Joshua 12

Deuteronomy  «  Joshua 11  ‹  Joshua 12  ›  Joshua 13  »  Judges

ՄՈՎՍԷՍԷՆ ՊԱՐՏՈՒԱԾ ԹԱԳԱՒՈՐՆԵՐ

Ահա՛ւասիկ այդ երկրին թագաւորները, որ Իսրայէլի որդիները զարկին եւ անոնց երկրին տիրացան՝ Յորդանանի միւս կողմը, դէպի արեւելք, Առնոն վտակէն մինչեւ Հերմոն լեռը՝ արեւելեան կողմին ամբողջ դաշտով.—

Ամորհացիներուն Սեհոն թագաւորը, որ Եսեբոն կը բնակէր, Գաղաադի կէսին վրայ կը տիրէր, Առնոն վտակին եզերքը եղող Արոէրէն ու ձորին մէջտեղէն մինչեւ Ամմոնի որդիներուն սահմանը եղող Յաբոկ վտակը.

նաեւ դաշտին վրայ կը տիրէր, մինչեւ Քեներէթի ծովը՝ դէպի արեւելք, ու մինչեւ դաշտին ծովը՝ այսինքն Աղի ծովը՝ արեւելեան կողմը, Բեթեսիմոթի ճամբան, իսկ հարաւային կողմը՝ Ասեդովթ-Փասգայի ստորոտը։

Ահա՛ւասիկ հսկաներու մնացորդէն Բասանի Ովգ թագաւորին հողամասը. ան Աստարովթի եւ Եդրայիի մէջ կը բնակէր,

ու Հերմոն լերան, Սելքայի եւ ամբողջ Բասանի վրայ կը տիրէր՝ մինչեւ Գեսուրացիներուն ու Մաքաթացիներուն հողամասը, նաեւ Գաղաադի կէսին վրայ, որ Եսեբոնի Սեհոն թագաւորին հողամասն էր։

Տէրոջ ծառան՝ Մովսէս ասոնք զարկաւ Իսրայէլի որդիներուն հետ, եւ Տէրոջ ծառան՝ Մովսէս ասոնց երկիրները իբր ստացուածք տուաւ Ռուբէնեաններուն, Գադեաններուն ու Մանասէի կէս տոհմին։

ՅԵՍՈՒԷՆ ՊԱՐՏՈՒԱԾ ԹԱԳԱՒՈՐՆԵՐ

Ահա՛ւասիկ այդ երկրին թագաւորները, որ Յեսու եւ Իսրայէլի որդիները զարկին Յորդանանի այս կողմը՝ դէպի արեւմուտք, Լիբանանի հովիտին մէջ եղող Բահաղ-Գադէն մինչեւ Քալակ լեռը, որ դէպի Սէիր կը բարձրանայ (Յեսու Իսրայէլի տոհմերուն իբր ստացուածք տուաւ՝ իրենց բաժիններուն համեմատ՝

լեռնակողմը, դաշտագետինը, դաշտերուն մէջ, լեռներուն ստորոտները, անապատը եւ հարաւային կողմը բնակող Քետացիներուն, Ամորհացիներուն, Քանանացիներուն, Փերեզացիներուն, Խեւացիներուն եւ Յեբուսացիներուն երկիրները).—

Երիքովի թագաւորը՝ մէկ, Բեթէլի քով եղող Գայիի թագաւորը՝ մէկ,

Երուսաղէմի թագաւորը՝ մէկ, Քեբրոնի թագաւորը՝ մէկ,

Յերիմութի թագաւորը՝ մէկ, Լաքիսի թագաւորը՝ մէկ,

Էգղոնի թագաւորը՝ մէկ, Գազերի թագաւորը՝ մէկ,

Դաբիրի թագաւորը՝ մէկ, Գադերի թագաւորը՝ մէկ,

Հորմայի թագաւորը՝ մէկ, Արադի թագաւորը՝ մէկ,

Լեբնայի թագաւորը՝ մէկ, Ոդողոմի թագաւորը՝ մէկ,

Մակեդայի թագաւորը՝ մէկ, Բեթէլի թագաւորը՝ մէկ,

Թափուայի թագաւորը՝ մէկ, Ոփերի թագաւորը՝ մէկ,

Ափէկի թագաւորը՝ մէկ, Լասարոնի թագաւորը՝ մէկ,

Մադոնի թագաւորը՝ մէկ, Հասորի թագաւորը՝ մէկ,

Սամրոն-Մառոնի թագաւորը՝ մէկ, Աքսափի թագաւորը՝ մէկ,

Թանաքի թագաւորը՝ մէկ, Մակեդդովի թագաւորը՝ մէկ,

Կադէսի թագաւորը՝ մէկ, Կարմեղոս եղած Յեկնամի թագաւորը՝ մէկ,

Դովրի բարձունքին վրայ եղած Դովրի թագաւորը՝ մէկ, Գաղգաղա եղած Գոյիմի թագաւորը՝ մէկ,

Թերսայի թագաւորը՝ մէկ. այս բոլոր թագաւորներուն թիւը՝ երեսունմէկ էր։