Joshua 23

Deuteronomy  «  Joshua 22  ‹  Joshua 23  ›  Joshua 24  »  Judges

ՅԵՍՈՒԻ ՀՐԱԺԵՇՏԻ ՈՒՂԵՐՁԸ

Երկար ժամանակէ ի վեր Տէրը Իսրայէլը հանգստացուցած էր անոր բոլոր շրջակայ թշնամիներէն։ Յեսու ծերացած էր ու ¹տարիքով յառաջացած՝՝։

Ուստի Յեսու կանչեց ամբողջ Իսրայէլը, անոր երէցները, գլխաւորները, դատաւորներն ու ոստիկանները, եւ անոնց ըսաւ.

«Ես ծերացայ ու տարիքով յառաջացայ։ Դուք տեսաք ամէն ինչ որ Տէրը՝ ձեր Աստուածը այս բոլոր ազգերուն ըրաւ ձեր պատճառով. քանի Տէրը՝ ձեր Աստուածը՝ ի՛նք ձեզի համար պատերազմեցաւ։

Նայեցէ՛ք, այս մնացած ազգերը ձեզի իբր ժառանգութիւն վիճակով բաժնեցի՝ ձեր տոհմերուն համեմատ, նաեւ իմ կոտորած բոլոր ազգերս՝ Յորդանանէն մինչեւ Մեծ ծովը, դէպի արեւմուտք։

Տէրը՝ ձեր Աստուածը՝ ի՛նք ձեր առջեւէն պիտի քշէ զանոնք. ձեր առջեւէն պիտի վտարէ զանոնք, եւ անոնց երկրին պիտի տիրանաք, ինչպէս Տէրը՝ ձեր Աստուածը ձեզի խոստացաւ։

Ուստի շա՛տ ուժովցէք, որպէսզի Մովսէսի Օրէնքի գիրքին մէջ գրուած ամէն ինչ զգուշութեամբ գործադրէք, ու անկէ աջ կողմ կամ ձախ կողմ չշեղիք.

որպէսզի ձեր քով մնացած այս ազգերուն ²չխառնուիք, անոնց աստուածներուն անունները չյիշատակէք եւ անոնցմով երդում չընէք, զանոնք չպաշտէք եւ անոնց չերկրպագէք.

հապա Տէրոջ՝ ձեր Աստուծոյն յարիք, ինչպէս մինչեւ այսօր ըրիք։

Տէրը ձեր առջեւէն մեծ ու հզօր ազգեր վտարեց, ու մինչեւ այսօր ո՛չ մէկը կրցաւ ³ձեզի դիմադրել՝՝։

Ձեզմէ մէկը անոնց հազարը կը հալածէ, որովհետեւ Տէրը՝ ձեր Աստուածը՝ ի՛նք ձեզի համար կը պատերազմի, ինչպէս ձեզի խոստացաւ։

Ուստի շա՛տ ուշադիր եղէք ձեր անձերուն, որպէսզի Տէրը՝ ձեր Աստուածը սիրէք։

Բայց եթէ անկէ հեռանաք ու ձեր քով մնացած այս ազգերուն մնացորդին յարիք, անոնց խնամի ըլլաք, անոնց խառնուիք եւ անոնք ալ՝ ձեզի,

ստո՛ւգապէս գիտցէք թէ Տէրը՝ ձեր Աստուածը անգա՛մ մըն ալ այս ազգերը ձեր առջեւէն պիտի չվտարէ. հապա անոնք ձեզի վարմ ու որոգայթ պիտի ըլլան, ձեր կողերուն՝ խարազաններ եւ ձեր աչքերուն՝ փուշեր, մինչեւ որ կորսուիք այս լաւ ⁴երկրին վրայէն, որ Տէրը՝ ձեր Աստուածը ձեզի տուաւ։

Ահա՛ ես այսօր ամբողջ երկրի ճամբան կ’երթամ, ու դուք ձեր ամբողջ սիրտով եւ ձեր ամբողջ անձով գիտէք թէ ոչինչ ⁵պակսեցաւ այն բոլոր բարի խօսքերէն, որ Տէրը՝ ձեր Աստուածը ձեր մասին ըսեր էր. բոլորն ալ ձեր վրայ իրագործուեցան. անոնցմէ ո՛չ մէկ խօսք պակսեցաւ։

Հետեւաբար, ինչպէս Տէրոջ՝ ձեր Աստուծոյն ձեզի համար ըսած բոլոր բարի խօսքերը ձեր վրայ ⁶իրագործուեցան, նոյնպէս Տէրը բոլոր չար խօսքերը ձեր վրայ պիտի բերէ, մինչեւ որ ձեզ բնաջնջէ այս լաւ ⁷երկրին վրայէն, որ Տէրը՝ ձեր Աստուածը ձեզի տուաւ։

Եթէ Տէրոջ՝ ձեր Աստուծոյն ձեզի պատուիրած ուխտը անտեսէք ու երթաք ուրիշ աստուածներ պաշտէք եւ անոնց երկրպագէք, Տէրոջ բարկութիւնը ձեզի դէմ պիտի բորբոքի ու ձեզի տուած լաւ երկրին վրայէն շուտով պիտի կորսուիք»։