Job 20

Esther  «  Job 19  ‹  Job 20  ›  Job 21  »  Psalm

Այն ատեն Նաամացի Սոփար պատասխանեց.

«Սա՛ պատճառով իմ կասկածներս ինծի պատասխանել կու տան, Եւ ասոր համար կ’արտորամ.—

Զիս խայտառակող խրատ մը լսեցի, Բայց ¹իմ հոգիիս իմաստութիւնը՝՝ պատասխանել կու տայ։

Դուն ասիկա չե՞ս գիտեր՝ թէ ²մի՛շտ, Մարդուն երկրի վրայ դրուելէն ի վեր,

Ամբարիշտին ցնծութիւնը ³կարճատեւ է, Ու կեղծաւորին ուրախութիւնը մէկ վայրկեանի համար է։

Թէեւ անոր ⁴հասակը մինչեւ երկինք ելլէ Եւ գլուխը թանձր ամպերուն հասնի,

Իր կղկղանքին պէս ընդմիշտ պիտի կորսուի, Ու զինք տեսնողները պիտի ըսեն. “Ո՞ւր է ան”։

Երազի պէս պիտի թռչի եւ պիտի չգտնուի. Գիշերուան ցնորքի պէս պիտի փախչի։

Զայն տեսնող աչքը ա՛լ պիտի չտեսնէ, Ու անոր բնակած տեղը ա՛լ պիտի չնայի անոր։

Անոր որդիները ⁵չքաւորներէն շնորհք պիտի խնդրեն՝՝, Եւ անոր ձեռքերը իր ⁶յափշտակածը պիտի վերադարձնեն։

Անոր ոսկորները իր ⁷երիտասարդութեան մեղքերուն պատիժով լեցուն են, Եւ անոր հետ հողին մէջ պիտի պառկին։

Եթէ չարութիւնը իր բերանին մէջ քաղցր է, Ու եթէ իր լեզուին տակ կը պահէ զայն,

Եթէ անոր խնայէ եւ չլքէ, Ու իր քիմքին տակ պահէ զայն,

Իր ⁸կերակուրը իր աղիքներուն մէջ պիտի փոխուի, Քարբի մաղձ պիտի ըլլայ իր ներսը։

Անիկա հարստութիւններ կլլեց, բայց զանոնք պիտի փսխէ. Աստուած իր փորէն դուրս պիտի հանէ զանոնք։

Անիկա քարբին թոյնը պիտի ծծէ, Եւ իժի լեզուն զինք պիտի մեռցնէ։

Ան պիտի չտեսնէ մեղրի ու կոգիի Առուները, գետակներն ու վտակները։

Իր աշխատանքով վաստկածը պիտի վերադարձնէ եւ պիտի չկլլէ, Ու փոխարինածը իր հարստութեան չափ պիտի ըլլայ. Անով պիտի չհրճուի։

Քանի չքաւորները ⁹ճնշեց ու լքեց, Եւ իր չկառուցանած տունը յափշտակեց,

Անշո՛ւշտ իր ¹⁰ներսը անդորրութիւն պիտի ¹¹չզգայ, Ու ցանկացածը պիտի չկարենայ ազատել։

Անոր կերակուրէն ոչինչ պիտի մնայ, Ուստի ¹²ո՛չ մէկը երկունքի ցաւ պիտի քաշէ անոր բարիքներուն համար՝՝։

Իր առատութեան լիութեան մէջ ալ պիտի տագնապի. Տաժանքի մէջ եղողներուն բոլոր ձեռքերը անոր վրայ պիտի գան։

Մինչ իր փորը կը լեցնէ, Աստուած իր բորբոքած բարկութիւնը անոր վրայ պիտի արձակէ, Եւ անձրեւի պէս անոր վրայ պիտի տեղացնէ՝ իբր կերակուր։

Երկաթէ զէնքին առջեւէն փախած ատենը Պղինձէ աղեղը զայն պիտի խոցէ։

Իրեն դէմ արձակուած նետը կը քաշէ, ու մարմինէն կը հանէ. Երբ փայլատակող նետը անոր մաղձէն ¹³ելլէ, Ահը անոր վրայ պիտի գայ։

Ամբողջ խաւարը անոր պահեստներուն մէջ պիտի պահուի. Կրակ մը՝ որուն վրայ մէկը չէ փչած՝ զայն պիտի սպառէ. Անոր վրանին մէջ մնացողը պիտի ¹⁴դժբախտանայ։

Երկինքը անոր անօրէնութիւնը պիտի յայտնէ, Երկիրն ալ անոր դէմ պիտի կանգնի։

Անոր տան հասոյթը պիտի ¹⁵յափշտակուի, Ջուրի պէս պիտի թափի Աստուծոյ բարկութեան օրը։

Ասիկա՛ է ամբարիշտ մարդուն բաժինը՝ որ Աստուծմէ պիտի ստանայ, Ասիկա՛ է այն ժառանգութիւնը՝ որ Աստուած անոր համար ¹⁶սահմաներ է»։