Job 18

Esther  «  Job 17  ‹  Job 18  ›  Job 19  »  Psalm

Այն ատեն սոքեցի Բաղդատ պատասխանեց.

«Ե՞րբ պիտի ¹վերջացնէք այդ խօսքերը. Մտածեցէ՛ք, յետոյ կը խօսինք։

Ինչո՞ւ անասուններու պէս համարուինք, Ու ձեր աչքերուն առջեւ անմաքուր սեպուինք։

²Դո՛ւն որ բարկութեանդ մէջ անձդ կը բզքտես՝՝, Միթէ երկիրը քեզի համար պիտի լքուի՞, Եւ վէմը իր տեղէն պիտի փոխադրուի՞։

Անշո՛ւշտ ամբարիշտին լոյսը պիտի շիջանի, Ու անոր կրակին բոցը պիտի չճառագայթէ.

Անոր վրանին մէջ լոյսը պիտի խաւարի, Եւ անոր ճրագը իրեն հետ պիտի շիջանի։

Անոր կորովին քայլերը պիտի ³կաշկանդուին, Ու անոր խորհուրդը զինք գետինը պիտի նետէ.

Արդարեւ ի՛ր ոտքերը զինք ցանցի մէջ պիտի ⁴նետեն, Եւ օղակի վրայ պիտի քալէ։

Վարմը զինք կրունկէն պիտի բռնէ, Ու ⁵ծուղակը անոր պիտի յաղթէ։

Անոր համար գետինին մէջ թակարդ պահուած է, Եւ անոր ճամբային վրայ՝ որոգայթ։

Արհաւիրքը զայն ամէն կողմէ պիտի զարհուրեցնէ, Ու զայն իր ոտքերով ⁶հոս-հոն պիտի վազցնէ՝՝։

Անոր կորովը պիտի անօթենայ, Եւ ձախորդութիւնը անոր քով պատրաստ է՝

Որ անոր մորթին ոյժը սպառէ. Մահուան առջինեկը պիտի սպառէ անոր ոյժը։

Անոր ապահովութիւնը իր վրանէն պիտի փրցուի, Եւ ⁷ինք պիտի քշուի՝՝ դէպի արհաւիրքի թագաւորը։

Իրեններէն ո՛չ մէկը պիտի բնակի իր վրանին մէջ. Անոր բնակարանին վրայ ծծումբ պիտի ցանուի։

Տակէն՝ անոր արմատները պիտի չորնան, Ու վերէն՝ անոր ոստերը պիտի կտրուին։

Անոր յիշատակը երկրէն պիտի կորսուի, Եւ անոր անունը ⁸հրապարակին մէջ պիտի չլսուի՝՝։

Անիկա լոյսէն դէպի խաւարը պիտի քշուի, Ու երկրագունդէն պիտի ⁹վռնտուի։

Իր ժողովուրդին մէջ ո՛չ զաւակներ պիտի ունենայ, ո՛չ ալ թոռներ, Եւ անոր ¹⁰բնակարաններուն մէջ ո՛չ մէկը պիտի մնայ։

¹¹Յաջորդները անոր օրուան վրայ պիտի ապշին, Իսկ ¹²նախորդները ¹³պիտի սոսկան՝՝։

Անտարակոյս ա՛յսպէս պիտի ըլլան անիրաւին բնակարանները, Ա՛յս պիտի ըլլայ Աստուած չճանչցողին տեղը»։