Job 23

Esther  «  Job 22  ‹  Job 23  ›  Job 24  »  Psalm

Յոբ պատասխանեց.

«Այսօր ալ իմ գանգատս դառն է, ¹Անոր հարուածը՝՝ հառաչանքէս ծանր է։

Երանի՜ թէ ²կարենայի գտնել զինք, Մինչեւ իր նստավայրը երթալ.

Իմ դատս իր առջեւ կը ³ներկայացնէի, Ու բերանս փաստերով կը լեցնէի։

Կը գիտնայի թէ ի՛նչ խօսքերով ինծի պիտի պատասխանէր, Եւ կը հասկնայի ինչ որ ինծի ըսէր։

Միթէ իր մեծ կարողութեա՞մբ ինծի հետ պիտի վիճէր. ո՛չ. Հապա ի՛նք ⁴զիս պիտի զօրացնէր՝՝։

Ուղիղները հոն կրնան վիճաբանիլ անոր հետ, Ու ես Դատաւորէս ընդմիշտ կ’ազատէի։

Բայց ահա՛ դէպի ⁵արեւելք կ’երթամ, եւ ան հոն չէ. Դէպի ⁶արեւմուտք, ու զայն չեմ ⁷նշմարեր։

Դէպի ⁸հիւսիս կ’երթամ, ուր ինք կը գործէ, Բայց զայն չեմ ⁹գտներ. ¹⁰Հարաւային կողմը կը ծածկուի, Եւ զայն չեմ տեսներ։

Իսկ ան գիտէ իմ ճամբաս. Երբ զիս փորձարկէ, զուտ ոսկիի պէս դուրս պիտի ելլեմ։

Ոտքս անոր քայլերուն վրայ ¹¹հաստատուեցաւ. Անոր ճամբան պահելով՝ չխոտորեցայ։

Անոր շրթունքին պատուիրաններէն չհեռացայ. Անոր բերանին խօսքերը իմ սովորութիւններէս աւելի պահեցի։

Բայց ան մէկ մտածում ունի, Եւ ո՞վ կրնայ զինք ¹²հրաժարեցնել. Ինչ որ իր անձը փափաքի՝ կ’ընէ։

Ուրեմն ինծի համար ¹³վճռուածը պիտի գործադրէ. Այդպիսի շատ բաներ կան անոր քով։

Ուստի անոր ներկայութենէն կը շփոթիմ. Երբ մտածեմ՝ անկէ կը վախնամ։

Արդարեւ Աստուած սիրտս կը թուլցնէ, Եւ Ամենակարողը զիս կը շփոթեցնէ.

Որովհետեւ ես թշուառութեան խաւարէն առաջ չբնաջնջուեցայ, Ու մութը երեսէս չծածկեց»։