Leviticus 14

Exodus  «  Leviticus 13  ‹  Leviticus 14  ›  Leviticus 15  »  Numbers

ԲՈՐՈՏՈՒԹԵՆԷ ՄԱՔՐՈՒԹԻՒՆ

Տէրը խօսեցաւ Մովսէսի՝ ըսելով.

«Ահա՛ւասիկ բորոտին օրէնքը՝ իր մաքրուելու օրը.— ան քահանային թող տարուի,

քահանան բանակավայրէն դուրս թող ելլէ ու քահանան թող զննէ։ Եթէ բորոտին բորոտութեան ախտը բուժուած է,

քահանան թող պատուիրէ որ մաքրուելիք մարդուն համար երկու ողջ եւ մաքուր ¹թռչուն, մայրիի փայտ, կրկնակի կարմիր ու զոպայ առնուի։

Քահանան թող պատուիրէ որ թռչուններէն մէկը ²խեցիէ անօթի մը մէջ մորթուի՝ ³կենսաւէտ ջուրի վրայ։

Ողջ թռչունը, մայրիի փայտը, կրկնակի կարմիրը եւ զոպան թող առնէ, զանոնք ողջ թռչունին հետ թող թաթխէ կենսաւէտ ջուրին վրայ մորթուած թռչունին արիւնին մէջ,

ու բորոտութենէ մաքրուելիք մարդուն վրայ եօթը անգամ թող սրսկէ եւ ⁴մաքրէ զայն՝՝, իսկ ողջ թռչունը դէպի ⁵բաց դաշտը՝՝ թող արձակէ։

Իսկ մաքրուելիք մարդը իր հագուստները թող լուայ, բոլոր մազերը ածիլէ ու ջուրով լուացուի, եւ մաքրուած պիտի ըլլայ։ Անկէ ետք բանակավայրը թող մտնէ ու եօթը օր իր վրանէն դուրս կենայ։

Եօթներորդ օրը իր բոլոր մազերը թող ածիլէ — իր գլուխը, մօրուքը եւ յօնքերը —, այսինքն՝ իր բոլոր մազերը թող ածիլէ, հագուստները լուայ ու մարմինը ջուրով լուայ, եւ մաքրուած պիտի ըլլայ։

Ութերորդ օրը՝ թող առնէ երկու անարատ արու գառ, մէկ անարատ էգ գառնուկ՝ մէկ տարեկան, իւղով շաղուած երեք տասներորդ նաշիհ՝ հացի ընծայի համար, ու մէկ ճաշակ իւղ։

Մաքրող քահանան մաքրուելիք մարդը ասոնցմով թող կեցնէ Տէրոջ առջեւ՝ Հանդիպումի վրանին մուտքը,

եւ քահանան մէկ արու գառը թող առնէ ու զայն մօտեցնէ յանցանքի պատարագի համար՝ իւղի ճաշակին հետ, եւ զանոնք Տէրոջ առջեւ թող մատուցանէ իբր երերցնելիք ընծայ։

Գառը թող մորթէ մեղքի պատարագին ու ողջակէզին մորթուած տեղը — սուրբ տեղը —. որովհետեւ յանցանքի պատարագը՝ մեղքի պատարագին պէս քահանայինն է. ասիկա ամենասուրբ է։

Քահանան յանցանքի պատարագին արիւնէն թող առնէ, ու քահանան թող դնէ զայն մաքրուելիք մարդուն աջ ականջին բլթակին վրայ, անոր աջ ձեռքին բթամատին վրայ եւ աջ ոտքին բթամատին վրայ։

Քահանան իւղի ճաշակէն քիչ մը իւղ թող առնէ ու իր ձախ ափին մէջ թափէ։

Քահանան իր աջ մատը թող թաթխէ իր ձախ ափը եղող իւղին մէջ, եւ իր մատով Տէրոջ առջեւ եօթը անգամ սրսկէ այդ իւղէն։

Քահանան իր ափին մէջ մնացած իւղէն թող դնէ մաքրուելիք մարդուն աջ ականջին բլթակին վրայ, անոր աջ ձեռքին բթամատին վրայ եւ աջ ոտքին բթամատին վրայ — յանցանքի պատարագի արիւնին վրայ։

Քահանան իր ափին մէջ մնացած իւղը թող դնէ մաքրուելիք մարդուն գլուխին վրայ, ու անոր համար թող քաւութիւն ընէ Տէրոջ առջեւ։

Յետոյ քահանան մեղքի պատարագը թող ընծայէ եւ իր անմաքրութենէն մաքրուելիք մարդուն համար քաւութիւն ընէ, ապա ողջակէզը թող մորթէ։

Քահանան ողջակէզն ու հացի ընծան զոհասեղանին վրայ թող մատուցանէ եւ անոր համար քաւութիւն ընէ, ու ան մաքրուած պիտի ըլլայ։

Բայց եթէ ան չքաւոր է եւ իր կարողութիւնը չի հասնիր այսչափին, յանցանքի պատարագի գառ մը թող առնէ՝ որ երերցուի իրեն քաւութիւն ընելու համար, նաեւ իւղով շաղուած մէկ տասներորդ նաշիհ՝ հացի ընծայի համար, ճաշակ մը իւղ,

ու երկու տատրակ կամ աղաւնիի երկու ձագ, որոնց որ իր կարողութիւնը կը հասնի. մէկը մեղքի պատարագ թող ըլլայ, իսկ միւսը՝ ողջակէզ։

Ութերորդ օրը՝ իր մաքրուելուն համար զանոնք քահանային թող բերէ Հանդիպումի վրանին մուտքը, Տէրոջ առջեւ։

Քահանան թող առնէ յանցանքի պատարագին գառը եւ իւղի ճաշակը, ու զանոնք Տէրոջ առջեւ թող մատուցանէ իբր երերցնելիք ընծայ։

Յանցանքի պատարագին գառը թող մորթէ, եւ քահանան յանցանքի պատարագին արիւնէն թող առնէ ու դնէ զայն մաքրուելիք մարդուն աջ ականջին բլթակին վրայ, անոր աջ ձեռքին բթամատին վրայ եւ աջ ոտքին բթամատին վրայ։

Քահանան մաս մը իւղ թող թափէ իր ձախ ափին մէջ,

ու քահանան իր աջ մատով իր ձախ ափին մէջ եղող իւղէն Տէրոջ առջեւ եօթը անգամ թող սրսկէ։

Քահանան իր ափին մէջ եղող իւղէն թող դնէ մաքրուելիք մարդուն աջ ականջին բլթակին վրայ, անոր աջ ձեռքին բթամատին վրայ եւ աջ ոտքին բթամատին վրայ — յանցանքի պատարագին արիւնը դրուած տեղին վրայ։

Քահանան իր ափին մէջ մնացած իւղը թող դնէ մաքրուելիք մարդուն գլուխին վրայ՝ Տէրոջ առջեւ անոր համար քաւութիւն ընելով,

ու թող ընծայէ տատրակներէն կամ աղաւնիի ձագերէն մէկը՝ այն չափին որ իր կարողութիւնը կը հասնի,

— այսինքն՝ որուն որ իր կարողութիւնը կը հասնի —, մէկը՝ մեղքի պատարագի համար եւ միւսը՝ ողջակէզի համար, հացի ընծային հետ, ու քահանան մաքրուելիք մարդուն համար թող քաւութիւն ընէ Տէրոջ առջեւ։

Ա՛յս է օրէնքը բորոտութեան ախտ ունեցողին՝ որուն ⁶կարողութիւնը չի հասնիր իր մաքրուելուն համար պէտք եղածը բերելու»։

ՏՈՒՆԵՐՈՒ ՄԷՋ ԲՈՐՈՏՈՒԹԻՒՆ

Տէրը խօսեցաւ Մովսէսի եւ Ահարոնի՝ ըսելով.

«Երբ մտնէք Քանանի երկիրը՝ որ ձեզի իբր կալուած պիտի տամ, եթէ ձեր կալուածը եղող երկրին մէկ տան մէջ բորոտութեան հարուածը տամ,

այդ տան տէրը թող գայ եւ իմացնէ քահանային՝ ըսելով. “Ինծի կ’երեւնայ թէ տանս մէջ ախտ կայ”։

Քահանան թող պատուիրէ որ տունը պարպեն, դեռ ինք ներս չմտած՝ զննելու համար, որպէսզի տան մէջ եղածներէն ոչինչ անմաքուր ըլլայ. ատկէ ետք քահանան թող մտնէ՝ տունը զննելու։

Ախտը թող զննէ. եթէ ախտը տան պատերուն վրայ կանաչորակ կամ կարմրորակ խորշեր ըրած է եւ անոնք պատին մակերեսէն խորունկ կ’երեւնան,

քահանան տունէն թող ելլէ տան մուտքը ու եօթը օր տունը թող գոցէ։

Եօթներորդ օրը քահանան դարձեալ թող գայ եւ զննէ. եթէ ախտը տան պատերուն վրայ տարածուած է,

քահանան թող պատուիրէ որ ախտացեալ քարերը հանեն ու քաղաքէն դուրս անմաքուր տեղ մը նետեն զանոնք։

Տան ներսը բոլորաձեւ քերել թող տայ, եւ անոնց քերած ⁷հողը անմաքուր տեղ մը թող թափեն՝ քաղաքէն դուրս։

Ուրիշ քարեր թող առնեն ու այդ քարերուն տեղը դնեն, եւ ուրիշ հող առնեն ու տունը ծեփեն։

Եթէ քարերը հանելէն ետք, տունը քերելէն ետք եւ ծեփելէն ետք ախտը դարձեալ գայ ու տան մէջ աճի,

քահանան թող գայ եւ զննէ. եթէ ախտը տան մէջ տարածուած է, ատիկա բորբոքած բորոտութիւն է տան մէջ. ան անմաքուր է։

Ուստի տունը, այսինքն անոր քարերն ու փայտերը եւ տան ամբողջ ծեփուած հողը, թող փլցնէ ու զանոնք քաղաքէն դուրս հանէ՝ անմաքուր տեղ մը։

Ո՛վ որ այդ տունը մտնէ անոր բոլոր գոցուած օրերը, մինչեւ իրիկուն անմաքուր պիտի ըլլայ.

այդ տունը պառկողը իր հագուստները թող լուայ եւ այդ տան մէջ հաց ուտողը իր հագուստները թող լուայ։

Իսկ եթէ քահանան մտնէ ու տեսնէ թէ տունը ծեփուելէն ետք՝ ախտը անոր մէջ տարածուած չէ, քահանան թող ծանուցանէ այդ տան մաքուր ըլլալը, որովհետեւ ախտը բուժուած է։

Տունը մեղքէ մաքրելու համար երկու թռչուն, մայրիի փայտ, կրկնակի կարմիր ու զոպայ թող առնէ։

Թռչուններէն մէկը խեցիէ անօթի մը մէջ թող մորթէ՝ կենսաւէտ ջուրի վրայ։

Մայրիի փայտը, զոպան, կրկնակի կարմիրը եւ ողջ թռչունը թող առնէ, զանոնք թող թաթխէ մորթուած թռչունին արիւնին ու այդ կենսաւէտ ջուրին մէջ, եօթը անգամ տան վրայ թող սրսկէ,

եւ տունը թող մեղքէ մաքրէ թռչունին արիւնով, այդ կենսաւէտ ջուրով, այդ ողջ թռչունով, մայրիի փայտով, զոպայով ու կրկնակի կարմիրով։

Իսկ ողջ թռչունը դէպի դաշտը թող արձակէ՝ քաղաքէն դուրս, եւ տան համար քաւութիւն ընէ, ու ան մաքրուած պիտի ըլլայ»։

Այս է օրէնքը ամէն տեսակ բորոտութեան ախտի, գոնջութեան,

հագուստի կամ տան բորոտութեան,

նաեւ ուռեցքի, քոսի ու պաղպաջի։

Բանի մը ո՛ր օրը անմաքուր ըլլալը եւ ո՛ր օրը մաքուր ըլլալը սորվեցնելու համար՝ ա՛յս է բորոտութեան օրէնքը։