Job 21

Esther  «  Job 20  ‹  Job 21  ›  Job 22  »  Psalm

Յոբ պատասխանեց.

«Խօսքս լա՛ւ մտիկ ըրէք. Ասիկա՛ ըլլայ ձեր մխիթարութիւնը։

Հանդուրժեցէ՛ք ինծի՝ որ խօսիմ, Ու խօսելէս ետք ծաղրեցէք։

Միթէ ես մարդո՞ւ կը գանգատիմ, Եւ ինչո՞ւ հոգիս չվհատի։

Նայեցէ՛ք ինծի, ապշեցէ՛ք, Ու ձեր ձե՛ռքը դրէք ձեր բերանին վրայ։

Այս բաները յիշելով կը շփոթիմ, Եւ ահուդողը մարմինս կը համակէ։

Ամբարիշտները ինչո՞ւ կ’ապրին. Կը ծերանան ու իրենց ոյժը կը զօրանայ։

Անոնց զարմը իրենց հետ կը հաստատուի՝ իրենց առջեւ, Նաեւ անոնց շառաւիղները՝ իրենց աչքերուն առջեւ։

Իրենց տուները խաղաղութեան մէջ են, երկիւղէ զերծ, Եւ Աստուծոյ գաւազանը անոնց վրայ չէ։

Անոնց ցուլը կը զուգաւորուի առանց վրիպելու, Անոնց կովը ¹հորթ կը ծնանի՝՝ առանց վիժումի։

Իրենց պզտիկները դուրս կը հանեն՝ ոչխարի հօտի պէս, Եւ անոնց զաւակները ուրախութեամբ կը ցատկռտեն.

Թմբուկով ու քնարով ²կ’երգեն, Եւ սրինգին ձայնով կ’ուրախանան։

Անոնք իրենց օրերը բարօրութեամբ կ’աւարտեն, Ու մէկ վայրկեանի մէջ ³դժոխք կ’իջնեն։

Անոնք Աստուծոյ կ’ըսեն. “Հեռացի՛ր մեզմէ, Որովհետեւ չենք բաղձար քու ճամբաներդ ճանչնալ։

Ամենակարողը ո՞վ է՝ որ զայն պաշտենք, Եւ ի՞նչ օգուտ պիտի ունենանք՝ անոր դիմելով”։

Ահա՛ անոնց ⁴բարիքը իրենց ձեռքը չէ. Ամբարիշտին խորհուրդը հեռո՛ւ ըլլայ ինձմէ։

Ամբարիշտներուն ճրագը քանի՜ անգամ կը շիջանի, Եւ իրենց ձախորդութիւնը անոնց վրայ կը հասնի։ Աստուած իր բարկութեամբ անոնց ⁵ցաւեր կը բաժնէ։

Հովին առջեւ եղած յարդին պէս կ’ըլլան, Ու փոթորիկին ⁶յափշտակած մղեղին պէս։

“Աստուած անոր պատիժը իր որդիներուն կը վերապահէ”, կ’ըսեն. Անոր պիտի հատուցանէ, ան ալ պիտի գիտնայ։

Անոր աչքերը իր կորուստը պիտի տեսնեն, Եւ Ամենակարողին ցասումէն պիտի խմէ։

Ան ի՞նչ հաճոյք պիտի ստանայ իր տան մէջ՝ իրմէ ետք, Քանի իր ամիսներուն թիւը կիսուած է։

Միթէ կարելի՞ է գիտութիւն սորվեցնել Աստուծոյ, Քանի ի՛նք կը դատէ ⁷գոռոզները։

Մէկը կը մեռնի իր առոյգութեան մէջ, Ամբողջովին հանդարտ եւ անդորր.

Անոր ⁸կուշտերը ճարպով՝՝ լեցուն են, Ու ոսկորներուն ծուծը թարմ է։

Իսկ ուրիշ մը կը մեռնի ⁹սիրտին դառնութեամբ, Առանց բարօրութիւն ճաշակած ըլլալու։

Սակայն երկուքը հաւասարապէս հողին մէջ կը պառկին, Եւ որդերը զանոնք կը ծածկեն։

Ահա՛ գիտեմ ձեր մտածումները, Ու ձեր ¹⁰անիրաւ հնարքները՝՝ ինծի դէմ։

Արդարեւ կ’ըսէք. “Ո՞ւր է ազնուականին տունը, Եւ ո՞ւր է ամբարիշտներուն բնակած վրանը”։

Ճամբորդներուն չհարցուցի՞ք, Անոնց ¹¹նշաններուն ուշադրութիւն չէ՞ք դարձներ՝՝։

Արդարեւ ձախորդութեան օրուան համար չարին կը խնայուի, Ու ցասումի օրուան համար անոնք կը տարուին։

Ո՞վ անոր երեսին պիտի ¹²զարնէ իր ճամբան, Եւ ո՞վ անոր պիտի հատուցանէ իր ըրածին փոխարէնը։

Բայց ան գերեզմանը պիտի տարուի, Ու շիրիմին մէջ պիտի մնայ։

Ձորին հողակոշտերը անոր ¹³անոյշ պիտի ըլլան. Ամէն մարդ անոր ետեւէն պիտի ¹⁴երթայ, Իսկ անոր առջեւէն գացողները անթիւ են։

Ուրեմն ի՞նչպէս զուր տեղը զիս կը մխիթարէք, Քանի ձեր պատասխաններուն մէջ ¹⁵կեղծիք կայ՝՝»։