Job 12

Esther  «  Job 11  ‹  Job 12  ›  Job 13  »  Psalm

Յոբ պատասխանեց.

«Արդարեւ ժողովուրդը դո՛ւք էք, Եւ իմաստութիւնը ձեզի հետ պիտի մեռնի։

Ե՛ս ալ ձեզի պէս ¹խելք ունիմ, ու ձեզմէ նուաստ չեմ. Այսպիսի բաներ ²ո՞վ չի գիտեր՝՝։

Իր բարեկամէն ծաղրուող մարդ մըն եմ՝ Որ Աստուծոյ կը գոչէ, Եւ ան իրեն պիտի պատասխանէ։ Արդար ու պարկեշտ մարդուն վրայ կը ծիծաղին։

Ա՛ն՝ որուն ոտքերը ³կը տատանին՝՝, արհամարհուած ջահ մըն է՝ Անխռով ապրողին կարծիքին համաձայն։

⁴Աւազակներուն վրանները անդորր են, Եւ Աստուած բարկացնողները ապահով են, Որոնց ձեռքը Աստուած առատութեամբ կը ⁵լեցնէ։

Բայց կ’աղերսե՛մ, անասուններո՛ւն հարցուր՝ որպէսզի քեզի սորվեցնեն, Ու երկինքի թռչուններուն՝ որպէսզի քեզի իմացնեն.

Կամ երկրի՛ն ըսէ, եւ ան քեզի պիտի սորվեցնէ. Ծովուն ձուկերը անգամ քեզի պիտի պատմեն։

Այս բոլորէն ո՞վ չի գիտեր Թէ Տէրո՛ջ ձեռքը ըրած է ասիկա.

Անո՛ր ձեռքին մէջ է ամէն ապրողի անձը, Եւ ամէն մարդկային մարմինի հոգին։

Միթէ ականջը խօսքերը չի քններ, Ինչպէս քիմքը կերակուրին համը կ’առնէ.

Իմաստութիւնը տարեցներուն քով է, Ու հանճարը՝ օրերուն շատութեան մէջ։

⁶Անո՛ր քով են իմաստութիւնը եւ զօրութիւնը. Անո՛րն են խորհուրդն ու հանճարը։

Ահա՛ ան կը փլցնէ, եւ ա՛լ չի կառուցանուիր. Եթէ մէկուն վրայ գոցէ, ա՛լ չի բացուիր։

Ահա՛ ան ջուրերը կը կուտակէ, եւ կը ցամքին. Զանոնք կ’արձակէ, ու երկիրը տակնուվրայ կ’ընեն։

Անո՛ր հետ են զօրութիւնը եւ խոհականութիւնը. Անո՛րն են մոլորեալն ու մոլորեցնողը։

Խորհրդականները իբր աւար կը տանի, Եւ դատաւորները կը խենթացնէ։

Թագաւորներուն իշխանութիւնը կը քակէ, Եւ իրենց մէջքը չուան կը կապէ։

⁷Նախարարները իբր աւար կը տանի, Ու ⁸զօրաւորները կը տապալէ։

⁹Հաւատարիմները կը պապանձեցնէ՝՝, Եւ ծերերը դատողութենէն կը ¹⁰զրկէ։

Ազնուականներուն վրայ արհամարհանք կը թափէ, Ու հզօրներուն գօտին կը թուլցնէ։

Խորունկ բաները խաւարէն հանելով կը յայտնէ, Եւ մահուան շուքը ¹¹կը լուսաւորէ՝՝։

Ազգերը կը մեծցնէ, ու զանոնք կը կորսնցնէ. Ազգերը հոս-հոն կը տարածէ, եւ անոնց կ’առաջնորդէ։

Երկրի ժողովուրդներուն գլխաւորներուն խելքը կ’առնէ, Ու անոնց դեգերիլ կու տայ ամայութեան մէջ, ուր ճամբայ չկայ։

Անոնք խաւարին մէջ կը խարխափեն՝ առանց լոյսի, Եւ անոնց դեգերիլ կու տայ՝ գինովներու պէս»։