Joshua 2

Deuteronomy  «  Joshua 1  ‹  Joshua 2  ›  Joshua 3  »  Judges

ՅԵՍՈՒ ԼՐՏԵՍՆԵՐ ԿԸ ՂՐԿԷ ԵՐԻՔՈՎ

Նաւէի որդին՝ Յեսու Սատիմէն երկու մարդ ղրկեց՝ երկիրը գաղտնի լրտեսելու համար, ու անոնց ըսաւ. «Գացէ՛ք եւ զննեցէ՛ք այդ երկիրը ու Երիքովը»։ Անոնք ալ գացին, Ռախաբ անունով պոռնիկ կնոջ մը տունը մտան, եւ հոն ¹մնացին։

Երբ Երիքովի թագաւորին ըսուեցաւ. «Ահա՛ այս գիշեր Իսրայէլի որդիներէն մարդիկ եկան հոս՝ երկիրը խուզարկելու համար»,

Երիքովի թագաւորը Ռախաբի մարդ ղրկեց՝ ըսելով. «Քեզի եկող ու տունդ մտնող մարդիկը դո՛ւրս հանէ, քանի որ անոնք այս ամբողջ երկիրը խուզարկելու եկած են»։

Կինը այդ երկու մարդիկը առաւ եւ պահեց. ապա ըսաւ. «Իրաւ այդ մարդիկը ինծի եկան, բայց իրենց ուրկէ՛ ըլլալը չգիտցայ։

Դրան գոցուելու ատենը՝ խաւարին մէջ այդ մարդիկը դուրս ելան։ Այդ մարդոց ո՛ւր երթալը չեմ գիտեր. շուտո՛վ զանոնք հետապնդեցէք, քանի որ անոնց պիտի հասնիք»։

Իսկ ինք տանիքը բարձրացնելով զանոնք՝ պահած էր վուշի ցօղուններու մէջ, որ տանիքին վրայ զետեղած էր։

Ուստի թագաւորին մարդիկը մինչեւ անցքերը զանոնք հետապնդեցին՝ Յորդանանի ճամբայով. զանոնք հետապնդողներուն դուրս ելլելէն ետք՝ դուռը գոցեցին։

²Լրտեսները դեռ չէին պառկած՝ երբ ³կինը տանիք բարձրացաւ անոնց քով,

եւ մարդոց ըսաւ. «Ես գիտեմ թէ Տէրը այս երկիրը ձեզի տուաւ. ձեր ահը մեր վրայ ինկաւ, ու ձեր ⁴պատճառով այս երկրին բոլոր բնակիչները հալեցան։

Արդարեւ մենք լսեցինք թէ ի՛նչպէս Տէրը Կարմիր ծովուն ջուրերը ձեր առջեւէն ցամքեցուց, երբ Եգիպտոսէն ելաք. նաեւ ինչ որ ըրիք Յորդանանի միւս կողմը բնակող Ամորհացիներուն երկու թագաւորներուն՝ Սեհոնի եւ Ովգի, որ անճիտեցիք։

Ուստի երբ այս բաները լսեցինք՝ մեր սիրտը հալեցաւ, ու ո՛չ մէկուն ⁵վրայ համարձակութիւն մնաց ձեր պատճառով՝՝. քանի որ ձեր Աստուածը՝ Եհովան միայն ի՛նք Աստուած է, վերը՝ երկինքի մէջ, եւ վարը՝ երկրի վրայ։

Հիմա կ’աղերսե՛մ, Տէրոջմով երդո՛ւմ ըրէք ինծի, թէ քանի ես ձեզի հետ կարեկցութեամբ վարուեցայ՝ դուք ալ իմ հօրս տան հետ կարեկցութեամբ պիտի վարուիք. ինծի ⁶վստահելի նշան մը տուէք,

թէ հայրս, մայրս, եղբայրներս, քոյրերս ու բոլոր իրենց պատկանողները ողջ պիտի թողուք, եւ մեր անձը մահէն պիտի ազատէք»։

Այդ մարդիկը անոր պատասխանեցին. «Եթէ մեր այս արարքը չիմացնէք, ձեր տեղը մեր անձերը մեռնին։ Երբ Տէրը այս երկիրը մեզի տայ, քեզի հետ կարեկցութեամբ ու ճշմարտութեամբ պիտի վարուինք»։

Յետոյ զանոնք պարանով մը պատուհանէն իջեցուց, (քանի որ իր տունը բերդաքաղաքին պարիսպին վրայ էր, եւ ինք պարիսպին վրայ կը բնակէր,)

ու անոնց ըսաւ. «Լե՛ռը գացէք, որ հետապնդողները ձեզի չհանդիպին. հոն երե՛ք օր պահուըտեցէք, մինչեւ որ հետապնդողները վերադառնան. յե՛տոյ ձեր ճամբան գացէք»։

Այդ մարդիկը անոր ըսին. «Այդ մեզի ընել տուած երդումէդ սա՛պէս անպարտ պիտի ըլլանք.—

ահա՛ երբ այս երկիրը մտնենք, սա՛ կրկնակի կարմիր դերձանէ առասանը ա՛յն պատուհանին կապէ՝ ուրկէ մեզ իջեցուցիր, եւ քու հայրդ, մայրդ, եղբայրներդ ու հօրդ ամբողջ ընտանիքը քո՛վդ հաւաքէ՝ այս տան մէջ։

Անոնցմէ ո՛վ որ քու տանդ դռնէն դուրս ելլէ, անոր արիւնը իր գլուխին վրայ պիտի ըլլայ, եւ մենք անպարտ պիտի ըլլանք։ Բայց եթէ քու քովդ՝ այս տան մէջ բոլոր եղողներուն վրայ ձեռք դրուի, անոնց արիւնը մեր գլուխին վրայ պիտի ըլլայ։

Իսկ եթէ մեր այս արարքը իմացնես, մեզի ընել տուած երդումէդ անպարտ պիտի ըլլանք»։

⁷Կինը ըսաւ. «Ա՛յդպէս թող ըլլայ, ձեր խօսքերուն համաձայն», ու զանոնք ղրկեց. անոնք ալ գացին, եւ ինք այդ կրկնակի կարմիր առասանը պատուհանին կապեց։

Անոնք անկէ գացին, լեռնակողմը հասան, ու հոն երեք օր կեցան, մինչեւ որ հետապնդողները վերադարձան։ Հետապնդողները զիրենք ամբողջ ճամբային մէջ փնտռեցին, բայց չգտան։

Հետեւաբար այդ երկու մարդիկը վերադարձան, լեռնէն իջան, Յորդանանէն անցան, Նաւէի որդիին՝ Յեսուի գացին, եւ անոր պատմեցին ամէն ինչ որ իրենց պատահած էր։

Ապա Յեսուի ըսին. «Ի՛րապէս Տէրը այդ ամբողջ երկիրը մեր ձեռքը մատնած է, ու նոյնիսկ այդ երկրին բոլոր բնակիչները մեր պատճառով կը հալին»։