Job 22

Esther  «  Job 21  ‹  Job 22  ›  Job 23  »  Psalm

ԵՐՐՈՐԴ ԽՕՍԱԿՑՈՒԹԻՒՆ (22. 1-27. 33)

Այն ատեն Թեմանացի Եղիփազ պատասխանեց.

«Միթէ ¹մարդը կրնա՞յ Աստուծոյ օգտակար ըլլալ. Ուշիմ մարդը միայն իրեն օգտակար կ’ըլլայ։

Ամենակարողը հաճոյք կը ստանա՞յ՝ եթէ արդար ըլլաս, Կամ շահ մը՝ եթէ քու ճամբաներուդ մէջ պարկեշտ ըլլաս։

Միթէ քեզմէ վախնալո՞ւն համար քեզի հետ կը վիճաբանի, Քեզի հետ ²դատարան կ’երթայ.

Քու մեծ չարութեանդ համար չէ՞, Եւ անվախճան անօրէնութիւններուդ համար։

Արդարեւ առանց ³պատճառի եղբայրներէդ գրաւ առիր, Ու մերկերը իրենց հագուստներէն մերկացուցիր.

⁴Պապակածին ջուր չխմցուցիր Եւ անօթիին հաց տալ մերժեցիր։

Երկիրը ⁵հուժկու մարդուն էր, Ու յարգելին կը բնակէր անոր մէջ։

Այրի կիները պարապ ձեռքով ղրկեցիր, Եւ որբերուն բազուկները ճզմուեցան։

Հետեւաբար քու շուրջդ վարմեր կան, Ու յանկարծահաս երկիւղը քեզ կը շփոթեցնէ։

Կամ խաւարը քեզ պատած է, եւ չես կրնար տեսնել, Ու ջուրերուն առատութիւնը քեզ կը ծածկէ։

Աստուած երկինքի բարձրութեան մէջ չէ՞. Նայէ՛ աստղերուն ⁶կամարին, ո՜րչափ բարձր են։

Իսկ դուն ըսիր. “Աստուած ի՞նչ գիտէ. Մառախուղին մէջէն կրնա՞յ դատել։

Թանձր ամպերը իրեն ծածկոյթ են, ու չի տեսներ. Միայն երկինքի կամարին վրայ կը շրջի”։

⁷Դիտեցի՞ր այն հնադարեան ուղին՝՝, Ուրկէ անօրէն ⁸մարդիկը քալեցին.

Անոնք ⁹ատենէն առաջ՝՝ յափշտակուեցան, Անոնց հիմերը ¹⁰հեղեղը ընկղմեց՝՝։

Անոնք Աստուծոյ կ’ըսէին. “Հեռացի՛ր մեզմէ”. Նաեւ. “Ամենակարողը ¹¹մեզի ի՞նչ կրնայ ընել”,

Թէեւ անոնց տունը բարիքներով լեցուցեր էր։ Ամբարիշտներուն խորհուրդը հեռո՛ւ ըլլայ ինձմէ։

Արդարները պիտի տեսնեն եւ ուրախանան. Անմեղները զանոնք պիտի ծաղրեն՝ ըսելով.

“Մեր թշնամիները անհետացած են, Եւ անոնց մնացորդը կրակը սպառեց”։

Ուրեմն ¹²հաշտուէ՛ անոր հետ ու խաղաղութի՛ւն ըրէ. Ա՛յսպէս՝ բարօրութիւն պիտի ¹³ըլլայ քեզի։

Ընդունէ՛ օրէնքը անոր բերանէն, Եւ ¹⁴ուշադրութի՛ւն դարձուր անոր խօսքերուն՝՝։

Եթէ Ամենակարողին վերադառնաս՝ պիտի ¹⁵հաստատուիս. Եթէ անիրաւութիւնը վրաններէդ հեռացնես,

Ոսկին հողին ¹⁶հետ դնես, Ու Ոփիրի ոսկին՝ վտակներու խճաքարերուն ¹⁷հետ,

Ամենակարո՛ղը պիտի ըլլայ քու ոսկիդ, Քու արծաթդ, քու ոյժդ։

Արդարեւ այն ատեն Ամենակարողը քու վայելքդ պիտի ըլլայ, Ու երեսդ դէպի Աստուած պիտի վերցնես.

Անոր պիտի թախանձես, ու քեզ պիտի լսէ, Եւ ուխտերդ պիտի կատարես։

Եթէ ¹⁸բան մը որոշես՝՝, քեզի պիտի յաջողի, Ու ճամբաներուդ վրայ լոյս պիտի ճառագայթէ։

Երբ մէկը նուաստանայ, պիտի ըսես. “ ¹⁹Բարձրացի՛ր”. Այն ատեն Տէրը պիտի ազատէ ա՛ն՝ որուն աչքերը խոնարհած են։

Անմեղ չեղողն ալ պիտի ազատէ. Ան ձեռքերուդ մաքրութեամբ պիտի ազատուի»։