Joshua 16

Deuteronomy  «  Joshua 15  ‹  Joshua 16  ›  Joshua 17  »  Judges

ԵՓՐԵՄԻ ԵՒ ԱՐԵՒՄՏԵԱՆ ՄԱՆԱՍԷԻ ՅԱՏԿԱՑՈՒԱԾ ԵՐԿԻՐԸ

Յովսէփի որդիներուն ելած վիճակը՝ Երիքովի դիմաց եղող Յորդանանէն, Երիքովի ջուրին արեւելեան կողմէն կ’երթայ այն անապատը՝ որ Երիքովէն Բեթէլի լեռը կը բարձրանայ։

Սահմանը Բեթէլէն դուրս կ’ելլէ դէպի Լուզ, Ատարոթէն կ’անցնի՝ Արքիի հողամասին մօտ,

արեւմտեան կողմէն՝ Յեփալթիի հողամասը կ’իջնէ, մինչեւ Ստորին Բեթորոնին հողամասը ու մինչեւ Գազեր, եւ ծովը կը յանգի։

Յովսէփի որդիները՝ Մանասէ ու Եփրեմ՝ ա՛յս ժառանգութիւնը առին։

ԵՓՐԵՄ

Եփրեմի որդիներուն հողամասը՝ իրենց գերդաստաններուն համեմատ եղաւ։ Անոնց ժառանգութեան սահմանը՝ արեւելեան կողմէն Ատարոթ-Ադար է, մինչեւ Վերին Բեթորոնը։

Սահմանը հիւսիսային կողմէն ծովը դուրս կ’ելլէ՝ Մաքմեթաթի մօտ. եւ այս սահմանը կը դառնայ դէպի արեւելք՝ մինչեւ Թէանթսելով, անկէ կ’անցնի արեւելեան կողմէն՝ դէպի Յանովէ,

Յանովէէն կ’իջնէ Ատարովթ ու Նաարա, Երիքովի կը հասնի եւ Յորդանանէն դուրս կ’ելլէ։

Այս սահմանը Թափուայէն Կանա վտակը կ’երթայ՝ արեւմտեան կողմէն, ու ծովը կը յանգի։ Ա՛յս է Եփրեմի որդիներուն տոհմին ժառանգութիւնը՝ իրենց գերդաստաններուն համեմատ,

նաեւ Եփրեմի որդիներուն համար զատուած քաղաքները՝ Մանասէի որդիներուն ժառանգութեան մէջ, այս բոլոր քաղաքները՝ իրենց աւաններով։

Անոնք Գազեր բնակող Քանանացիները չվտարեցին. հետեւաբար Քանանացիները Եփրեմի մէջ կը բնակին մինչեւ այսօր, հարկատու հպատակներ ըլլալով։