան ³գաղտնիքը, Որ մարդուն հասկացողութեան կրկինն է։ Ուստի գիտցի՛ր թէ Աստուած Քու անօրէնութեանդ մեծ մասը ⁴կ’անտեսէ։

Կրնա՞ս հետազօտութեամբ Աստուած յայտնաբերել, Ամենակարողը ⁵կատարելապէս ⁶հետախուզել։

Ան երկինքին պէս բարձր է. ի՞նչ կրնաս ընել. ⁷Դժոխքէն խորունկ է. ի՞նչ կրնաս գիտնալ։

Անոր չափը՝ երկրէն երկայն Ու ծովէն լայն է։

Եթէ ան խոցէ, գոցէ կամ համախմբէ, Ո՞վ անոր արգելք պիտի ըլլայ.

Արդարեւ ինք ունայն ⁸մարդիկը կը ճանչնայ, Եւ անօրէնութիւնը կը տեսնէ. ուստի պիտի չնկատէ՞։

Իսկ դատարկամիտ մարդը կը սոնքայ, Թէեւ մարդը վայրենի աւանակի պէս կը ծնի։

Երբ սիրտդ ⁹ուղղես Ու ձեռքերդ անոր ¹⁰երկարես,

Եթէ ձեռքդ անօրէնութիւն կայ՝ հեռացո՛ւր զայն քեզմէ, Եւ մի՛ թողուր որ վրաններուդ մէջ անիրաւութիւն բնակի։

Այն ատեն կրնաս անարատ երեսդ բարձրացնել, Հաստատ կ’ըլլաս, ու բանէ մը չես վախնար։

Քու տաժանքդ պիտի մոռնաս, ¹¹Հոսած ջուրերու պէս պիտի յիշես զայն։

Քու ¹²կեանքդ կէսօրուան արեւէն ¹³պայծառ պիտի ըլլայ. Քու խաւարդ առտուան պէս պիտի ըլլայ։

Ապահով պիտի ըլլաս, որովհետեւ յոյս կայ քեզի. Շուրջդ պիտի խուզարկես, եւ ապահովութեամբ քնանաս։

Պիտի պառկիս, ու քեզ դողացնող պիտի չըլլայ, Եւ շատերը քեզի պիտի պաղատին։

Բայց ամբարիշտներուն աչքերը պիտի նուաղին. Անոնք ¹⁴ապաստանարան պիտի չունենան՝՝, Եւ իրենց միակ յոյսը պիտի ըլլայ ¹⁵հոգին աւանդել՝՝»։