Joshua 18

Deuteronomy  «  Joshua 17  ‹  Joshua 18  ›  Joshua 19  »  Judges

ՄՆԱՑԵԱԼ ԵՐԿՐԻՆ ԲԱԺԱՆՈՒՄԸ

Իսրայէլի որդիներուն ամբողջ համայնքը Սելովի մէջ համախմբուեցաւ, ու Հանդիպումի վրանը հոն ¹կանգնեցուցին. երկիրը անոնց առջեւ նուաճուեցաւ։

Իսրայէլի որդիներուն մէջ եօթը տոհմ մնացած էր, որոնց բաժնուած չէր իրենց ժառանգութիւնը։

Ուստի Յեսու Իսրայէլի որդիներուն ըսաւ. «Մինչեւ ե՞րբ անհոգ պիտի ըլլաք եւ պիտի չերթաք տիրանալու այն երկրին, որ Տէրը՝ ձեր հայրերուն Աստուածը ձեզի տուաւ։

Ամէն մէկ տոհմէ երե՛ք մարդ ²ընտրեցէք, որպէսզի զանոնք ղրկեմ. անոնք պիտի կանգնին, այդ երկրին մէջ պիտի շրջին, զայն իրենց ժառանգութեան համեմատ արձանագրեն, յետոյ ինծի գան։

Զայն եօթը մասի պիտի բաժնեն. Յուդա իր հողամասին մէջ պիտի կենայ՝ հարաւային կողմը, եւ Յովսէփի տունը իր հողամասին մէջ պիտի կենայ՝ հիւսիսային կողմը։

Ուստի երկիրը արձանագրեցէ՛ք՝ եօթը բաժինով, ու հոս՝ ինծի՛ բերէք արձանագրութիւնը, որպէսզի հոս՝ ձեզի համար վիճակ ձգեմ Տէրոջ՝ մեր Աստուծոյն առջեւ։

Սակայն Ղեւտացիները ձեր մէջ բաժին չունին, որովհետեւ Տէրոջ քահանայութիւնն է անոնց ժառանգութիւնը։ Իսկ Գադ, Ռուբէն եւ Մանասէի կէս տոհմը իրենց ժառանգութիւնները ստացած են Յորդանանի միւս կողմը, դէպի արեւելք. Տէրոջ ծառան՝ Մովսէս իրենց տուաւ զանոնք»։

Այդ մարդիկը կանգնեցան ու գացին։ Յեսու այդ երկիրը արձանագրելու գացողներուն պատուիրեց. «Գացէ՛ք, այդ երկրին մէջ շրջելով զայն արձանագրեցէ՛ք եւ ինծի՛ վերադարձէք, որպէսզի հոս՝ Սելովի մէջ ձեզի համար վիճակ ձգեմ Տէրոջ առջեւ»։

Այդ մարդիկը գացին, այդ երկրին մէջէն անցան, զայն եօթը բաժինով արձանագրեցին գիրքի մը մէջ՝ իր քաղաքներուն համեմատ, ու Յեսուի եկան՝ Սելովի բանակավայրը։

Յեսու Սելովի մէջ անոնց համար վիճակ ձգեց Տէրոջ առջեւ, ու հոն՝ Յեսու երկիրը բաժնեց Ւսրայէլի որդիներուն՝ իրենց բաժիններուն համեմատ։

ԲԵՆԻԱՄԻՆԻ ՅԱՏԿԱՑՈՒԱԾ ԵՐԿԻՐԸ

Նախ՝ Բենիամինի որդիներուն տոհմին վիճակը ելաւ՝ իրենց գերդաստաններուն համեմատ։ Իրենց վիճակին հողամասը՝ Յուդայի որդիներուն եւ Յովսէփի որդիներուն մէջտեղը ելաւ։

Անոնց հիւսիսային կողմի սահմանը Յորդանանէն ³կը սկսի՝՝. այս սահմանը հիւսիսային կողմէն Երիքովի քով կը բարձրանայ, դէպի արեւմուտք՝ լեռը կը բարձրանայ, ու Բեթաւանի անապատը կը յանգի։

Սահմանը անկէ Լուզ կ’անցնի, Լուզի՝ այսինքն Բեթէլի հարաւային կողմէն. այս սահմանը Ատարոթ-Ադար կ’իջնէ, որ Ստորին Բեթորոնին հարաւային կողմը եղող լերան քովն է։

Այս սահմանը արեւմտեան ծայրը ⁴հասնելով՝ դէպի հարաւ կը դառնայ, Բեթորոնի դիմացի լեռնէն դէպի հարաւ, ու կը յանգի Կարիաթ-Բահաղ, որ Կարիաթ-Յարիմն է, Յուդայի որդիներուն քաղաքը։ Ա՛յս է արեւմտեան կողմը։

Հարաւային կողմը Կարիաթ-Յարիմի ծայրէն կը սկսի. սահմանը դէպի արեւմուտք ⁵կ’երթայ եւ Նափթովայի ջուրին աղբիւրէն դուրս կ’ելլէ։

Այս սահմանը՝ Ենովմի որդիին ձորին դիմացի լերան ծայրը կ’իջնէ. այս ձորը Ռափայիններու հովիտին մէջ է՝ հիւսիսային կողմը։ Սահմանը Ենովմի ձորէն կ’իջնէ դէպի հարաւ՝ Յեբուսի քովէն, ու Ռովգէլի աղբիւրը կ’իջնէ.

յետոյ դէպի հիւսիս հասնելով՝ Ենսամիւսէն դուրս կ’ելլէ, ապա Եդովմինի զառիվերին դիմաց եղող Գալիլովթէն դուրս կ’ելլէ, եւ Ռուբէնեան Բահանի քարը կ’իջնէ։

Յետոյ Արաբայի դիմացի կողմէն դէպի հիւսիս անցնելով՝ Արաբա կ’իջնէ։

Ապա այս սահմանը Բեթագղայի քովէն կ’անցնի՝ դէպի հիւսիս, եւ այս սահմանը Աղի ծովուն հիւսիսային ծոցը ու Յորդանանի հարաւային ծայրը կը յանգի։ Ա՛յս է հարաւային սահմանը։

Արեւելեան կողմի սահմանը Յորդանանն է։ Ա՛յս է Բենիամինի որդիներուն ժառանգութիւնը՝ իր շրջակայ սահմաններով, անոնց գերդաստաններուն համեմատ։

Հետեւեալները Բենիամինի որդիներուն տոհմին քաղաքներն են՝ իրենց գերդաստաններուն համեմատ.— Երիքով, Բեթագղա, Եմեկկասիս,

Բեթարաբա, Սեմարիմ, Բեթէլ,

Աւիմ, Փարա, Եփրա,

Քեփարամոննա, Հոփնի ու Գաբա. տասներկու քաղաք, եւ անոնց աւանները։

Գաբաւոն, Ռամա, Բերովթ,

Մասփա, Կեփիրա, Մոսա,

Ռեկէմ, Յերփայէլ, Թարաղա,

Սելա, Էլէփ, Յեբուս, այսինքն՝ Երուսաղէմ, Գաբաաթ ու Կարիաթ. տասնչորս քաղաք, եւ անոնց աւանները։ Ա՛յս է Բենիամինի որդիներուն ժառանգութիւնը՝ իրենց գերդաստաններուն համեմատ։