Judges 4

Joshua  «  Judges 3  ‹  Judges 4  ›  Judges 5  »  Ruth

ԴԵԲՈՐԱ ԵՒ ԲԱՐԱԿ

Աւովդի մեռնելէն ետք՝ Իսրայէլի որդիները Տէրոջ ¹առջեւ վերստին չարիք գործեցին։

Ուստի Տէրը զանոնք Քանանացիներու Յաբին թագաւորին ձեռքը ²մատնեց, որ Հասորի մէջ կը թագաւորէր. անոր սպարապետը Սիսարա էր, որ ³ազգերու Արիսոթին մէջ կը բնակէր։

Իսրայէլի որդիները Տէրոջ աղաղակեցին, որովհետեւ ան ինը հարիւր երկաթէ կառքեր ունէր ու քսան տարի Իսրայէլի որդիները սաստիկ տանջեց։

Այդ ատեն Դեբորա մարգարէուհին՝ Ղափիդոթի կինը՝ Իսրայէլի մէջ դատաւոր էր։

Ան Եփրեմի լեռնակողմը կը բնակէր, Ռամայի ու Բեթէլի մէջտեղ, Դեբորայի արմաւենիին տակ։ Իսրայէլի որդիները դատաստանի համար անոր քով կը բարձրանային։

Դեբորա մարդ ղրկեց, Նեփթաղիմի Կադէսէն Աբինոամի որդին՝ Բարակը կանչեց, եւ անոր ըսաւ. «Տէրը՝ Իսրայէլի Աստուածը քեզի չպատուիրե՞ց. “Գնա՛, Թաբոր լե՛ռը ⁴ելիր, ու Նեփթաղիմի որդիներէն եւ Զաբուղոնի որդիներէն քեզի հետ տա՛սը հազար մարդ առ։

Ես Յաբինի սպարապետը՝ Սիսարան, եւ անոր կառքերն ու զօրքերու բազմութիւնը քու դիմացդ պիտի ⁵հանեմ՝ Կիսոնի ձորը, եւ զայն քու ձեռքդ պիտի մատնեմ”»։

Բարակ անոր ըսաւ. «Եթէ դուն ալ ինծի հետ երթաս, կ’երթամ. բայց եթէ ինծի հետ չերթաս, չեմ երթար»։

Ան ալ ըսաւ. «Անշուշտ քեզի հետ պիտի երթամ, բայց երթալիք ճամբադ քեզի պանծալի պիտի չըլլայ. քանի որ Տէրը Սիսարան կնոջ մը ձեռքը պիտի ⁶մատնէ»։ Դեբորա կանգնեցաւ ու Բարակի հետ Կադէս գնաց։

Բարակ Զաբուղոնը եւ Նեփթաղիմը Կադէս ⁷կանչեց, ու տասը հազար մարդ ⁸իրեն հետեւելով՝՝ բարձրացաւ. Դեբորա ալ անոր հետ բարձրացաւ։

(Մովսէսի աներոջ՝ Յոբաբի որդիներէն Կենեցի Քաբեր Կենեցիներէն զատուած էր, եւ իր վրանը Կադէսի մօտ՝ Սանանիմի կաղնիին քով լարած էր։)

Սիսարայի իմացուցին թէ Աբինոամի որդին՝ Բարակ Թաբոր լեռը բարձրացած է։

Սիսարա իր բոլոր կառքերը — ինը հարիւր երկաթէ կառքերը — ու իրեն հետ եղող ամբողջ ժողովուրդը ազգերու Արիսոթէն Կիսոնի ձորը ⁹կանչեց։

Դեբորա Բարակի ըսաւ. «Ոտքի՛ ելիր, քանի ա՛յսօր Տէրը Սիսարան քու ձեռքդ մատնեց. միթէ Տէրը քու առջեւէդ դուրս չելա՞ւ»։ Բարակ Թաբոր լեռնէն իջաւ, եւ իր ետեւէն՝ տասը հազար մարդ։

Տէրը Սիսարան, բոլոր կառքերն ու ամբողջ բանակը Բարակի առջեւ խուճապի մատնեց՝ սուրի բերանով։ Սիսարա կառքէն իջաւ եւ ոտքով փախաւ։

Բարակ կառքերն ու բանակը մինչեւ ազգերու Արիսոթը հալածեց, եւ Սիսարայի ամբողջ բանակը սուրի բերանով ինկաւ. ո՛չ մէկը ողջ մնաց։

Սիսարա ոտքով Կենեցի Քաբերի կնոջ՝ Յայէլի վրանը փախաւ. քանի որ Հասորի Յաբին թագաւորին ու Կենեցի Քաբերի տան միջեւ խաղաղութիւն կար։

Ուստի Յայէլ դուրս ելաւ՝ Սիսարան դիմաւորելու, եւ անոր ըսաւ. «Իմ տէ՛րս, ¹⁰եկո՛ւր, ինծի՛ եկուր, մի՛ վախնար»։ Ուստի ան դէպի վրանը՝ անոր ¹¹գնաց, ու կինը զայն վերմակով մը ծածկեց։

Ան կնոջ ըսաւ. «Կ’աղերսե՛մ, ինծի քիչ մը ջո՛ւր տուր՝ որ խմեմ, քանի ծարաւ եմ»։ Ան ալ կաթին տիկը բացաւ եւ անոր խմցուց. յետոյ զայն ծածկեց։

Նաեւ անոր ըսաւ. «Վրանին մո՛ւտքը կայնէ, ու եթէ մարդ մը գայ, քեզ հարցուփորձէ եւ ըսէ. “Հոս մարդ կա՞յ”, ըսէ՛. “Ո՛չ”»։

Ապա Քաբերի կինը՝ Յայէլ վրանին մէկ ցիցը առաւ, մուրճն ալ ձեռքը ¹²բռնելով՝ կամաց մը անոր քով գնաց, ու ցիցը անոր քունքը մխելով՝ զայն գետինը խրեց։ Ան պարտասած ըլլալով՝ խորունկ կը քնանար. այսպէս մեռաւ։

Ահա՛ Բարակ Սիսարան կը հետապնդէր երբ Յայէլ դուրս ելաւ՝ զինք դիմաւորելու, եւ իրեն ըսաւ. «Եկո՛ւր, քու փնտռած մարդդ քեզի ցուցնեմ»։ Ինք ալ անոր հետ վրանը մտաւ, ու ահա՛ Սիսարա պառկած էր՝ մեռած, ցիցը իր քունքին մէջ։

Աստուած այդ օրը Քանանացիներու Յաբին թագաւորը Իսրայէլի որդիներուն առջեւ ընկճեց։

Քանանացիներու Յաբին թագաւորին դէմ Իսրայէլի որդիներուն ձեռքը ¹³հետզհետէ կը ծանրանար, մինչեւ որ Քանանացիներու Յաբին թագաւորը բնաջնջեցին։